ଗଞ୍ଜାମରୁ ଭୁବନେଶ୍ୱର… ଏ କାହାଣୀ ଅସହାୟତାର, ଏ କାହାଣୀ ଅଭାବର… କେମିତି ପେଟ ପାଇଁ ପୁରୁଣା ଭୁବନେଶ୍ୱରରୁ ସ୍ମାର୍ଟସିଟି ଯାଏଁ ସଙ୍ଘର୍ଷ କରିଛନ୍ତି ପାଟ ମାଉସୀ ?
କନକ ବ୍ୟୁରୋ: କଂକ୍ରିଟର ସହର, କଟକଣାର ରାସ୍ତା । ପାଦେ ଆଗେଇଲେ ପଜିଟିଭର ଭୟ, ପାଦେ ପଛେଇଲେ ଭୋକର ଭଉଁରୀ । ଲକଡାଉନ ଲକ୍ଷ୍ମଣରେଖା ପାଇଁ ଜନପଥ ଜନହୀନ, ସହର ଶୂନଶାନ । ଉଦୁଉଦିଆ ଖରା ବେଳେ ଖାଁ ଖାଁ ଭିଡର ଭୁବନେଶ୍ୱର । ଆଉ ଏତିକି ବେଳେ ଅସହାୟତାର ଅପରାହ୍ନରେ ଗରିବ ଖୋଜେ ଗଛର ଛାଇ, ଆଉ ସେହି ଛାଇ ମିଳୁମିଳୁ ମନେପଡେ ପୁରୁଣା ଦିନ, ମନେପଡେ ସଙ୍ଘର୍ଷର କାହାଣୀ, ଓଲଟିଯାଏ ଅତୀତର ପୃଷ୍ଠା, ହାଲକା ପବନରେ ଫିଟିଯାଏ ପାଟ ମାଉସୀର ୫୦ ବର୍ଷର କାହାଣୀ…
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ପିଲାଟି ଦିନରୁ ପାଟ ବେହେରାଣୀଙ୍କ ବାପାମାଆ ଆରପାରିକୁ ଚାଲିଯାଇଥିଲେ । ବାପାମାଆ ଛେଉଣ୍ଡ ହେବା ପରେ ମାମୁ ତାଙ୍କର ଦାୟିତ୍ୱ ନେଇଥିଲେ ହେଁ ପରେ ତାଙ୍କୁ ଧୋକା ଦେଇଥିଲେ । ତାଙ୍କର ସବୁ ପୈତୃକ ସମ୍ପତ୍ତି ବିକ୍ରି କରି କୁନି ଝିଅଟିକୁ ମାମୁ ଘରୁ ତଡିଦେଲେ । ବାସ୍ ସେବେଠାରୁ ଜୀବନ ସହ ସଂଘର୍ଷ କରିଚାଲିଛନ୍ତି ପାଟ । ମାତ୍ର ୯ ବର୍ଷ ବୟସରୁ ଗଞ୍ଜାମ ପାତ୍ରପୁର ଗାଁରୁ ଚାଲିଚାଲି ଭୁବନେଶ୍ୱର ପଳାଇ ଆସିଥିଲେ । ପେଟ ପାଇଁ ପାଟ ଅନେକ କଷ୍ଟ କରଛନ୍ତି । ପର ଘରେ ମୂଲଲାଗି, ବାସନ ମାଜି ଜୀବନ ଜିଉଁଥିବା ମହିଳା ପରବର୍ତ୍ତୀ ସମୟରେ ବନିଗଲେ ରାଜଧାନୀର ପାଟ ମାଉସୀ…
ହାତରେ ବାଡି, ପାଦରେ ଚପଲ, ପାଖରେ ପେଡି ପୁଟୁଳା ଧରି ରାମ ମନ୍ଦିର କଡରେ ବସିଥାଏ ପାଟ ମାଉସୀ । ଖବର ଖୋଜୁ ଖୋଜୁ ଏହି ଅସହାୟ ମହିଳାଙ୍କ ଉପରେ ପଡିଲା ଆମ ସମ୍ବାଦଦାତାଙ୍କ ନଜର । ବାସ୍ ତାପରେ କ୍ୟାମେରା ଆଗରେ ଭୋକ, କଷ୍ଟକୁ ନେଇ ଲକଡାଉନର ଲୁହଭରା କାହାଣୀ କହିଚାଲିଲେ ପାଟ ମାଉସୀ । ଦିନ ଥିଲା ପର ଘରେ କାମ କରି ବଞ୍ଚିଯାଉଥିଲେ ମାଉସୀ । ହେଲେ ଏବେ ବଳବୟସ ହଟିଲାଣି । ତା ଛଡା ତ ସମସ୍ତଙ୍କୁ ଭୂତାଣୁର ଭୟ । ବାବୁଘର ଲୋକେ ତ ବାଟ କିଳିଛନ୍ତି, ସେମାନେ ବା କେମିତି ଜାଣିବେ ଗରିବର ଭୋକ । ଲକଡାଉନ, ସଟଡାଉନ ପାଇଁ ସବୁ ବନ୍ଦ । ପେଟ ଚାଖଣ୍ଡ ପାଇଁ ତ ଘରୁ ବାହାରିବାକୁ ପଡିବ । ଯେଉଁଥିପାଇଁ ଏଇ ଫୁଟପାଥରେ ବସି ସହୃଦୟ ବ୍ୟକ୍ତିଙ୍କ ବାଟକୁ ଚାହିଁରଛନ୍ତି ପାଟ ମାଉସୀ । କେହି ତ ଆସିବ ଯିଏ ଖାଇବାକୁ ଗଣ୍ଡେ ଦେବ । ଭୂତାଣୁ, ଭୋକ ଭିତରେ ଏଇ ଭରସା ଟିକକ ଭଗବାନଙ୍କ ଉପରୁ ଭାଙ୍ଗି ନାହାନ୍ତି ମାଉସୀ ।
ସେପଟେ ଭିକ୍ଷା ମାଗିବାକୁ ଲାଜ ଲାଗୁଛି ଏ ସ୍ୱାଭିମାନୀ ମଣିଷଙ୍କୁ । କେମିତି ବା ମାଗିବେ । ପିଲାବେଳେ ବହୁ ଗେଲ ବସରରେ ବାପାମାଆ ବଢାଇଥିଲେ । ହେଲେ ଭାଗ୍ୟ ଆଜି ତାଙ୍କୁ କେଉଁଠି ଆଣି ପହଞ୍ଚାଇ ଦେଇଛି । ଜନଗହଳି ଭରା ଭୁବନେଶ୍ୱରରେ ହୁଏତ ଆଗରୁ ଲୋକଙ୍କୁ ଦେଖି, କାହା ସହ କଥା ହୋଇ ବା କାହାର ସାହାଯ୍ୟ ପାଇ ମାଉସୀ ଚଳିଯାଉଥିଲା, ନିଜକୁ ବ୍ୟସ୍ତ ରଖି ସମୟ ଟାଳିଦେଉଥିଲା । ହେଲେ ଏବେ ନିରବତାର ସହରରେ ଭାରି ମନେପଡୁଛନ୍ତି ବାପାମାଆ, ଭାରି ମନେପଡୁଛି ପିଲାଦିନ । ଯଦି ପିଲାଦିନୁ ବାପାମାଆ ଥାନ୍ତେ ତେବେ ସେ କଣ ଆଜି ଏମିତି ଅସହାୟ ହୋଇ ଫୁଟଫାଥରେ ଜୀବନ ଜିଉଁଥାନ୍ତେ, ପରର ହାତଟେକାକୁ ଚାହିଁରହିଥାନ୍ତେ । ବୟସର ଅପରାହ୍ନରେ ବାପାମାଆଙ୍କ କଥା ମନେପକାଇ ଲୁହ ନିଗାଡୁଛନ୍ତି ପାଟ ମାଉସୀ ।
ସଟଡାଉନ ସରିଯିବ, ଲକଡାଉନ ହଟିଯିବ ହେଲେ ଲକଡାଉନ ଯେଉଁ ଲୁହର କାହାଣୀ ଲେଖାଉଛି ତାହା ସବୁଦିନ ପାଇଁ ମନେରହିବ । ଆଶା କରିବା ଅସହାୟ ପାଟ ମାଉସୀଙ୍କୁ ସହୃଦୟ ବ୍ୟକ୍ତିମାନେ ସହଯୋଗ କରିବେ ଆଉ ତାଙ୍କ ମୁହଁରେ ଚେନାଏ ହସ ଫୁଟାଇବେ…