ଗୋଟିଏ ହାତ ନାହିଁ, ଅନ୍ୟଟି ଅଚଳ । ଅକ୍ଷମତା ସତ୍ୱେ ଘାରିଛି ପାଠ ପଢିବାର ନିଶା । ପାଦରେ ଲେଖି ମାଟ୍ରିକ ପରୀକ୍ଷା ଦେବାକୁ ପ୍ରସ୍ତୁତ ହେଉଛନ୍ତି ମହେଶ ।
କନକ ବ୍ୟୁରୋ: ମୁଁ ପାଠ ପଢିବି, ବଡ ମଣିଷ ହେବି… ଅଭାବ, ଅନଟନ ଭିତରେ ବି ଆଗକୁ ବଢିବି… ଆସୁ ଯେତେ ଝଡ, ହଉ ଯେତେ ଯନ୍ତ୍ରଣା, ସମୟ ସହ ସାଲିସ ନକରି ସଙ୍ଘର୍ଷ କରିବି, ସଫଳ ହେବି । ହାତ ନଥାଉ, ପାଦରେ ଲେଖି ମୁଁ ପରୀକ୍ଷା ଦେବି, ମାଟ୍ରିକ ପାସ୍ କରିବି… ମୁଁ ଜିତିବି, ନିଶ୍ଚୟ ଜିତିବି…
Kanak News is now on WhatsApp
Join and get latest news updates delivered to you via WhatsApp
କୁହାଯାଏ ଦୃଢ ଇଚ୍ଛା ଶକ୍ତି ଆଗରେ ଅସମ୍ଭବ ବି ସମ୍ଭବ ହୁଏ । ଆଉ ଯଦି ନିଷ୍ଠାର ସହ ଉକ୍ତ କାମକୁ କରାଯାଏ ତେବେ ସଫଳତା ତୁମ ପାଖକୁ ଦୌଡି ଦୌଡି ଆସିବ । ଏ କଥାକୁ କାମରେ କରିଦେଖାଇଛନ୍ତି ଅମ୍ବିକାପୁର ଡିଗମା ପଞ୍ଚାୟତର ଦିବ୍ୟାଙ୍ଗ ଛାତ୍ର ମହେଶ । ଦଶମ ଶ୍ରେଣୀର ଛାତ୍ର ମହେଶ ଜନ୍ମରୁ ଦିବ୍ୟାଙ୍ଗ । ତାଙ୍କର ଗୋଟିଏ ହାତ ନାହିଁ ଆଉ ଅନ୍ୟ ହାତଟି ଅଚଳ । ହେଲେ ପାଠ ପ୍ରତି ମହେଶଙ୍କ ଅହେତୁକ ରୁଚି ତାଙ୍କୁ ସବୁ କଷ୍ଟ ଭିତରେ ଆଗକୁ ଯିବାକୁ ପ୍ରେରଣା ଦେଉଛି ।
ସେପଟେ ପିଲା ବେଳୁ ବାପାଙ୍କୁ ହରାଇଛନ୍ତି ମହେଶ । ଅନେକ ଦୁଃଖ ଅଭାବ ଭିତରେ ବି କେବେ ହାରି ଯାଇ ନାହାନ୍ତି କି ନିଜ ଉପରୁ ବିଶ୍ୱାସ ହରାଇ ନାହାନ୍ତି ଦିବ୍ୟାଙ୍ଗ ଛାତ୍ର । ଗରିବର ଗଳିରୁ ୯ମ ଯାଏଁ ପାଠ ଶେଷ କରିବା ପରେ ଏବେ ସେ ମାଟ୍ରିକ ପରୀକ୍ଷା ଦେବାକୁ ପ୍ରସ୍ତୁତ ହେଉଛନ୍ତି । ହାତ ନଥିବା ସତ୍ୱେ ବି ପାଦରେ ପରୀକ୍ଷା ଦେଇ ପାସ୍ କରିବେ ବୋଲି ଦମ୍ଭର ସହ କହିଛନ୍ତି ମହେଶ ।
ପ୍ରଥମେ ପ୍ରଥମେ ଗୋଡରେ ଲେଖିବା କଷ୍ଟ ହେଉଥିଲା ମାତ୍ର ଏବେ ଅଭ୍ୟାସରେ ପରିଣତ ହୋଇଗଲାଣି । ତେବେ ଭାଗ୍ୟ, ଭଗବାନ, ସମୟ ଆଗରେ ହାର ନମାନି ମହେଶ କୁହନ୍ତି. ଭଗବାନ ସିନା ହାତ ଦେଲେନି, ହେଲେ ଗୋଡ ଦେଇଛନ୍ତି । ଯାହା ମତେ ପରୀକ୍ଷା ଦେବାରେ ସହଯୋଗ କରୁଛି । ଦିବ୍ୟାଙ୍ଗ ଛାତ୍ରଙ୍କ ଏଭଳି ନିଷ୍ଠା ଦେଖି ଯେକେହି ବି କହିବେ ଭଗବାନ ମହେଶକୁ ଶକ୍ତି ଦିଅନ୍ତୁ ଆଉ ସେ ପାଦରେ ଲେଖି ପାସ କରନ୍ତୁ ।