କନକ ବ୍ୟୁରୋ: ପୁରୀ ଜିଲ୍ଲା ଗୋପରେ ତୈଳ ଓ ପ୍ରାକୃତିକ ଗ୍ୟାସ୍ ସନ୍ଧାନ ମିଳିବା ପରେ ଖନନ ପ୍ରକ୍ରିୟା ଆରମ୍ଭ ହୋଇଛି । ୪ଟି ରାଜ୍ୟରୁ ୧୧ଟି ଅତ୍ୟାଧୁନିକ ମେସନ ସହ ଖନନ ପାଇଁ ଆବଶ୍ୟକୀୟ ସାମଗ୍ରୀ ପହଞ୍ଚିଛି । ଆଗକୁ ଆହୁରି ମେସନ୍ ଆସିବ । ମାସେ ଭିତରେ କୁଶୁପୁରର ଚିହ୍ନଟ ଅଞ୍ଚଳରୁ ମେସିନ ଦ୍ୱାରା ଖୋଳି ମାଟିତଳର ପଙ୍କ ଓ ମାଟି, ବାଲିକୁ ନିଆଯାଇ ରିଫାଇନ କରାଯିବ ବୋଲି ଅଏଲ ଇଣ୍ଡିଆ ପକ୍ଷରୁ କୁହାଯାଇଛି । ମାଟି, ବାଲିକୁ ରିଫାଇନ କରିବା ପରେ ମାଟି ତଳେ ତୈଳ ଓ ପ୍ରାକୃତିକ ଗ୍ୟାସ ଅଛି ନା ନାହିଁ ସ୍ପଷ୍ଟ ହେବ ।
ଗୋପ ବ୍ଲକରେ ଅଏଲ ଇଣ୍ଡିଆର ସର୍ଭେରେ କୁଶୁପୁରରେ ତୈଳ ଓ ପ୍ରାକୃତିକ ଗ୍ୟାସର ସନ୍ଧାନ ମିଳିବା ପରେ ଆରମ୍ଭ ହୋଇଛି ଖନନ ପ୍ରକ୍ରିୟା । ସେଇଥି ପାଇଁ ୪ଟି ରାଜ୍ୟରୁ ୧୧ଟି ଅତ୍ୟାଧୁନିକ ମେସିନ କୁଶୁପୁରକୁ ପହଞ୍ଚିବା ପରେ ଅଞ୍ଚଳରେ ଖୁସିର ଲହରି ଖେଳିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଖନନ କାମ ସହ ବିଶୋଧନ ପାଇଁ ଆନ୍ଧ୍ର ପ୍ରଦେଶ, କର୍ଣ୍ଣାଟକ, ମହାରାଷ୍ଟ୍ର ସହିତ ଆଉ କିଛି ରାଜ୍ୟରୁ ଅତ୍ୟାଧୁନିକ ମେସିନ୍ ଅଣାଯାଇଛି । କୁଶୁପୁର ଅଞ୍ଚଳର ୮ ଏକର ଚିହ୍ନଟ ଜମିରେ ପେଟ୍ରୋଲ ଓ ପ୍ରାକୃତିକ ଗ୍ୟାସର ଅନୁସନ୍ଧାନ ପାଇଁ ଆସନ୍ତା ଏକ ମାସ ଭିତରେ ଖୋଳା କାମ ଆରମ୍ଭ ହେବ । ଏଥିପାଇଁ ୩୭ ଜଣ ଚାଷୀଙ୍କ ଜମିକୁ ୯୭ ଲକ୍ଷ ଟଙ୍କା ଦେଇ ଲିଜରେ ନେଇଛି ଅଏଲ ଇଣ୍ଡିଆ କମ୍ପାନୀ ।
କୁଶୁପୁର ଅଞ୍ଚରୁ ପେଟ୍ରୋଲ ବାହାରିଲେ ସ୍ଥାନୀୟ ଲୋକଙ୍କୁ ନିଯୁକ୍ତି ମିଳିବ, ଅଞ୍ଚଳର ବିକାଶ ହେବ । ଏହା ରାଜ୍ୟର ଅର୍ଥନୀତିକୁ ମଧ୍ୟ ସୁଦୃଢ କରିବାରେ ସହାୟକ ହେବ । ଏବେ ଖନନ ପାଇଁ ଅତ୍ୟାଧୁନିକ ମେସିନ ଆସିବା ପରେ ଖୁବ ଶୀଘ୍ର ମାଟି ତଳୁ ପେଟ୍ରୋଲ ବାହାରିବା ଆଶା ସଂଚାର ହୋଇଛି ।
ପୂର୍ବରୁ ଗୋପ ବ୍ଲକର କୁଶୁପୁର, ମହଲପଡା ପଞ୍ଚାୟତର ଚିତ୍ରା ଗାଁରେ ୨ଟି ପର୍ଯ୍ୟାୟରେ ଖୋଳିବା କାମ କରାଯାଇଥିଲା । କୁଶୁପୁରରେ ଖନନ ପାଇଁ ପ୍ରକ୍ରିୟା ଆରମ୍ଭ ହୋଇଥିବା ବେଳେ ଚିତ୍ରା ଗାଁରେ ବର୍ତମାନ ସୁଦ୍ଧା ଖନନ କାମ ଆରମ୍ଭ ହୋଇନାହିଁ ।