ବିରୋଧ ପରେ ବୁଦ୍ଧି ପଶିଲା । ସମ୍ବିତ କହିଲେ ପୁରୀ ପାଇଁ ମୁଁ ପାଇଛି ପରିଚୟ, ଲେଖାଶ୍ରୀଙ୍କ ବିବାଦୀୟ ବୟାନକୁ ନେଇ ଖୋଲିଲେନି ମୁହଁ ।
କନକ ବ୍ୟୁରୋ : ଦୁଇ ଦିନର ବିରୋଧ, ରାସ୍ତାରେ କୁଶପୁତ୍ତଳିକା ଦାହ ସାଙ୍ଗକୁ ଗିରଫ ଦାବି । ଆଉ ସୋସିଆଲ ମିଡିଆରେ ଲୋକଙ୍କ ଆକ୍ରୋଶ ଦେଖିବା ପରେ ବିଜେପି ନେତା ସମ୍ବିତ ପାତ୍ରଙ୍କର ବୁଦ୍ଧି ପଶିଛି । ସମ୍ବିତଙ୍କ ପାଇଁ ପୁରୀକୁ ଦେଶବାସୀ ଚିହ୍ନିଲେ ବୋଲି ଲେଖାଶ୍ରୀ ଦେଇଥିବା ବିବାଦୀୟ ବୟାନକୁ ଓଡ଼ିଶାରୁ ପ୍ରତିବାଦର ସ୍ୱର ଉଠିବା ପରେ ମୁହଁ ଖୋଲିଛନ୍ତି ସମ୍ବିତ । ଏକ ଭିଡ଼ିଓ ଜାରି କରି ସମ୍ବିତ କହିଛନ୍ତି, ପୁରୀ ପାଇଁ ମୁଁ ପରିଚିତ ହୋଇଛି । ପୁରୀରୁ ନିର୍ବାଚନ ଲଢିବା ପରେ ମୋତେ ଲୋକେ ଚିହ୍ନିଲେ । ଏଭଳି କହି ହୁଏତ ସମ୍ବିତ ଲୋକଙ୍କ ଭିତରେ ଥିବା ଆକ୍ରୋଶକୁ ପ୍ରଶମିତ କରିବାକୁ ଉଦ୍ୟମ କରିଥାଇପାରନ୍ତି କିନ୍ତୁ ଜଗନ୍ନାଥଧାମକୁ ନେଇ ଲେଖାଶ୍ରୀ ଯେଉଁ ବିବାଦୀୟ ବୟାନ ଦେଇଥିଲେ ସେ ବାବଦରେ ମୁହଁ ଖୋଲିନାହାନ୍ତି ବିଜେପିର ରାଷ୍ଟ୍ରୀୟ ମୁଖପାତ୍ର ।
Kanak News is now on WhatsApp
Join and get latest news updates delivered to you via WhatsApp
ଦୁଇ ଦିନ ପୂର୍ବେ ଲେଖାଶ୍ରୀ ଯେଉଁ ବିବାଦୀୟ ବୟାନ ଦେଇଥିଲେ ତାହାକୁ ନେଇ ସମ୍ବିତ ପାତ୍ରଙ୍କ ଉପରେ ବର୍ଷିଥିଲେ ଓଡ଼ିଶାବାସୀ । ଲେଖାଶ୍ରୀ ଶ୍ରୀକ୍ଷେତ୍ରଧାମକୁ ନେଇ ବିବାଦୀୟ ବୟାନ ଦେଉଥିବା ବେଳେ ସମ୍ବିତ ନତମସ୍ତକ ହୋଇ ଚୁପ୍ ରହିବାକୁ ସହଜରେ ଗ୍ରହଣ କରିପାରିନଥିଲେ ଜଗନ୍ନାଥପ୍ରେମୀ । ଯେଉଁଥିପାଇଁ ଲେଖାଶ୍ରୀଙ୍କ ସହ ସମ୍ବିତଙ୍କ କୁଶପୁତ୍ତଳିକା ଦାହ କରାଯାଇ ଗିରଫ କରିବାକୁ ଦାବି ଉଠିଥିଲା । ଆଉ ଏଭଳି ସ୍ଥିତିରେ ବିବାଦର ବୁଢିଆଣୀ ଜାଲରୁ ମୁକୁଳିବା ପାଇଁ ଗଳାବାଟ ଆପଣାଇଛନ୍ତି ସମ୍ବିତ । ସାପ ମରିଯିବ କିନ୍ତୁ ବାଡି ଭାଙ୍ଗିବନି ନ୍ୟାୟରେ ଲେଖାଶ୍ରୀଙ୍କ ବୟାନକୁ ନିନ୍ଦା କରିବା ବଦଳରେ ପୁରୀ ପାଇଁ ସେ ପରିଚୟ ପାଇଛନ୍ତି ବୋଲି କହି ନିଜକୁ ଏହି ବିବାଦରୁ ଦୂରେଇବାକୁ ପ୍ରୟାସ କରିଛନ୍ତି ସମ୍ବିତ ।
ଯେତେବେଳେ ବିଜେପିର ଅନ୍ୟ ନେତା ଲେଖାଶ୍ରୀଙ୍କ ବିବାଦୀୟ ବୟାନକୁ ନିନ୍ଦା କରୁଛନ୍ତି ସେତେବେଳେ ସମ୍ବିତ କାହିଁକି ପଛଘୁଞ୍ଚା ଦେଉଛନ୍ତି? ଲେଖାଶ୍ରୀଙ୍କ ବୟାନକୁ ନିନ୍ଦା ନ କରି ଓଡ଼ିଶାବାସୀଙ୍କୁ କଣ ବାର୍ତ୍ତା ଦେବାକୁ ଚାହୁଁଛନ୍ତି ସମ୍ବିତ । ଆଗକୁ ରହିଛି ପିପିଲି ଉପନିର୍ବାଚନ । ଲେଖାଶ୍ରୀଙ୍କ ବିବାଦୀୟ ବୟାନକୁ ପ୍ରସଙ୍ଗ କରିପାରନ୍ତି ବିଜେଡି ଓ କଂଗ୍ରେସ । ଯାହା ଉଭୟ ସମ୍ବିତ ଓ ଦଳ ପାଇଁ ଅଡୁଆ ସୃଷ୍ଟି କରିପାରେ । ତେଣୁ ଏଭଳି ସ୍ଥିତିରେ ଦିଲ୍ଲୀରୁ ଭିଡ଼ିଓ ବାର୍ତ୍ତା ଜାରି କରି ବିବାଦରୁ ବଞ୍ଚିବାକୁ ପ୍ରୟାସ କରିଛନ୍ତି ସମ୍ବିତ ।