ଭାଇର ଶବକୁ ବୋହିନେଲା ଭାଇ । କରୋନାରେ ମୃତ୍ୟୁ ପରେ ସଂକ୍ରମଣ ଭୟରେ ପାଖକୁ ଆସିଲେନି କେହି, ମୁହଁ ମୋଡିଦେଲେ ହସ୍ପିଟାଲ କର୍ତ୍ତୃପକ୍ଷ, ସହାୟତାର ହାତ ବଢାଇଲେ ଅଜଣା ଯୁବକ ।
କନକ ବ୍ୟୁରୋ : ଭାଇର ଶବକୁ ବୋହିନେଲା ଭାଇ । କରୋନା ମହାମାରୀ ଦ୍ୱିତୀୟ ଲହରର ଦ୍ରୁତ ସଂକ୍ରମଣ ଭିତରେ ଏମିତି ବିଚଳିତ କଲାଭଳି ଚିତ୍ର ସବୁ ଆସିବାରେ ଲାଗିଛି । ପୁଣି ନବରଙ୍ଗପୁର ମୁଖ୍ୟ ଚିକିତ୍ସାଳୟରେ ଦେଖିବାକୁ ମିଳିଛି ଏକ ଅମାନବୀୟ ଓ ଦୁଃଖଦ ଚିତ୍ର । ସାନ ଭାଇର ମୃତଦେହକୁ ଉଠାଇ ମହାପ୍ରୟାଣ ଗାଡିରେ ରଖିବା ପାଇଁ କେହି ସହାୟତା କଲେନାହିଁ । ଏପରିକି ମେଡିକାଲ କର୍ତୃପକ୍ଷ ବି ମୁହଁ ମୋଡିଦେଇ ଚାଲିଗଲେ । କେବଳ ମେଡିକାଲ ବେଡରୁ ମୃତଦେହକୁ ଷ୍ଟ୍ରେଚରରେ ରଖିବାରେ ସହାୟତା କରିଥିଲେ ଜଣେ କର୍ମଚାରୀ । ଏହାପରେ ସେ କେଉଁଆଡେ ଚାଲିଗଲେ ।
Kanak News is now on WhatsApp
Join and get latest news updates delivered to you via WhatsApp
ବଡଭାଇ ଏକା ଷ୍ଟ୍ରେଚରକୁ ଠେଲିଠେଲି ମହାପ୍ରୟାଣ ଗାଡିଯାଏଁ ଆଣିଥିଲେ ବି ଏକା ଶବକୁ ଉଠାଇ ଗାଡିରେ ରଖିବାକୁ ସକ୍ଷମ ହୋଇନଥିଲେ । ଦୀର୍ଘ ସମୟ ଚେଷ୍ଟା କରି ବିଫଳ ହେବାପରେ ପାଖ ଦେଇ ଯାଉଥିବା ଦୁଇ ଅଜଣା ବ୍ୟକ୍ତିଙ୍କୁ ସହାୟତା ପାଇଁ ସେ ନେହୁରା ହୋଇଥିଲେ । ପରେ ସେହି ଅଜଣା ବ୍ୟକ୍ତିଙ୍କ ସହାୟତାରେ ସାନ ଭାଇର ଶବକୁ ଧରି ମହାପ୍ରୟାଣ ଗାଡିରେ ନେଇ ଖାତିଗୁଡାରେ ପହଂଚିଥିଲେ ।
ନବରଙ୍ଗପୁର ଖାତିଗୁଡା ଗାଁର ୨୪ ବର୍ଷୀୟ ଯୁବକ ରବିନାରାୟଣ ଆଚାର୍ଯ୍ୟ ହଠାତ ଅସୁସ୍ଥ ହୋଇପଡିବାରୁ ତାଙ୍କୁ ତେନ୍ତୁଳିଖୁଂଟି ସ୍ୱାସ୍ଥ୍ୟ କେନ୍ଦ୍ର ଓ ପରେ ନବରଙ୍ଗପୁର ଜିଲ୍ଲା ମୁଖ୍ୟ ଚିକିତ୍ସାଳୟକୁ ନେଇଥିଲେ ପରିବାର ଲୋକ । ହେଲେ ସେଠାରେ ତାଙ୍କର ମୃତ୍ୟୁ ହୋଇଯାଇଥିଲା । ପୂର୍ବରୁ ଗତ ଏପ୍ରିଲ ୨୭ ତାରିଖରେ ବାପା ବିରଂଚି ନାରାୟଣ ଆଚାର୍ଯ୍ୟଙ୍କ ମୃତ୍ୟୁ ହୋଇଥିଲା । ପୁଅର ବିୟୋଗରେ ଭାଙ୍ଗିପଡି ତାଙ୍କ ବାପା ଦୁଃଖିଶ୍ୟାମଙ୍କର ମଧ୍ୟ ଗତ ୨ ତାରିଖରେ ପ୍ରାଣବାୟୁ ଉଡିଯାଇଥିଲା । କିଛିଦିନର ବ୍ୟବଧାନରେ ଗୋଟିଏ ପରିବାରର ତିନି ପୀଢିର ପରଲୋକ ପୂରା ପରିବାକୁ ଦୋହଲାଇ ଦେଇଛି ।