ପୁଣି ଚର୍ଚ୍ଚାରେ ଅନୁଗୁଳ ମୁଖ୍ୟ ଚିକିତ୍ସାଳୟ । ଶବରୁ ଆଖି ଗାଏବ ହେବା ପରେ ଏବେ ବେଡରୁ ରୋଗୀ ନିଖୋଜ । ହେଲେ ମେଡିକାଲ କର୍ତ୍ତୃପକ୍ଷଙ୍କ ପାଖରେ ନାହିଁ ଖବର
କନକ ବ୍ୟୁରୋ: ପୁଣି ଚର୍ଚ୍ଚାରେ ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟ । ଶବରୁ ଆଖି ଗାଏବ ହେବା ଘଟଣା ଲୋକଙ୍କ ମନରୁ ନଲିଭୁଣୁ ଏବେ ହସ୍ପିଟାଲ ବେଡରୁ ରୋଗୀ ନିଖୋଜ ହେବା ଖବର ସମସ୍ତଙ୍କୁ କରିଦେଇଛି ଚକିତ । ତେବେ ଚିକିତ୍ସାଳୟରେ ଏତେ ସମସ୍ତ ସୁରକ୍ଷା ବ୍ୟବସ୍ଥା ଥାଇ ମଧ୍ୟ କିଭଳି ଜଣେ ରୋଗୀ ମେଡିକାଲରୁ ନିଖୋଜ ହୋଇଗଲେ ତାହା ବର୍ତ୍ତମାନ ସାଧାରଣରେ ପ୍ରଶ୍ନବାଚୀ ସୃଷ୍ଟି କରିଛି ।
Kanak News is now on WhatsApp
Join and get latest news updates delivered to you via WhatsApp
ଅନୁଗୁଳ ଥାନା ଖଣ୍ଡହତା ଗାଁର ଟିଙ୍କାରୁ ନାଏକ(୨୦) ଅନୁଗୁଳ ଜିଲ୍ଲା ମୁଖ୍ୟ ଚିକିତ୍ସାଳୟରୁ ଗତ ରବିବାର ଦିନ କେଉଁଆଡେ ନିଖୋଜ ହୋଇଯାଇଛନ୍ତି । ତେବେ ପରିବାର ଲୋକଙ୍କ ଅଭିଯୋଗ ଅନୁସାରେ, ଗତ ଶନିବାର ଅପରାହ୍ଣରେ ଟିଙ୍କାରୁଙ୍କ ଦେହ ଅସୁସ୍ଥ ହେବାକୁ ତାଙ୍କୁ ମେଡିକାଲରେ ଭର୍ତ୍ତି କରାଯାଇଥିଲା । ମାତ୍ର ତାଙ୍କୁ ବେଡ ନ ମିଳିବାରୁ ସେ ସେହିଦିନ ପୁରୁଷ ୱାର୍ଡର ବାରଣ୍ଡାରେ ରହି ଚିକିତ୍ସିତ ହେଉଥିଲେ । ମାତ୍ର ରବିବାର ସକାଳୁ ସଫେଇ କର୍ମଚାରୀ ତାଙ୍କୁ ଏବଂ ତାଙ୍କ ମାଙ୍କୁ ସେଠାରୁ ଉଠିଯିବାକୁ କହିଥିଲେ । ଯେଉଁ କାରଣରୁ ଟିଙ୍କାରୁଙ୍କ ମା ତାଙ୍କୁ ସେଠାରେ ଛାଡି ବାହାରକୁ ଚାଲିଆସିଥିଲେ । ଆଉ ଏହି ସମୟରେ ହିଁ ଟିଙ୍କାରୁ ଚିକିତ୍ସାଳୟରୁ ନିଖୋଜ ହୋଇଯାଇଥିବା ପରିବାର ଲୋକେ ଅଭିଯୋଗ ଆଣିଛନ୍ତି ।
ତେବେ ପୁଅକୁ ନପାଇ ବୃଦ୍ଧା ଜଣକ ଉକ୍ତ ହସ୍ପିଟାଲ କର୍ମୀଙ୍କ ପଚାରିବାରୁ ସେ ତାଙ୍କୁ ବୁଝାଇବା ପରିବର୍ତ୍ତେ ଉତକ୍ଷିପ୍ତ ହୋଇଥିଲେ । ଏହାପରେ ସେ କାନ୍ଦି କାନ୍ଦି ପୁଅକୁ ଚାରି ଆଡେ ଖୋଜାଖୋଜି କରିଥିଲେ । ତେବେ ଚାରିଆଡେ ଖୋଜାଖୋଜି କରିବା ପରେ ଟିଙ୍କାରୁଙ୍କର କୌଣସି ପତ୍ତା ମିଳନଥିଲା ଶେଷରେ ଜିଲ୍ଲାପାଳ, ଥାନା ଏବଂ ମେଡିକାଲର ଡିଏମଓଙ୍କ ନିକଟରେ ଗୁହାରି କରିଛନ୍ତି ଟିଙ୍କାରୁଙ୍କ ଘର ଲୋକେ । ବଡ କଥା ହେଲା, ଏଭଳି ଘଟଣା ବାରମ୍ବାର ହେଉଥିବା ବେଳେ ମେଡିକାଲ କର୍ତ୍ତୃପକ୍ଷ ଏହା ଉପରେ ଦୃଢ କାର୍ଯ୍ୟାନୁଷ୍ଠାନ ନେଉ ନଥିବାରୁ ବିଭିନ୍ନ ୱାର୍ଡର କର୍ମଚାରୀମାନେ ରୋଗୀଙ୍କ ପ୍ରତି ଅବହେଳା କରୁଛନ୍ତି ବୋଲି ବୁଦ୍ଧିଜୀବୀ ମହଲରେ ଆଲୋଚନା ହେଉଛି ।