ପଞ୍ଚାୟତ ରାଜନୀତି ତାତି: ବିଧାୟକଙ୍କୁ ଗ୍ରାମବାସୀଙ୍କ ପ୍ରଶ୍ନ, ଅଢ଼େଇ ବର୍ଷରେ କେତେ ଥର ଆସିଛ?
କନକ ବ୍ୟୁରୋ: ତ୍ରୀସ୍ତରୀୟ ପଂଚାୟତ ନିର୍ବାଚନ ପାଇଁ ପ୍ରାର୍ଥୀପତ୍ର ଦାଖଲ ପରେ ପ୍ରାର୍ଥୀମାନେ ପ୍ରଚାର ଆରମ୍ଭ କରି ଦେଇଛନ୍ତି । ଶୋଭାଯାତ୍ରା, ସମାବୋ ଉପରେ କଟକଣା ଲାଗିଥିବାରୁ ଘର ଘର ବୁଲି ପ୍ରଚାର କରୁଛନ୍ତି ପ୍ରାର୍ଥୀ ଓ ନେତା । ହେଲେ, ଦୀର୍ଘ ଦିନ ହେବ ଗାଁକୁ ଆସୁନଥିବାରୁ ଓ ନିର୍ବାଚନରେ ସମୟରେ ଆସିଥିବାରୁ କେତେକ ସ୍ଥାନରେ ହଟହଟା ହୋଇଛନ୍ତି ନେତା ।
Kanak News is now on WhatsApp
Join and get latest news updates delivered to you via WhatsApp
ନିଜ ନିର୍ବାଚନ ମଣ୍ଡଳୀରେ ପ୍ରଚାର କରିବାକୁ ଯାଇଥିବାବେଳେ ଗ୍ରାମବାସୀଙ୍କ ପ୍ରଶ୍ନବାଣରେ ଘାଇଲା ହୋଇଛନ୍ତି ଦଶପଲ୍ଳା ବିଧାୟକ ରମେଶ ବେହେରା । ବିଧାୟକ ଦଶପଲ୍ଲା ବ୍ଲକ ଅଧକ୍ଷଙ୍କ ସ୍ୱାମୀ ଉପେନ୍ଦ୍ର ସାହୁ ଓ କର୍ମୀମାନଙ୍କ ସହ ତାଙ୍କ ନିର୍ବାଚନ ମଣ୍ଡଳିରେ ଥିବା କ୍ରୁଜିମେଣ୍ଢି ପଂଚାୟତକୁ ଯାଇଥିଲେ । ବିଧାୟକ ପହଁଚିବା ପରେ ବସିବାକୁ ଲୋକେ ଚେୟାର ଦେଇଥିଲେ । ହେଲେ, ତାପରେ ଦେଖିବାକୁ ମିଳିଥିଲା ଗ୍ରାମବାସୀଙ୍କ ଭିତରେ ଥିବା ଅସନ୍ତୋଷ । ନିର୍ବାଚନ ପରେ ଅଢ଼େଇ ବର୍ଷ ମଧ୍ୟରେ କେତେ ଥର ଆସିଛ ବୋଲି ପଚାରିବା ସହ ଏବେ କାହିଁକି ଆସିଛ ବୋଲି ପ୍ରଶ୍ନ କରିଥିଲେ । କହିଥିଲେ, ପ୍ରତିଶ୍ରୁତି ଦରକାର ନାହିଁ କାମ ଦରକାର ।
ଚାଳ ଛପର ଘରର ମାଟି କାଂଥରେ ଲାଗିଛି ପୋଷ୍ଟର । ଆଉ ପୋଷ୍ଟରରେ ପଂଚାୟତରେ ପ୍ରାର୍ଥୀ ହୋଇଥିବା ନେତାଙ୍କୁ ଚେତାବନୀ ଦେଇଛନ୍ତି ଭୋଟର । ପୋଷ୍ଟରରେ ଲେଖା ହୋଇଛି ଆଉ ମିଛ ପ୍ରତିଶ୍ରୁତି ଚଳିବ ନାହିଁ । ଯଦି ଘର ଖଣ୍ଡିଏ ଦେଲ ନାହିଁ ତାହେଲେ ଭୋଟ ମାଗିବା ପାଇଁ ମଧ୍ୟ ଆମ ଦୁଆରକୁ ଆସନ୍ତୁ ନାହିଁ । ତ୍ରିସ୍ତରୀୟ ପଂଚାୟତ ନିର୍ବାଚନ ପାଇଁ ଗାଁ ରାଜନୀତି ଚଳଚଂଚଳ ହୋଇଥିବା ବେଳେ ଏମିତି ଦୃଶ୍ୟ ଆସିଛି ପୁରୀ ଜିଲ୍ଲା କୃଷ୍ଣପ୍ରସାଦ ବ୍ଲକର ଜହ୍ନବୁଢି ଗାଁରୁ ।
ଘଷିପୁରା ବିଧାୟକ ବଦ୍ରି ପାତ୍ରଙ୍କ ପୁଅ ଦେବାଶିଷ ପାତ୍ରଙ୍କ ଦାଦାଗିରିର ଭିଡିଓ ଅନେକ ସମୟରେ ସାମ୍ନାକୁ ଆସେ । ଏବେ ମଣ୍ଡିରେ ଧାନ ଉଠାକୁ ନେଇ ପୁଣିଥରେ ବିବାଦକୁ ଆସିଛନ୍ତି ଦେବାଶିଷ । କେନ୍ଦୁଝର ଜିଲ୍ଲା ରାମଚନ୍ଦ୍ରପୁର ଥାନା ଗଡବାନ୍ଧଗୋଡା ସମବାୟ ସମିତିରେ ନିର୍ଦ୍ଦିଷ୍ଟ କିଛି ବ୍ୟକ୍ତିଙ୍କ ଧାନ ମଣ୍ଡିରେ ନଉଠିବାକୁ ନେଇ ଧମକ ଚମକ ଦେଉଥିବା ଭିଡିଓ ଭାଇରାଲ ହେଉଛି । ଦେବାଶିଷଙ୍କ ଏଭଳି କାର୍ଯ୍ୟକୁ କିଛି ଗ୍ରାମବାସୀ ବିରୋଧ କରିବାରୁ ସେ ଚାଲିଯାଇଥିଲେ । କିନ୍ତୁ ପରେ ପୁଣି ନିଜ ସମର୍ଥକଙ୍କୁ ଧରି ପହଁଚିବାରୁ ଉତେଜନାମୂଳକ ପରିସ୍ଥିତି ସୃଷ୍ଟି ହୋଇଥିଲା । ଦେବାଶିଷଙ୍କ ସମର୍ଥକ ଓ ବିରୋଧୀ ମୁହାଁମୁହିଁ ହୋଇଥିଲେ । ଘଟଣାକୁ ଗାଁରେ ଚାପା ଉତେଜନା ଲାଗି ରହିଛି ।