ଆମ୍ବୁଲାନ୍ସ, ପୋଲିସ ଗାଡିରେ ସାଇରନ୍ ବଦଳରେ ଶୁଭିବ ଭାରତୀୟ ମଧୁର ସଙ୍ଗୀତ । କେନ୍ଦ୍ର ମନ୍ତ୍ରୀ କହିଲେ ପ୍ରସ୍ତୁତ ଚାଲିଛି ପ୍ଲାନ୍…
କନକ ବ୍ୟୁରୋ: ଆମ୍ବୁଲାନ୍ସ ଓ ପୋଲିସ ଗାଡିରେ ଆଉ ଶୁଭିବାକୁ ନ ମିଳିପାରେ ସାଇରନ୍ ଶବ୍ଦ । ଏହି ଶବ୍ଦ ବଦଳରେ ଏଣିକି ଆମ୍ବୁଲାନ୍ସ ଓ ପୋଲିସ ଗାଡିରେ ଶୁଭିବ ଭାରତୀୟ ମଧୁର ସଙ୍ଗୀତ । କେନ୍ଦ୍ରୀୟ ସଡକ ପରିବହନ ମନ୍ତ୍ରୀ ନୀତିନ ଗଡକରି ଏନେଇ ଏକ ନିୟମ ଆଣିବାକୁ ଯୋଜନା ପ୍ରସ୍ତୁତ କରୁଥିବା ସୂଚନା ଦେଇଛନ୍ତି । ତେବେ ଏହି ଭାରତୀୟ ମଧୁର ସଙ୍ଗୀତ ଉପରେ ସେ ଅଧିକ ଅଧ୍ୟୟନ କରୁଛନ୍ତି, ଯାହାକୁ ଖୁବଶୀଘ୍ର ଏକ ଆଇନ୍ ପ୍ରସ୍ତୁତ କରି ଲାଗୁ କରାଯିବ ବୋଲି ନୀତିନ ଗଡକରି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୋମବାର ମହାରାଷ୍ଟର୍ ନାସିକଠାରେ ଏକ ରାଜପଥର ଉଦଘାଟନ ସମାରୋହରେ କେନ୍ଦ୍ରୀୟ ମନ୍ତ୍ରୀ ନୀତିନ ଗଡକରି ଏନେଇ ସୂଚନା ଦେଇଛନ୍ତି । ସେ କହିଛନ୍ତି, ମୁଁ ଏବେ ଆମ୍ବୁଲାନ୍ସ ଓ ପୋଲିସ ଗାଡିରେ ବ୍ୟବହାର ହେଉଥିବା ସାଇରନ ଉପରେ ଅଧ୍ୟୟନ କରୁଛି । ଏହି ସାଇରନ ବଦଳରେ ଏକ ମଧୁର ଭାରତୀୟ ସଙ୍ଗୀତକୁ ଆମ୍ବୁଲାନ୍ସ ଓ ପୋଲିସ ଗାଡିରେ ବ୍ୟବହାର କରାଯିବ । ଏହାଦ୍ୱାରା ଲୋକଙ୍କ କାନକୁ ଏହା ଭଲ ଶୁଭିବା ସହିତ ରାସ୍ତାରେ ଯାଉଥିବା ଯାତ୍ରୀ ମଧ୍ୟ ଏହାଦ୍ୱାରା ହଇରାଣ ହେବେ ନାହିଁ । ଏହାଦ୍ୱାରା କାନରେ ମଧ୍ୟ ଖରାପ ପ୍ରଭାବ ପଡିବ ନାହିଁ ବୋଲି ସେ କହିଛନ୍ତି ।
ଅନ୍ୟପଟେ ନୀତିନ ଗଡକରୀ କହିଛନ୍ତି, ଏକ ଲକ୍ଷ କୋଟି ଟଙ୍କା ବ୍ୟୟ ଅଟକଳରେ ନିର୍ମାଣ ହେଉଥିବା ମୁମ୍ବାଇ-ଦିଲ୍ଲୀ ହାଇୱେ ଏବେ ନିର୍ମାଣଧୀନ ଅଛି । ହେଲେ ଏହା ଭିବଣ୍ଡି ଦେଇ ଜବାହାର ନେହେରୁ ପୋର୍ଟ ଟ୍ରଷ୍ଟ ପାଖରେ ପହଞ୍ଚିବ । ତା ସହିତ ସମୁଦ୍ରରେ ଏକ ପୋଲ ନିର୍ମାଣ ପାଇଁ ଯୋଜନା ଚାଲିଛି । ଯାହାକି ବାନ୍ଦ୍ରାରୁ ବର୍ଲିକୁ ଯୋଡିବ । ଏହାଦ୍ୱାରା ନରିମନ ପଏଣ୍ଟରୁ ଦିଲ୍ଲୀକୁ ଯିବାକୁ କେବଳ ୧୨ ଘଣ୍ଟା ସମୟ ଲାଗିବ ବୋଲି କେନ୍ଦ୍ରମନ୍ତ୍ରୀ କହିଛନ୍ତି । ଭାରତରେ ପ୍ରତିବର୍ଷ ୫ଲକ୍ଷ ଦୁର୍ଘଟଣା ଘଟୁଛି । ଯେଉଁଥିରେ ପ୍ରାୟ ଦେଢ ଲକ୍ଷ ଲୋକ ଜୀବନ ହରାଉଛନ୍ତି । ତେଣୁ ରାଜପଥକୁ ଦୁର୍ଘଟଣାମୁକ୍ତ ରଖିବାକୁ ଭାରତ ସରକାର ଚେଷ୍ଟା କରୁଥିବା ସେ କହିଛନ୍ତି ।
ତେବେ ମୁମ୍ବାଇ-ପୁଣେ ହାଇୱେରେ ଦୁର୍ଘଟଣା ସଂଖ୍ୟା ପ୍ରତିଶତ କମିଯାଇଛି । ତାମିଲନାଡୁ ସରକାର ମଧ୍ୟ ନିଜ ରାଜ୍ୟରେ ଦୁର୍ଘଟଣା ସଂଖ୍ୟାକୁ କମ କରିବାରେ ସଫଳ ହୋଇଛନ୍ତି । ହେଲେ ଏଯାବତ ମହାରାଷ୍ଟ୍ରରେ ଏହା ସମ୍ପୂର୍ଣ୍ଣ ସମ୍ଭବ ହୋଇପାରିନି । ତେଣୁ ଏନେଇ କାମ ଆଗକୁ ଚାଲିଛି ବୋଲି କେନ୍ଦ୍ରମନ୍ତ୍ରୀ ନୀତିନ ଗଡକରି କହିଛନ୍ତି ।