ପିପିଲିରେ ବି ଦେଖିବାକୁ ମିଳିଲା ସମାନ ଚିତ୍ର । ବ୍ୟାଙ୍କରେ ପଡିଲା ତାଲା, ଲୋକେ ହେଉଛନ୍ତି ହନ୍ତସନ୍ତ
ପିପିଲିରେ ବି ଦେଖିବାକୁ ମିଳିଲା ସମାନ ଚିତ୍ର
କନକ ବ୍ୟୁରୋ : ପିପିଲିରେ ବ୍ୟାଙ୍କ ସାମନାରେ ଲାଗିଲା ଲଟକା । ବାତ୍ୟା ଫୋନିର ପ୍ରଳୟ କରି ଚାଲିଯିବା ପରେ ବ୍ୟାଙ୍କ ସାମନରେ ଏଭଳି ଅଭାବନୀୟ ଦୃଶ୍ୟ ଦେଖିବାକୁ ମିଳିଛି । ଲଟକାରେ ଲେଖା ଅଛି ଲିଙ୍କ ଫେଲଓର । ପାଣି ଓ ବିଜୁଳି ଭଳି ପୁରୀ ପିପିଲିରେ ବ୍ୟାଙ୍କ ସେବା ପ୍ରଭାବିତ ହୋଇଛି । ବ୍ୟାଙ୍କ ଖୋଲାଅଛି, କିନ୍ତୁ ଲିଙ୍କ ନଥିବାରୁ କର୍ମଚାରୀ ହାତ ବାନ୍ଧି ବସିଛନ୍ତି । ଏପରିକି ବ୍ୟାଙ୍କ ସାମନାରେ ଏହିଭଳି ଲିଙ୍କ ଫେଲଓର ବୋଲି ଲଟକା ଝୁଲାହୋଇଥିବାର ଦେଖିବାକୁ ମିଳିଛି । ଅନଲାଇନ୍ ଟଙ୍କା ଦେଣ ନେଣ ଠପ୍ ହୋଇଯାଇଛି । ସେପଟେ ସମସ୍ତ ଏଟିଏମ୍ରେ ବି ତାଲା ଝୁଲୁଛି । ଫଳରେ ନଗଦ ଟଙ୍କାର ଘୋର ଅଭାବ ଦେଖାଦେଇଛି । ବ୍ୟାଙ୍କ କାମ କେବେ ସ୍ୱାଭାବିକ ହେବ ତାହା ମଧ୍ୟ ଏବେ ଅସ୍ପଷ୍ଟ ରହିଛି ।
Kanak News is now on WhatsApp
Join and get latest news updates delivered to you via WhatsApp
ସେହିପରି ବାତ୍ୟା ପରେ ଅଧିକାଂଶ ପେଟ୍ରୋଲ ପମ୍ପ ବନ୍ଦ ରହିଥିବା ବେଳେ କିଛି ପେଟ୍ରୋଲ ପମ୍ପରେ ପେଟ୍ରୋଲ ପାଇଁ ଲୋକଙ୍କ ପ୍ରବଳ ଭିଡ ଜମୁଛି । ଭୁବନେଶ୍ୱର ପୁରୀ ରାସ୍ତାରେ ମଙ୍ଗଳପୁର ନିକଟସ୍ଥ ପେଟ୍ରୋଲ ପମ୍ପର କିଛି ଅଭାବନୀୟ ଦୃଶ୍ୟ କନକ ନ୍ୟୁଜ କ୍ୟାମେରାରେ କଏଦ ହୋଇଛି । ପେଟ୍ରେଲେ ପମ୍ପଟି ସାଧାରଣ ଲୋକଙ୍କ ପାଇଁ ବନ୍ଦ ରହିଛି । କିନ୍ତୁ କିଛି ବେପାରୀ ବଡ ବଡ ଜାର ଓ କେନ ଧରି ପେଟ୍ରୋଲ ପମ୍ପରୁ ପେଟ୍ରୋଲ ଓ ଡିଜେଲ ନେଉଥିବାର ଦେଖିବାକୁ ମିଳିଛି । ବାତ୍ୟା ବିପନ୍ନଙ୍କ ଦୂରାବସ୍ଥାର ସୁଯୋଗ ନେଇ ମାଲାମାଲ ହେବାକୁ ବସିଛନ୍ତି ଲାଭଖୋର ବ୍ୟବସାୟୀ । ପ୍ରଶାସନ ଏହା ଉପରେ ତୀକ୍ଷଣ ନଜର ରଖିବା ଜରୁରୀ ହୋଇପଡିଛି ।