ଦିଲ୍ଲୀ ପରେ ଓଡିଶାରେ ବାଣ ଫୁଟାଇବା ବନ୍ଦ କରିବାକୁ ହାଇକୋର୍ଟରେ ଦାଖଲ ହେଲା ଜନସ୍ୱାର୍ଥ ମାମଲା
କନକ ବ୍ୟୁରୋ : ଦିଲ୍ଲୀ ପରେ ମୁମ୍ବାଇ ଆଉ ଏବେ ଓଡ଼ିଶା । ଦୀପାବଳିରେ ବାଣ ଉପରେ କଟକଣା ନେଇ ସୃଷ୍ଟି ହୋଇଛି ଆଶଙ୍କା । ସୁପ୍ରିମକୋର୍ଟ ପ୍ରଦୁଷଣ କାରଣରୁ ଦିଲ୍ଲୀ ଓ ଏନସିଆରରେ ବ୍ୟାନ୍ ଲଗାଇଥିବା ବେଳେ ମୁମ୍ବାଇ ହାଇକୋର୍ଟ, ମହାରାଷ୍ଟ୍ରରେ ବାଣବିକ୍ରି ଉପରେ କଟକଣା ଲଗାଇଛନ୍ତି । ଆଉ ଆଜି ଓଡ଼ିଶା ହାଇକୋର୍ଟରେ ବାଣ ବନ୍ଦ ପାଇଁ ଦାଖଲ ହୋଇଛି ଜନସ୍ୱାର୍ଥ ମାମଲା ।
Kanak News is now on WhatsApp
Join and get latest news updates delivered to you via WhatsApp
ଆଲୋକର ପର୍ବ ଦୀପାବଳିକୁ ସୃଷ୍ଟି ହୋଇଛି ଏଭଳି କିଛି ଆଶଙ୍କା, କାହିଁକି ନା’ ଓଡ଼ିଶାରେ ବାଣ ଉପରେ କଟକଣା ଲଗାଇବା ନେଇ ହାଇକୋର୍ଟରେ ଦାଖଲ ହୋଇଛି ଜନସ୍ୱାର୍ଥ ମାମଲା । ପରିବେଶ ପ୍ରଦୁଷଣର କାରଣ ଦର୍ଶାଇ ହାଇକୋର୍ଟରେ ମାମଲା ଦାୟର କରିଛନ୍ତି ସମାଜସେବୀ ସୁରେନ୍ଦ୍ର ପାଣିଗ୍ରାହୀ । ଯେଉଁଥିରେ ମୁଖ୍ୟ ଶାସନ ସଚିବ,ଆଇନ ସଚିବ, ଗୃହ ସଚିବ ଏବଂ ପୁଲିସ ଡିଜିଙ୍କୁ ପକ୍ଷଭୁକ୍ତ କରାଯାଇଛି । ପ୍ରଦୁଷଣ ମୁକ୍ତ ଦୀପାବଳି ଲକ୍ଷ୍ୟରେ ସୋମବାର ଦିଲ୍ଲୀ ଏବଂ ଏନ୍ସିଆରରେ ବାଣ ଉପରେ କଟକଣା ଲଗାଇଛନ୍ତି ସୁପ୍ରିମକୋର୍ଟ । ଆଉ ଏହାର ଠିକ୍ ଗୋଟିଏ ଦିନ ପରେ ମୁମ୍ବାଇ ହାଇକୋର୍ଟ ଶୁଣାଇଛନ୍ତି ଏକ ଅନୁରୁପ ରାୟ । ସାରା ମହାରାଷ୍ଟ୍ରର ଜନବସତି ଅଂଚଳରେ ବାଣ ବିକ୍ରି ଉପରେ ରୋକ୍ ଲାଗାଇଛନ୍ତି । ଏମିତିକି ପୂର୍ବରୁ ବାଣବିକ୍ରି ପାଇଁ ଦିଆଯାଇଥିବା ଲାଇସେନ୍ସକୁ ରଦ୍ଧ କରିବା ପାଇଁ ନିର୍ଦ୍ଦେଶ ଦେଇଛନ୍ତି । ଏପଟେ ଓଡ଼ିଶାରେ, ହାଇକୋର୍ଟ ସମାନଧରଣର ନିଷ୍ପତ୍ତି ନିଅନ୍ତୁ ବୋଲି ଦାଖଲ ହୋଇଛି ଜନସ୍ୱାର୍ଥ ମାମଲା ।
ସୁପ୍ରିମକୋର୍ଟଙ୍କ ନିର୍ଦ୍ଦେଶ ପରେ ସାରା ଦେଶରେ ବାଣ ଉପରେ ଲାଗିଥିବା କଟକଣାକୁ ନେଇ ବିଭିନ୍ନ ପ୍ରତିକ୍ରିୟା ପ୍ରକାଶ ପାଉଛି । ବିଶିଷ୍ଟ କଥାକାର ଚେତନ ଭଗତ ଏହାକୁ ଖୋଲାଖୋଲି ବିରୋଧ କରିବା ସହ ଏହି ନିଷ୍ପତ୍ତିି ବିରୁଦ୍ଧରେ ଛିଡା ହେବା ପାଇଁ ଆହ୍ୱାନ ଦେଇଛନ୍ତି ।
ଏବେ ପ୍ରଶ୍ନ ଉଠୁଛି-
– ପ୍ରଦୁଷଣ ପାଇଁ ଦୀପାବଳିକୁ ଦାୟୀ କରାଯାଇ ପାରିବ କି ?
– ସଂସ୍କୃତି ଓ ପରମ୍ପରାକୁ କଟକଣା ଦ୍ୱାରା ବାନ୍ଧି ହେବ କି ?
– ନ୍ୟାୟିକ କଟକଣା ବଦଳରେ ଆଉ କୌଣସି ବାଟ ନାହିଁ କି ?