ସୁନାଦୋକାନରୁ ସଟର ଭାଙ୍ଗି କୋଟିଏ ଟଙ୍କାର ଅଳଙ୍କାର ଲୁଟ୍ ଘଟଣା । ସାଇଣ୍ଟିଫିକ୍ ଟିମ୍ର ଛାନଭିନ୍, ୩ଜଣଙ୍କ ଫିଙ୍ଗରପ୍ରିଣ୍ଟ୍ ଠାବ
କନକ ବ୍ୟୁରୋ : ଭୁବନେଶ୍ୱରର ଡେଲଟା ଛକ ଏକ ସୁନା ଗହଣା ଦୋନାରୁ କୋଟିଏ ଟଙ୍କାର ସୁନା ଅଳଙ୍କାର ଲୁଟ ହୋଇଥିବା ଅଭିଯୋଗ ହୋଇଛି । ଶନିବାର ରାତି ପ୍ରାୟ ସାଢେ ୩ଟାରେ ଏହି ଲୁଟ୍ ହୋଇଛି । ଏନେଇ ଅଳଙ୍କାର ଦୋକାନର ମାଲିକ ଖଣ୍ଡଗିରି ଥାନାରେ ଅଭିଯୋଗ କରିଛନ୍ତି । ଯୋଜାନାବଦ୍ଧ ଭାବେ ସଟରକୁ କାଟି କାଚଭାଙ୍ଗି ଲୁଟେରା ମାନେ ଦୋକାନ ଭିତରେ ପଶିଛନ୍ତି । ଚୋରି ଗହଣା ମଧ୍ୟରେ ଏକ କିଲୋ ସୁନା, ଦେଢଲକ୍ଷ ନଗଦ ଟଙ୍କା ଓ ୧୦ କିଲୋଗ୍ରାମ ରୂପା ଥିବା ଅଭିଯୋଗ ହୋଇଛି । ଦୋକାନର ଷ୍ଟ୍ରଙ୍ଗରୁମକୁ ବି ଭାଙ୍ଗିଦେଇଛନ୍ତି ଲୁଟେରା ।
Kanak News is now on WhatsApp
Join and get latest news updates delivered to you via WhatsApp
ସବୁଠାରୁ ବଡ କଥା ହେଲା, ଦୋକାନରେ ଲାଗିଥିବା ସିସିଟିଭର ହାର୍ଡଡିସ୍କ ବି ଲୁଟେରାମାନେ ଚୋରି କରିନେଇଥିବା ଅଭିଯୋଗ ହୋଇଛି । ଏତଲା ପାଇବା ପରେ ଖଣ୍ଡଗିରି ଥାନା ପୁଲିସ ଛାନଭିନ ଆରମ୍ଭ କରିଛି । ଆଖପାଖର ସିସିଟିଭି ସହାୟତାରେ ଯାଂଚକୁ ଜୋରଦାର କରାଯାଇଛି । କମିଶନରେଟ ପୁଲିସ ଏକ ଟିମ ଗଠନ କରିଛି । ଗତକାଲି ରାତିରେ ବର୍ଷା ଲାଗିରହିଥିବା ବେଳେ ଏହାର ସୁଯୋଗ ନେଇ ଲୁଟେରା ଚୋରି କରିଥିବା ଅନୁମାନ କରାଯାଉଛି ।
ଅଭିଯୋଗ ଅନୁଯାୟୀ, ସନ୍ଦୀପ ରବିବାର ସକାଳ ପ୍ରାୟ ୭ଟା ବେଳେ ଦୋକାନ ଖୋଲିବାକୁ ଯାଇଥିବା ବେଳେ ଦୋକାନ ସଟର୍ କଟା ଯାଇଥିବା ଦେଖିବାକୁ ପାଇଥିଲେ । ଦୋକାନ ଭିତରେ ପଶିବା ପରେ ତାଙ୍କ ପାଦ ତଳୁ ମାଟି ଖସି ଯାଇଥିଲା । ଦୋକାନ କବାଟଠାରୁ ଆରମ୍ଭ କରି ଷ୍ଟ୍ରଙ୍ଗରୁମ୍ ପର୍ଯ୍ୟନ୍ତ ସବୁ କବାଟକୁ ଗ୍ୟାସ୍ କଟର୍ରେ କଟା ଯାଇଥିଲା । ଦୋକାନରେ ଥିବା ପ୍ରାୟ ୭୦ଲକ୍ଷ ଟଙ୍କାର ଅଳଙ୍କାର ସମେତ କ୍ୟାସ୍ ଡ୍ର’ରେ ଥିବା ଦେଢ଼ ଲକ୍ଷ ଟଙ୍କା ଲୁଟ୍ ହୋଇଯାଇଥିଲା । ଲୁଟେରାମାନଙ୍କ କାରନାମା ସିସି କ୍ୟାମେରାରେ କଏଦ୍ ହୋଇଥିବ ଭାବି ଡିବିଆର୍ ମେସିନ୍ ଖୋଜିବା ବେଳକୁ ତାହା ମଧ୍ୟ ନଥିଲା। ଲୁଟେରାମାନେ ଧରାପଡ଼ିଯିବା ଭୟରେ ତାକୁ ବି ସାଥିରେ ନେଇ ପଳାଇଥିଲେ ।
ଖଣ୍ଡଗିରି ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଆରମ୍ଭ କରିଛି । ଛକରେ ଲାଗିଥିବା ସିସି କ୍ୟାମେରା ଏବଂ ପାଖ ଦୋକାନରେ ଥିବା ସିସି ଫୁଟେଜ୍ ଆଧାରରେ ଲୁଟେରାଙ୍କୁ ଧରିବାକୁ ଉଦ୍ୟମ କରିଛି। ଫରେନ୍ସିକ୍ ଟିମ୍ ଲୁଟ୍ ଗହଣା ଦୋକାନରେ ପହଞ୍ଚି ନମୁନା ସଂଗ୍ରହ କରିଛି । ଘଟଣାସ୍ଥଳରୁ ଅଧାକଟା ସଟର୍, ଗହଣା ଦୋକାନର କବାଟ, ସୁନା ବାକ୍ସ ଏବଂ କ୍ୟାସ୍ ଡ୍ର’ରୁ ଫିଙ୍ଗର୍ ପ୍ରିଣ୍ଟ ନମୁନା ସଂଗ୍ରହ କରିଛି । ମୋଟ ୩ଜଣ ନୂଆ ଲୋକଙ୍କ ଫିଙ୍ଗର୍ ପ୍ରିଣ୍ଟ ଠାବ କରାଯାଇଥିବା ସୂଚନା ମିଳିଛି । ତେଣୁ ୩ କିମ୍ବା ତଦୂର୍ଦ୍ଧ୍ବ ଲୁଟେରା ଏହି କାଣ୍ଡ ଭିଆଇଥିବା ପୁଲିସ ଜାଣିବାକୁ ପାଇଛି ।