ଜଟିଳ ହେଉଛି ଫୁଲବାଣୀ ରାଜନୀତି । ୩ ଦଳରେ ମାଳମାଳ ଆଶାୟୀ, ବିଜେଡି ଗଡ଼ ଭାଙ୍ଗିବାକୁ ବିରୋଧୀଙ୍କ ରଣନୀତି ।
ଫୁଲବାଣୀ ନିର୍ବାଚନମଣ୍ଡଳୀରେ ରାଜନୈତିକ ବାତାବରଣ ବେଶ୍ ଉଷ୍ମ ହେବାରେ ଲାଗିଛି ।
କନକ ବ୍ୟୁରୋ: ସାରା ରାଜ୍ୟରେ ଏବେ ବହୁଛି ସାଧାରଣ ନିର୍ବାଚନୀ ହାୱା । ଏନେଇ ମଧ୍ୟ କନ୍ଧମାଳ ଜିଲ୍ଲାର ଫୁଲବାଣୀ ନିର୍ବାଚନମଣ୍ଡଳୀରେ ରାଜନୈତିକ ବାତାବରଣ ବେଶ୍ ଉଷ୍ମ ହେବାରେ ଲାଗିଛି । ବିଜେଡିର ଗଡ କୁହାଯାଉଥିବା ଏହି ନିର୍ବାଚନମଣ୍ଡଳୀରେ ପ୍ରମୁଖ ୩ ଦଳ ବିଜେଡି, କଂଗ୍ରେସ ଓ ବିଜେପି ଆସନ୍ତା ନିର୍ବାଚନ ପାଇଁ ବଭିନ୍ନ କାର୍ଯ୍ୟକ୍ରମ ଜରିଆରେ ଭୋଟ୍ ହାତେଇବାକୁ ବଳ କଷୁଛନ୍ତି । କିନ୍ତୁ ଚଳିତ ଥର ପୁଣି ବିଜେଡି ଏଠାରେ ବାଜିମାତ କରିବାକୁ ଲକ୍ଷ୍ୟ ରଖିଥିବାବେଳେ ଏଥିରେ ବ୍ରେକ୍ ଲଗାଇବାକୁ ବିରୋଧୀ ବିଜେପି ଓ କଂଗ୍ରେସ ରଣନୀତି ପ୍ରସ୍ତୁତ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଗତ ନିର୍ବାଚନର ବିଜେତା ତଥା ବିଜେଡି ବିଧାୟକ ଦୁଗୁନି କହଁର ଚଳିତ ଥର ପୁଣି ପ୍ରର୍ଥୀ ହେବାକୁ ଆଶାୟୀ ରହିଛନ୍ତି । ତାଙ୍କ ବ୍ୟତୀତ ପୂର୍ବତନ ବିଧାୟକ ଦେବେନ୍ଦ୍ର କହଁର, ପୂର୍ବତନ ନଗରପାଳ ରାଜେନ୍ଦ୍ର କହଁର, ଖଜୁରିପଡା ପଞ୍ଚାୟତ ସମିତି ଅଧ୍ୟକ୍ଷ ଭାବେ ନିର୍ବାଚିତ ହୋଇଥିବା ବୀରେନ୍ଦ୍ର କହଁରଙ୍କ ବି ପ୍ରାର୍ଥୀ ଦୌଡରେ ଅଛନ୍ତି । ଜିଲ୍ଲା ପରିଷଦ ସଦସ୍ୟା ଜୟଶ୍ରୀ କହଁର,ଫିରିଙ୍ଗିଆ ପଞ୍ଚାୟତ ସମିତି ଅଧ୍ୟକ୍ଷ ଲାଲନନ୍ଦ ପ୍ରଧାନ ମଧ୍ୟ ଆଶାୟୀ ଥିବା କୁହାଯାଉଛି। ଯଦି ମହିଳାଙ୍କ ପାଇଁ ସଂରକ୍ଷଣ ନିଷ୍ପତ୍ତି ନିଆଯାଏ , ତେବେ ବିଜେଡି ମହିଳା ଜିଲ୍ଲା ସଭାନେତ୍ରୀ ଅନିମା କହଁରଙ୍କ ନାଁ ବିଜେଡି ଆଶାୟୀ ପ୍ରାର୍ଥୀ ତାଲିକାରେ ଯୋଡ଼ି ହେଉଥିବା ଚର୍ଚ୍ଚା ହେଉଛି ।
ଅନ୍ୟପଟେ ଏହି ଆସନକୁ ଆସନକୁ କବଜା କରିବା ପାଇଁ ଜି-ଜାନ୍ ଲଗେଇଦେଇଛି ବିଜେପି । ନିର୍ବାଚନ ମଣ୍ଡଳୀରେ କେନ୍ଦ୍ରରେ ଥିବା ବିଜେପି ସରକାରର ବିଭିନ୍ନ ଯୋଜନାର ସଫଳତାକୁ ବଖାଣି ଭୋଟ୍ ହାତେଇବାକୁ ଯୋଜନା କରୁଛି ବିଜେପି । ତେଣୁ ବିଜେପିରୁ ଗତଥର ପ୍ରାର୍ଥୀ ଦେବନାରାୟଣ ପ୍ରଧାନଙ୍କୁ ଏଥର ମଧ୍ୟ ଟିକେଟ୍ ମିଳିପାରେ ବୋଲି ଆଶାବାଦୀ ଅଛନ୍ତି । ସେହିଭଳି ଅନ୍ୟ ଆଶାୟୀଙ୍କ ମଧ୍ୟରେ ବର୍ତ୍ତମାନ ଜିଲ୍ଲା ପରିଷଦ ସଭ୍ୟ ଥିବା ମକରଧ୍ବଜ ମଲ୍ଲିକ, ରଘୁପତି କହଁର, ପବିତ୍ର କହଁର ଏବଂ ଗୋଲକ ବିହାରୀ କହଁର ପ୍ରମୁଖ ଆଶାୟୀ ଦୌଡରେ ଅଛନ୍ତି । ଦେଖିବାର ବିଷୟ ବିଜେପି ନେତୃବୃନ୍ଦ କାହା ଉପରେ ବିଶ୍ୱାସ ରଖି ଫୁଲବାଣୀ ଆସନକୁ କବଜା କରିବାରେ ସକ୍ଷମ ହୋଇପାରିବେ ।
ସେହିଭଳି ଉଭୟ ବିଜେଡି ଓ ବିଜେପିକୁ ମାତ୍ ଦେଇ ବିଜୟ ତିଳକ ପିନ୍ଧିବା ପାଇଁ କଂଗ୍ରେସ କସରତ କରୁଥିବା ଦେଖିବାକୁ ମିଳିଛି । ସେହି ମର୍ମରେ କଂଗ୍ରେସ ଏଥର ନୂଆ ମୁହଁ ଖୋଜୁଛି । ଏହି ତାଲିକାରେ ପ୍ରଥମରେ ଅଛନ୍ତି ପିସିସି ସମ୍ପାଦକ ଘନ କୁମାର ଶବର । ଗତଥରର ପ୍ରାର୍ଥୀ ସୁଦର୍ଶନ କହଁର , କିଶୋର କହଁର, ମହେନ୍ଦ୍ର ମଲ୍ଲିକ ଏବଂ କଂଗ୍ରେସ ମହିଳା ଜିଲ୍ଲା ସଭାନେତ୍ରୀ ଜାନକୀ ପ୍ରଧାନଙ୍କ ନାଁ ମଧ୍ୟ କଂଗ୍ରେସର ଆଶାୟୀ ପ୍ରାର୍ଥୀ ତାଲିକା ଦୌଡ଼ରେ ଥିବା ଶୁଣିବାକୁ ମିଳୁଛି ।