ହ୍ୱିଲଚେୟାରରେ ବସିଥିବା ଯୁବକଙ୍କୁ ବସ ରେ ସ୍ଥାନ ଦେଲେନି ଯାତ୍ରୀ, ତା’ପରେ ବସ୍ ଚାଳକ ଯେଉଁ କାମ କଲେ ତାହା ସ୍ୱାଗତଯୋଗ୍ୟ

ବିଭିନ୍ନ ସମୟରେ ଆମେ ଏମିତି ଅନେକ ଲୋକଙ୍କୁ ଭେଟିଥାଉ ଯେଉଁମାନେ ଦୁର୍ଘଟଣାର ଶିକାର ହୋଇ ନିଜର ଶରୀରର ଅଙ୍ଗ ହରାଇଥାନ୍ତି । ଯଦି ସେଭଳି ଲୋକଙ୍କୁ ଆପଣ ବସରେ ଚଢ଼ୁଥିବାର ଦେଖିବେ, ତେବେ ନିଶ୍ଚୟ ତାଙ୍କୁ ଉପରକୁ ଯିବା ପାଇଁ ଜାଗା ଦେବା ସହ ତାଙ୍କୁ ଉପରକୁ ଆସିବା ପାଇଁ ସାହାଯ୍ୟ କରିବେ। କିନ୍ତୁ ପ୍ୟାରିସରେ ଏହାର ଠିକ୍ ଓଲଟା ଘଟିଛି ।

ସୂଚନା ମୁତାବକ, ଫ୍ରେଙ୍କୋଇସ୍ ଲେ ବେରେ ଚାଲିବାରେ ଅସମର୍ଥ ଥିବାରୁ ହ୍ୱିଲଚେୟାର ସାହାଯ୍ୟରେ ବିଭିନ୍ନ ସ୍ଥାନକୁ ଯିବା ଆସିବା କରିଥାନ୍ତି । କିନ୍ତୁ ଥରେ ସେ ବସରେ ଚଢ଼ିବା ପାଇଁ ଚେଷ୍ଟା କରୁଥିବା ବେଳେ ଭିତରେ ବସିଥିବା ଲୋକମାନେ ତାଙ୍କୁ ଉପରକୁ ଯିବା ପାଇଁ ଜାଗା ଦେଇ ନଥିଲେ । ଯାହା ଫଳରେ କିଛି ସମୟ ପର୍ଯ୍ୟନ୍ତ ସେ ବସ୍ ଭିତରକୁ ଯିବା ପାଇଁ ସଂଘର୍ଷ କରିଥିଲେ । ଏହା ଦେଖି ବସ ର ଚାଳକ ତଳକୁ ଓହ୍ଲାଇବା ସହ ସମସ୍ତ ଯାତ୍ରୀଙ୍କୁ ତଳକୁ ଆସିବା ପାଇଁ କହିଥିଲେ ।

ସବୁ ଯାତ୍ରୀ ତଳକୁ ଓହ୍ଲାଇବା ପରେ ଚାଳକଜଣଙ୍କ ଫ୍ରେଙ୍କୋଇସ୍ ବସ୍ ଭିତରକୁ ନେବା ସହ ଓହ୍ଲାଇଥିବା ସମସ୍ତ ଯାତ୍ରୀଙ୍କୁ ପଛରେ ଆସୁଥିବା ବସରେ ଆସିବା ପାଇଁ କହି ସେଠାରୁ ଚାଲି ଯାଇଥିଲେ । ଚାଳକଙ୍କ ଏଭଳି କାମର ପ୍ରଶଂସା କରି ଫ୍ରେଙ୍କୋଇସ୍ ଏକ ଟ୍ଵିଟ୍ କରିବା ପରେ ଏହି ଖବର ପ୍ରସାର ହୋଇଥିବା ଜଣାପଡ଼ିଛି ।