ଚାଲିଗଲା ବାତ୍ୟା ‘ୟାସ’ । ଘର ବାହୁଡିଲେ ଉପକୂଳିଆ ଲୋକ ।
କନକ ବ୍ୟୁରୋ : ବାତ୍ୟା ୟାସ୍ ଆସିଲା ଓ ଏହାର ଛାପ ଛାଡି ଚାଲିଗଲା । ଏହା ପରେ ଆରମ୍ଭ ହୋଇଛି ବାତ୍ୟା ପରର ପୁନରୁଦ୍ଧାର କାମ । ଆଉ ସେପଟେ ଘରବାହୁଡା ଆରମ୍ଭ କରିଛନ୍ତି ବାତ୍ୟା ଆଶ୍ରୟସ୍ଥଳରେ ମୁଣ୍ଡ ଗୁଞ୍ଜିଥିବା ଲୋକ । ବାତ୍ୟା ଯିବା ପରେ ଲୋକଙ୍କ ଘର ବାହୁଡା ଭିତରେ ମନରେ ସୃଷ୍ଟି ହୋଇଛି ଅନେକ ଆଶଙ୍କା ।
Kanak News is now on WhatsApp
Join and get latest news updates delivered to you via WhatsApp
ସାମୁଦ୍ରିକ ବାତ୍ୟା ୟାସ୍ ଅତିକ୍ରମ କରିବା ପରେ ବାତ୍ୟା ଆଶ୍ରୟସ୍ଥଳରେ ମୁଣ୍ଡ ଗୁଞ୍ଜିଥିବା ଲୋକ ଏବେ ଆଶ୍ୱସ୍ତ ଅନୁଭବ କରୁଛନ୍ତି । ୧୯୯୯ ମହାବାତ୍ୟାରେ ଛାରଖାର ହୋଇଯାଇଥିବା ଜଗତସିଂହପୁରର ଷଣ୍ଢକୁଦ ଅଂଚଳ ବାସିନ୍ଦାଙ୍କ ପାଇଁ ବାତ୍ୟା ଆସିଲେ ବିପଦ ମାଡି ଆସେ । ବାତ୍ୟା ଆଶ୍ରୟ ସ୍ଥଳରେ ରାତି କାଟିବା ପରେ କଟିଯାଇଛି ବିପଦ । ଆଉ ଏବେ ଘର ବାହୁଡାର ସମୟ । ପ୍ରଶାସନ ବାତ୍ୟା ଆଶ୍ରୟସ୍ଥଳରେ ସମସ୍ତ ବ୍ୟବସ୍ଥା କରିଥିବାରୁ ସଭିଏଁ ଖୁସିଖୁସିରେ ଘରକୁ ଫେରୁଛନ୍ତି ।
କିଏ ସାଇକେଲରେ ଘରୁ ବୋହି ଆଣିଥିବା ଜରୁରୀ ଜିନିଷକୁ ବାନ୍ଧି ପକାଉଛି, ତ କିଏ ମୁଣ୍ଡରେ ବୋହି ବୋହି ନିଜେ ଘରକୁ ବାହାରିଛି । ସମସ୍ତଙ୍କ ନଜର ଏବେ କେମିତି ପହଞ୍ଚିବେ ଘରେ । କାରଣ ଟଳିଯାଇଛି ବାତ୍ୟା ବିପଦ । ଆଉ ବିଶେଷ କିଛି କ୍ଷତି ବି ହୋଇନି । ଜିଲ୍ଲାରେ ଏମିତି ପ୍ରାୟ ୨୨ ହଜାରରୁ ଅଧିକ ଲୋକଙ୍କୁ ବାତ୍ୟା ଆଶ୍ରୟସ୍ଥଳକୁ ଆଣିଥିଲା ପ୍ରଶାସନ । ଏହାରି ବଳରେ ବାତ୍ୟା ବିପଦକୁ ଟାଳି ଦେବାରେ ସଫଳ ହୋଇଛି ପ୍ରଶାସନ । ବାତ୍ୟା ସହିତ ଅଭ୍ୟସ୍ତ ହୋଇଥିବା ଏହି ଗ୍ରାମବାସୀଙ୍କୁ ଆଗୁଆ ବାତ୍ୟା ଆଶ୍ରୟସ୍ଥଳକୁ ଆଣିଥିଲା ପ୍ରଶାସନ । ହେଲେ ବାତ୍ୟା ଯିବାପରେ ଏବେ ସମସ୍ତେ ନିଜ ଆଡୁ ଆରମ୍ଭ କରିଦେଇଛନ୍ତି ଘରବାହୁଡା ।