ଦାଦନ ଯାଉଛି ଓଡ଼ିଆ ପୁଅ, ବନ୍ଦ ପଡ଼ିଛି ଓଡିଶାର ଶିଳ୍ପ । ଜଗତସିଂହପୁର ଜିଲ୍ଲାର ଶାରଳା ସୂତାକଳ ଚାଲୁ କରିବା ପାଇଁ ଦାବି ଉଠାଇଲେ ସ୍ଥାନୀୟ ବାସିନ୍ଦା, ୨୦ ବର୍ଷ ହେଲା ଜରାଜୀର୍ଣ୍ଣ ଅବସ୍ଥାରେ ସୂତାକଳ ।
କନକ ବ୍ୟୁରୋ : କାମ ଅନ୍ୱେଷଣରେ କାହିଁକି ଯାଉଛନ୍ତି ଓଡ଼ିଆ ? ଆଉ କରୋନା ବେଳେ ଫେରି ଆସିଥିବା ଶ୍ରମିକ ଏବେ କରିବେ କ’ଣ ? ଏମିିତି କିଛି ପ୍ରଶ୍ନ ଭିତରେ ଯେଉଁ କଥାଟି ମନକୁ ପ୍ରଥମେ ଆସୁଛି, ତାହା ହେଲା ବନ୍ଦ ପଡ଼ିଥିବା କାରଖାନା ଓ କଳ କାର୍ଯ୍ୟକ୍ରମ ହେବା କେତେ ଜରୁରୀ । ଆଉ ଠିକ୍ ଏମିତି ଏକ କଳ ହେଉଛି ଜଗତସିଂହପୁର ଜିଲ୍ଲାର ଶାରଳା ସୂତାକଳ ।
Kanak News is now on WhatsApp
Join and get latest news updates delivered to you via WhatsApp
ଜଗତସିଂପୁର ଜିଲ୍ଲାର ଏହି ଜରାଜୀର୍ଣ୍ଣ ସ୍ମାରକୀ ଦିନେ ଜୀବିକାର ମାଧ୍ୟମ ଥିଲା, ହୁଏତ ଆଜିର ଏହି ଦୁରାବସ୍ଥା ଦେଖିଲେ କେହି ବିଶ୍ୱାସ କରିବେ ନାହିଁ । ୧୫ଶହରୁ ଅଧିକ କୁଶଳୀ ଶ୍ରମିକ ଏବଂ କର୍ମଚାରୀଙ୍କ ଜୀବନ-ଜୀବିକାର ମାଧ୍ୟମ ଥିବା ଶାରଳା ସୂତାକଳ ପ୍ରାୟ ୨୦ ବର୍ଷରୁ ଅଧିକ ସମୟ ଧରିବ ବନ୍ଦ ପଡ଼ିଛି ।
ଓଡ଼ିଶାର କଳାହାଣ୍ଡି, କୋରାପୁଟ, ବଲାଙ୍ଗୀର ସମେତ ପଂଜାବ ଓ ମହାରାଷ୍ଟ୍ର ଭଳି ରାଜ୍ୟରୁ ଏଠିକି କଂଚାମାଲ ଆସୁଥିଲା । ଆଉ ଏଠି କୁଶଳୀ ଶ୍ରମିକମାନେ ମେସିନ୍ ସାହାଯ୍ୟରେ ସୂତା ପ୍ରସ୍ତୁତ କରିବା ପରେ ଦେଶର କୋଣ ଅନୁକୋଣ, ଏମିତି କି ଦେଶ ବାହାରକୁ ରପ୍ତାନୀ ହେଉଥିଲା । ହେଲେ ଆଜି ସବୁ ଶୁନଶାନ୍ ।
ଏବେ କରୋନା କାଳରେ ନିଜ ମାଟିକୁ ଫେରୁଛନ୍ତି ଓଡ଼ିଆ ଶ୍ରମିକ । ପ୍ରାୟ ୫ ଲକ୍ଷ ପ୍ରବାସୀ ଶ୍ରମିକ ଓଡ଼ିଶା ଫେରିଛନ୍ତି । ଏଥିରେ ଜଗତସିଂହପୁର ଜିଲ୍ଲାର ଅଛନ୍ତି ୧୨ ହଜାରରୁ ଅଧିକ । ଆଉ ଏମାନଙ୍କ ମଧ୍ୟରେ ୭୦% ଶ୍ରମିକ ଶ୍ରେଣୀର । ସୁରତର ବିଭିନ୍ନ ସୂତାକଳରେ କାମ କରୁଥିବା ପ୍ରାୟ ୫ଶହ କୁଶଳୀ ଶ୍ରମିକ ବି ଫେରିଛନ୍ତି ।
୨୦ ବର୍ଷ ଧରି ଜରାଜୀର୍ଣ୍ଣ ହୋଇ ପଡ଼ି ରହିଥିବା ଏହି ସୂତାକଳ ପୁଣି ଥରେ କାର୍ଯ୍ୟକ୍ଷମ ହେବାର ଆବଶ୍ୟକତା ଏବେ ବଢ଼ିଯାଇଛି, କାରଣ ହଜାର ହଜାର ଶ୍ରମିକ ଏବେ ଜଗତସିଂହପୁର ଜିଲ୍ଲାକୁ ଫେରିଛନ୍ତି । ଆଉ ଏ ଦିଗରେ ପ୍ରଶାସନକୁ ଗୁରୁତର ସହ ବିଚାର କରିବାର ସମୟ ଆସିଛି ।
୧୯୮୨ ସମିହାରେ ୧୨ କୋଟି ଟଙ୍କାରେ ଆରମ୍ଭ ହୋଇଥିବା ଏହି ଶାରଳା ସୂତାକଳରୁ ୧୯୮୪ ମସିହାରେ ଉତ୍ପାଦନ ଆରମ୍ଭ ହୋଇଥିଲା । ହେଲେ ବୁଣାକାରଙ୍କୁ ରିହାତି ବନ୍ଦ ହେବା ଏବଂ କର୍ମଚାରୀଙ୍କ ଦରମା ଦାବି ବୃଦ୍ଧି ସୂତାକଳକୁ ଦେବାଳିଆ କରିଦେଇଥିଲା । ଆଉ ମହାବାତ୍ୟାରେ ସବୁ କିଛି ଉଜୁଡିଗଲା ।