ଉଚ୍ଚ ରକ୍ତଚାପ ରୋଗୀଙ୍କ ପାଇଁ ଅଧିକ ଘାତକ ସାଜୁଛି କି ‘କରୋନା’ ? ଜାଣନ୍ତୁ ଆକ୍ରାନ୍ତଙ୍କ ଚିକିତ୍ସା କରୁଥିବା ଚୀନ ଡାକ୍ତର କହିଲେ କଣ?
କନକ ବ୍ୟୁରୋ: ପୂରା ବିଶ୍ୱକୁ ଥରହର କରି ରଖିଛି ମାରାତ୍ମକ କରୋନା ଭୁତାଣୁ । କ୍ରମାଗତ ଏହି ଭୁତାଣୁ ଆକ୍ରାନ୍ତଙ୍କ ସଂଖ୍ୟା ବୃଦ୍ଧି ପାଇବା ସହ ମୃତ୍ୟୁ ସଂଖ୍ୟା ମଧ୍ୟ ବଢି ଚାଲିଛି । ତେବେ ଚୀନର ଉହାନ ସହରରୁ ଜନ୍ମ ନେଇଥିବା ଏହି ଭୟଙ୍କର ଭୁତାଣୁ ଏବେ ଗୋଟିଏ ପରେ ଗୋଟିଏ ଦେଶକୁ ଗ୍ରାସ କରିଚାଲିଛି । ଯାହାକୁ ନେଇ ଲୋକଙ୍କ ମଧ୍ୟରେ ବର୍ତ୍ତମାନ ଭୟ ଖେଳିଯାଇଛି । ଚିନ୍ତାର ବିଷୟ ହେଉଛି ଏହି ଭୟଙ୍କର ଭୁତାଣୁରୁ ବର୍ତ୍ତିବା ପାଇଁ ଆଜି ପର୍ଯ୍ୟନ୍ତ ସେଭଳି କୌଣସି ବି ପ୍ରତିଷେଧକ ବା ଟୀକା ବାହାରି ପାରିନି । କେବଳ ସତର୍କତା ଏବଂ ସଚେତନତା ହିଁ ଏହାକୁ ରୋକିବାର ଏକମାତ୍ର ବିକଳ୍ପ । ଆଉ ଏହାରି ଭିତରେ ଜଣେ ଚୀନ ଡାକ୍ତରଙ୍କ ବୟାନ ଏବେ ଲୋକଙ୍କ ଚିନ୍ତା ବଢାଇଛି ।
Kanak News is now on WhatsApp
Join and get latest news updates delivered to you via WhatsApp
ଚୀନର ଉହାନରେ କରୋନା ଆକ୍ରାନ୍ତଙ୍କ ଚିକିତ୍ସା କରୁଥିବା ଡା. ଡୁ ବିନଙ୍କ କହିବା ଅନୁସାରେ, ହାଇ ବ୍ଲଡ ପ୍ରେସର ତଥା ଉଚ୍ଚ ରକ୍ତଚାପ ରୋଗରେ ଆକ୍ରାନ୍ତ ଥିବା ବ୍ୟକ୍ତିଙ୍କ ପାଇଁ କରୋନା ଭାଇରସ ଅଧିକ ଘାତକ ସାଜିପାରେ । ଯଦିଓ ଏନେଇ ସେଭଳି କୌଣସି ତଥ୍ୟ ବର୍ତ୍ତମାନ ପର୍ଯ୍ୟନ୍ତ ପ୍ରମାଣିତ ହୋଇ ନାହିଁ , ତଥାପି ଅଧିକାଂଶ କରୋନା ଆକ୍ରାନ୍ତ ଜନିତ ମୃତ୍ୟୁ ମାମଲାରେ ଏଭଳି ରୋଗୀଙ୍କ ସଂଖ୍ୟା ଅଧିକ ରହିଛି ବୋଲି ଚୀନ ଡାକ୍ତର କହିଛନ୍ତି । ସେ କହିଛନ୍ତି ଯେ, ହାଇ ବ୍ଲଡ ପ୍ରେସର ବା ଉଚ୍ଚ ରକ୍ତଚାପରେ ଶିକାର ଥିବା ଜଣେ ବ୍ୟକ୍ତି ଯେତେବେଳେ ଏହି ଭୟଙ୍କର ଭୁତାଣୁର ସଂସ୍ପର୍ଶରେ ଆସିଥାଏ, ସେତେବେଳେ ତାର ସ୍ୱାସ୍ଥ୍ୟବସ୍ଥା ବାକି ରୋଗୀଙ୍କ ତୁଳନାରେ ବେଶି ବିଗିଡିଯାଇଥାଏ । ଯାହା ଫଳରେ ତାର ମୃତ୍ୟୁ ଆଶଙ୍କା ବେଶି ରହିଥାଏ । ତେବେ ଏସଂକ୍ରାନ୍ତ ସେଭଳି କୌଣସି ସ୍ପଷ୍ଟ ତଥ୍ୟ ପ୍ରକାଶ ପାଇନଥିବା କହିଛନ୍ତି ଏହି ଚୀନ ଡାକ୍ତର ।
ଭାରତରେ ଏବେ କରୋନା ଆକ୍ରାନ୍ତ ଜନିତ ମୃତ୍ୟୁ ସଂଖ୍ୟା ୩କୁ ବୃଦ୍ଧି ପାଇଛି । ସେହିପରି ଦେଶରେ କରୋନା ଆକ୍ରାନ୍ତଙ୍କ ସଂଖ୍ୟା ୧୨୭ରେ ପହଁଚିଛି । ମହାରାଷ୍ଟ୍ରରେ ସର୍ବାଧିକ ୩୯ ଜଣ ସଂକ୍ରମିତ ହୋଇଛନ୍ତି । ସେପଟେ ସାରା ବିଶ୍ୱରେ ୧ଲକ୍ଷ ୭୫ ହଜାର ୫୩୬ ଜଣ ଆକ୍ରାନ୍ତ ହୋଇଛନ୍ତି ଏବଂ ୭ହଜାରରୁ ଅଧିକ ଲୋକଙ୍କର ମୃତ୍ୟୁ ହୋଇଛି । ଚୀନରେ ସର୍ବାଧିକ ୩୨୧୩ଜଣଙ୍କର ମୃତ୍ୟୁହୋଇଥିବାବେଳେ ଇଟାଲୀରେ ୨ହଜାର ୧୫୮ ଜଣଙ୍କର ମୃତ୍ୟୁ ହୋଇଛି ।