କନକ ବ୍ୟୁରୋ: କେମିତି ହୋଇଥିଲା ‘ପରୀ’ର ହତ୍ୟା…? କେମିତି ମୃତଦେହ ଲୁଚାଇବାକୁ କରିଥିଲା ଷଡ଼ଯନ୍ତ୍ର ? ଅପରାଧର ଡେମୋ ଦେଖାଇଲା ଅଭିଯୁକ୍ତ । ଯେଉଁ ଜଘନ୍ୟ ହତ୍ୟାକାଣ୍ଡ, ସାରା ରାଜ୍ୟକୁ ଦୋହଲାଇ ଦେଇଛି, ଯେଉଁ ଛାତିଥରା ଘଟଣା ଉପରେ ସାରା ରାଜ୍ୟର ନଜର ରହିଛି, ସେହି ନାରକୀୟ କାଣ୍ଡକୁ ରି-କ୍ରିଏଟ୍ କରିଛି ସରୋଜ ସେଠୀ । ଏସଆଇଟି ସହ ଯଦୁପୁର ଗାଁକୁ ଯାଇ, କିପରି ସଇତାନ ସାଜି ଜଣେ ନିଷ୍ପାପ ଶିଶୁର ଜୀବନ ନେଇଥିଲା, ନିଜେ ଦେଖାଇଛି ଅଭିଯୁକ୍ତ । କିପରି ଜାମୁକୋଳି ଗଛ ନିକଟରୁ କୁନିଝିଅ ପରୀକୁ ଡାକି ଆଣିଲା, ଘର ଭିତରେ ଦୁଷ୍କର୍ମ ଉଦ୍ୟମ କଲା, ପରୀ ଚିକ୍ରାର କରିବାରୁ ତାକୁ ତଂଟି ଚିପି ହତ୍ୟା କଲା, ପୂରା ମର୍ଡର ସିନର ରି-କ୍ରିଏସନ୍ କରିଥିବା ସୂଚନା ଦେଇଛି ଏସଆଇଟି ।
Kanak News is now on WhatsApp
Join and get latest news updates delivered to you via WhatsApp
ପରୀକୁ ହତ୍ୟା କରିବା ପରେ ଶବକୁ ବସ୍ତା ଭିତରେ ବାନ୍ଧି, ଯେଉଁ ପୋଖରୀ ନିକଟ ବୁଦା ଆଡେ ପିଙ୍ଗି ଦେଇଥିଲା, ତାହା ମଧ୍ୟ ଏସଆଇଟିକୁ ଦେଖାଇଛି ଅଭିଯୁକ୍ତ ସରୋଜ ସେଠୀ । ଅପରାଧର ପୂରା କାହାଣୀ କହିଛି ଅଭିଯୁକ୍ତ । ତେବେ ଏତିକିରେ ସରିଯାଇନି ଏସଆଇଟିର ତଦନ୍ତ । ସରୋଜ କେତେ ସତ କହୁଛି, ତାହା ଜାଣିବାକୁ ତା’ର ବ୍ରେନ୍ ମ୍ୟାପିଂ କରିବାକୁ କୋର୍ଟରେ ଆବେଦନ କରିବ ଏସଆଇଟି । ସେହିପରି ଏସଆଇଟି ମୁଖ୍ୟ ଅରୁଣ ବୋଥ୍ରା କହିଛନ୍ତି ପରୀର କୌଣସି ହାଡ଼ ହଜି ଯାଇନାହିଁ । ହାଡକୁ ଡିଏନଏ ପରୀକ୍ଷା ପାଇଁ ପଠା ଯାଇଛି । ସେପଟେ ଅଭିଯୁକ୍ତ ସରୋଜ ସେଠୀର ରିମାଣ୍ଡ ସରିବା ପରେ ତାକୁ ଜେଲକୁ ପଠାଇ ଦିଆଯାଇଛି ।