ସଂକ୍ରମଣ କମିଲା, ହେଲେ ତାଲା ଖୋଲିବାକୁ ସାହସ କଲେନି ସରକାର । ଅଗଷ୍ଟ ପହିଲା ଯାଏଁ ବଢ଼ିଲା ଆଂଶିକ ଲକଡାଉନ୍ ।
କନକ ବ୍ୟୁରୋ: ଆସନ୍ତାକାଲି ଆଂଶିକ ଲକଡାଉନ ଅବଧି ଶେଷ ହେଉଥିବାରୁ କଟକଣା କୋହଳ ହେବ ନା ପୂର୍ବଭଳି ବଳବତ୍ତର ରହିବ, ଏହାକୁ ନେଇ ରାଜ୍ୟବାସୀ ଚାହିଁ ରହିଥିବାବେଳେ ଆଂଶିକ ଲକଡାଉନ କଟକଣାକୁ ଅଗଷ୍ଟ ୧ ପର୍ଯ୍ୟନ୍ତ ବଢ଼ାଇଛନ୍ତି ରାଜ୍ୟ ସରକାର । ପୂର୍ବଭଳି ଏଥର ମଧ୍ୟ ସଂକ୍ରମଣ ହାରକୁ ଦୃଷ୍ଟିରେ ରଖି ରାଜ୍ୟର ୩୦ ଜିଲ୍ଲାକୁ ଦୁଇଟି କାଟାଗୋରୀରେ ରଖି କଟକଣାକୁ ଲଗାଇବାକୁ ନିଷ୍ପତ୍ତି ନେଇଛନ୍ତି । ପଶ୍ଚିମ ଓଡିଶା ଓ ଦକ୍ଷିଣ ଓଡିଶାର ୧୭ ଜିଲ୍ଲା ସମେତ କେନ୍ଦୁଝର ,ଅନୁଗୁଳ ଓ ଢ଼େଙ୍କାନାଳ ଜିଲ୍ଲାକୁ କାଟାଗୋରୀ ‘ଏ’ରେ ଓ ଅବିଭକ୍ତ ପୁରୀ, କଟକ , ବାଲେଶ୍ୱର ଓ ମୟୂରଭଞ୍ଜର ୧୦ଟି ଜିଲ୍ଲାକୁ କାଟାଗୋରୀ ‘ବି’ରେ ରଖାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ପୁଣି ଥରେ ସଂକ୍ରମଣ ହାର କମ୍ ବେଶୀ ଥିବା ଦର୍ଶାଇ ସାରା ଓଡିଶାକୁ ଦୁଇ ଭାଗରେ ବାଣ୍ଟି ଲକଡାଉନ ଅବଧିକୁ ବୃଦ୍ଧି କରିଛନ୍ତି ରାଜ୍ୟ ସରକାର । ପୂର୍ବଭଳି ଅପେକ୍ଷାକୃତ ସଂକ୍ରମଣ ହାର କମ୍ ଥିବା ପଶ୍ଚିମ ଓ ଦକ୍ଷିଣ ଓଡିଶାର ୧୭ ଜିଲ୍ଲା ସମେତ ଢ଼େଙ୍କାନାଳ, ଅନୁଗୁଳ ଓ କେନ୍ଦୁଝର ଜିଲ୍ଲାକୁ କାଟାଗୋରୀ ‘ଏ’ରେ ରଖାଯାଇଛି ।
କାଟାଗୋରୀ ‘ଏ’ରେ ଥିବା ଜିଲ୍ଲା ଗୁଡିକରେ
– ସପ୍ତାହକ ସାତ ଦିନ ସକାଳ ୬ଟାରୁ ରାତି ୮ଟା ପର୍ଯ୍ୟନ୍ତ ସମସ୍ତ ଦୋକାନ ଖୋଲିବ
– ରାତି ୮ଟାରୁ ସକାଳ ୬ଟା ପର୍ଯ୍ୟନ୍ତ ନାଇଟ କର୍ଫ୍ୟୁ
– ସପ୍ତାହନ୍ତ ସଟଡାଉନ ରହିବ ନାହିଁ
– ସାପ୍ତାହିକ ଓ ଦୈନିକ ହାଟ ଖୋଲିବ
ସେହିପରି ଉପକୂଳ ଓ ଉତ୍ତର ଓଡିଶାର ୧୦ ଜିଲ୍ଲାକୁ କାଟାଗୋରୀ ‘ବି’ରେ ରଖିଛନ୍ତି ରାଜ୍ୟ ସରକାର । ଏସବୁ ଜିଲ୍ଲାରେ ସଂକ୍ରମଣ ଅଧିକ ରହୁଥିବାରୁ ସରକାର ଏହା ଉପରେ ତୀକ୍ଷଣ ଦୃଷ୍ଟି ରଖିଛନ୍ତି ।
କାଟାଗୋରୀ ‘ବି’ରେ ଥିବା ଜିଲ୍ଲା ଗୁଡିକରେ..
– ସୋମବାରରୁ ଶୁକ୍ରବାର ୫ଦିନ ସକାଳ ୬ଟାରୁ ସନ୍ଧ୍ୟା ୫ଟା ଯାଏଁ ଦୋକାନ ବଜାର ଖୋଲିବ
– ଶନିବାର ଓ ରବିବାର ସପ୍ତାହନ୍ତ ସଟଡାଉନ ରହିବ
– ସନ୍ଧ୍ୟା ୫ଟାରୁ ସକାଳ ୬ଟା ପର୍ଯ୍ୟନ୍ତ ନାଇଟ୍ କର୍ଫ୍ୟୁ
– ସାପ୍ତାହିକ ଓ ଦୈନିକ ହାଟ ବନ୍ଦ ରହିବ
ଅଗଷ୍ଟ ୧ ପର୍ଯ୍ୟନ୍ତ ଆଂଶିକ ଲକଡାଉନ ସିନା ଲାଗିଲା ହେଲେ, ଜିମ୍, ସ୍ପା , ବିଉଟି ପାର୍ଲରକୁ ଖୋଲିବାକୁ ସରକାର ଅନୁମତି ଦେଇଛନ୍ତି । ଫଳରେ ଏହା ଉପରେ ନିର୍ଭରଶୀଳ ଥିବା ଲୋକଙ୍କ ଜୀବିକା ସ୍ୱାଭାବିକ ହେବ ବୋଲି ଅନୁମାନ କରାଯାଉଛି । ତେବେ ଜୀବନ ଜୀବିକା ସହ ସମନ୍ୱୟ ରକ୍ଷା କରିବାକୁ ଯାଇ ପୂର୍ବ ଅପେକ୍ଷା ଏଥର କେତେକ କ୍ଷେତ୍ରରେ କଟକଣାକୁ କୋହଳ କରିଛନ୍ତି ।