ଆଜି ବି ଏ ଆଖି ତୁମକ ଖୋଜୁଛି, ତମ ବିନା ମୁଁ ମରି ମରି ଜିଉଁଛି… ପାଟଣାଗଡ ପାର୍ସଲ ବୋମା ବିସ୍ଫୋରଣକୁ ପୂରିଛି ତିନି ବର୍ଷ ।
କନକ ବ୍ୟୁରୋ: ଆଜି ବି ଏ ଆଖି ତୁମକ ଖୋଜୁଛି… ଆଜି ବି ଏ ଛାତି ତୁମକୁ ଝୁରୁଛି । ତମକୁ ଭୁଲି ହେଉନି, ତୁମ ବିନା ବି ବଞ୍ଚି ହେଉନି । ଦିନ ଗଡୁଛି ସତ, ଦେହରୁ ଦାଗ ଲିଭିଛି ସତ । ହେଲେ ହୃଦୟରୁ ସେ ଦରଜ ଜମା ଯାଉନି । ନା ବଇଦ, ନା ବିଧାତା କେହି ବି କମେଇ ପାରିବେନି ମନ ତଳର ସେ ଅଦେଖା କଷ୍ଟ । ତମ ବିନା ତିନି ବର୍ଷ ବଞ୍ଚିଛି ସତ ହେଲେ ପ୍ରତି ମୂହୂର୍ତ୍ତରେ ଖାଲି ତମେ ମନେପଡୁଛ… ତମେ ମନେ ପଡୁଛ…
Kanak News is now on WhatsApp
Join and get latest news updates delivered to you via WhatsApp
ପାଟଣାଗଡ ପାର୍ସଲ ବୋମା ବିସ୍ଫୋରଣ ପରେ ଆଖି ସାମ୍ନାରେ ନିଜ ସ୍ୱାମୀଙ୍କୁ ହରାଇଥିବା ରୀମାଙ୍କର ହୁଏତ ଆଜି ଏ କଥା ମନେ ପଡୁଥାଇ ପାରେ । ଆଜିକୁ ଠିକ ତିନି ବର୍ଷ ତଳେ ଅର୍ଥାତ ୨୩ ଫେବୃୟାରୀ ୨୦୧୮ରେ ରୀମାଙ୍କ ଜୀବନରେ ଘୋଟି ଆସିଥିଲା କଳା ବାଦଲ । ଆଉ ଆଜି ସେହି କଳା ଦିନକୁ ପୂରିଛି ୩ ବର୍ଷ । ବର୍ଷ ବିତି ଯାଇଛି ସିନା ହେଲେ ଏବେବି ସୌମ୍ୟ ଶେଖରଙ୍କୁ ମନେକପାଇ ମନେ ମନେ କାନ୍ଦୁଛନ୍ତି ରୀମା ।
ତିନି ବର୍ଷ ତଳେ ସୈତାନ ପୁଞ୍ଜିଲାଲ ପଠାଇଥିଲା ମୃତ୍ୟୁର ପାର୍ସଲ । ବିବାହରେ ମିଳିଥିବା ଉପହାରକୁ ଭାରି ଖୁସିରେ ଦେଖୁଥିଲା ପରିବାର ଲୋକେ । ରୀମା ସୌମ୍ୟ ଶେଖର ଓ ତାଙ୍କ ଜେଜେମା ଉପହାର ଦେଖୁଥିବା ବେଳେ ହଠାତ ଫାଟିଥିଲା ପାର୍ସଲ । ଆଉ ଭୟଙ୍କର ବିସ୍ଫୋରଣରେ ଚାଲିଯାଇଥିଲା ସୌମ୍ୟଙ୍କ ଜୀବନ । ନିଜ ଆଖି ସାମ୍ନାରେ ରୀମା ଦେଖିଥିଲେ ଜୀବନ ସାଥୀ ଜଳି ଯିବାର ଦୃଶ୍ୟ । ଯଦିଓ ବିସ୍ଫୋରଣରେ ଗୁରୁତର ହୋଇଥିଲେ ରୀମା କିନ୍ତୁ ଚିକିତ୍ସା ପରେ ଜୀବନ ଫେରିପାଇଥିଲେ ସତ ହେଲେ ଆଉ ଗୋଟିଏ ଜୀବନକୁ ହରାଇଥିଲେ । ପୁଞ୍ଜିଲାଲ ଯେମିତି ତାଙ୍କୁ ଯନ୍ତ୍ରଣା ଦେଇଛି ଠିକ ସେମିତି ନ୍ୟାୟ ବିଧାନ ତାଙ୍କୁ ଯନ୍ତ୍ରଣା ଦେଉ । ତାଙ୍କୁ ଫାଶୀ ଦିଆଯାଉ ବୋଲି ପ୍ରତିଶୋଧର ନିଆଁରେ ଜଳୁଥିବା ପରିବାର ଲୋକେ ଦାବି କରିଛନ୍ତି ।
ସେପଟେ ପାର୍ସଲ ବୋମା ବିସ୍ଫୋରଣର ମାଷ୍ଟରମାଇଣ୍ଡ ପୁଞ୍ଜିଲାଲ ମେହେର ଜେଲରେ ଅଛି ସତ କିନ୍ତୁ କୋର୍ଟରେ ପୁଞ୍ଜିଲାଲ ତାର ପକ୍ଷ ରଖୁ ନଥିବାରୁ ନ୍ୟାୟ ପ୍ରକ୍ରିୟାରେ ବିଳମ୍ବ ହେଉଛି । ଆଉ ଏପଟେ ନ୍ୟାୟ ନପାଇ ପ୍ରତିଶୋଧର ନିଆଁରେ ଜଳୁଛନ୍ତି ସୌମ୍ୟଙ୍କ ପରିବାର ଲୋକେ । ସେଦିନ ଛାତିଥରା ବିସ୍ଫୋରଣ ଖାଲି ରୀମାଙ୍କ ପାଖରୁ ତାଙ୍କ ସ୍ୱାମୀଙ୍କ ଛଡାଇ ନେଇଛି ବରଂ ଗୋଟେ ମାଆ ପାଖରୁ ତା ଗେହ୍ଲା ପୁଅକୁ ଛଡାଇ ନେଇ କୋଳ ଖାଲି କରିଛି, ଜଣେ ବାପାର ଦମ୍ଭକୁ ଦୋହଲାଇ ଦେଇଛି । ସତରେ ଏ ଘଟଣା ଯେବେ ବି ମନେ ପଡେ ଲୋମମୂଳ ଟାଙ୍କୁରି ଉଠେ । ଅଜଣା ଆବେଗରେ ଛାତି ଭାରି ଭାରି ଲାଗେ…