ସୌମ୍ୟରଞ୍ଜନଙ୍କ ଘରେ ତଦନ୍ତ ପରେ କ୍ରାଇମବ୍ରାଞ୍ଚ ଅଧିକାରୀଙ୍କ ବୟାନ : କହିଲେ ଘର ଭିତରେ ହିଁ ନିଆଁ ଲାଗି ପୋଡ଼ି ହୋଇଛନ୍ତି ସୌମ୍ୟରଞ୍ଜନ

2,064

କନକ ବ୍ୟୁରୋ : ପାରଳାଖେମୁଣ୍ଡି ଏସିଏଫ ସୌମ୍ୟରଞ୍ଜନଙ୍କ ସରକାରୀ କ୍ୱାର୍ଟରରେ ରହିଛି ପୋଡ଼ା ଦାଗ । କ୍ରାଇମସିନରେ ଯାଂଚ କରୁଥିବା କ୍ରାଇମବ୍ରାଞ୍ଚ ଟିମର ମୁଖ୍ୟ ଡିଏସପି ବିଜୟ କୁମାର ମଲ୍ଲିକ ଏହି ସୂଚନା ଦେଇଛନ୍ତି । ଯାଂଚ କରୁଥିବା କ୍ରାଇମବ୍ରାଞ୍ଚ ଟିମକୁ ଗଣମାଧ୍ୟମ ପ୍ରତିନିଧି ପ୍ରଶ୍ନ କରିଥିଲେ କ୍ୱାର୍ଟର ଭିତରେ କୌଣସି କଳା ଚିହ୍ନ ରହିଛି କି? ଏହାର ଉତ୍ତରରେ କ୍ରାଇମବ୍ରାଞ୍ଚ ଅଧିକାରୀ କହିଛନ୍ତି କଳା ଦାଗ ଓ ପୋଡ଼ା ଦାଗ ରହିଛି । ଘର ଭିତରେ ଗୋଟି ଗୋଟି ଜିନିଷକୁ ତନ ତନ କରି ଯାଂଚ କରିଛନ୍ତି ତଦନ୍ତକାରୀ ଦଳ । ନିଆଁ ଲାଗି କବାଟ ତଳ କିଛି ପୋଡି ଯାଇଥିବା କହିଛି କ୍ରାଇମବ୍ରାଞ୍ଚ ।

ଝରକାରେ ଲାଗିଥିବା ମଶାଜାଲିର ନମୂନା ସଂଗ୍ରହ କରାଯାଇଛି । ପୋଡି ହୋଇଥିବା ଓ ପୋଡି ହୋଇନଥିବା ମଶା ଜାଲିର ନମୂନାକୁ ସଂଗ୍ରହ କରାଯାଇଛି । ଏହା ଗୋଟିଏ ରୁମରେ କି ନାହିଁ ତାହା ମେଳ କରାଯିବ । ପୂର୍ବରୁ କିରୋସିନ ଜବତ ହୋଇଥିଲା । ତେବେ ଜବତ କିରୋସିନି କମ ପରିମାଣର ହୋଇଥିବା କହିଛି କ୍ରାଇମବ୍ରାଞ୍ଚ । ସେପଟେ ଉଭୟ ସୌମ୍ୟରଞ୍ଜନ ଓ ପତ୍ନୀ ବିଦ୍ୟା ଭାରତୀଙ୍କ କଲ ଡିଟେଲ୍ସର ଯାଂଚ ଚାଲିଥିବା ପୋଲିସ କହିଛି । ବର୍ତ୍ତମାନ ସୁଦ୍ଧା ସମସ୍ତ ଘଟଣାର ଭିଡିଓଗ୍ରାଫି କରାଯାଇଛି । ମିଳିଥିବା ଦୁଇଟି ଡାଏରୀକୁ ଫରେନସିକ ଟିମ ଦେଇଛି । ଖୁବ ଶୀଘ୍ର ଶବ ବ୍ୟବଚ୍ଛେଦ ରିପୋର୍ଟ ଆସିବ ବୋଲି ଏସଡିପିଓ ସୂଚନା ଦେଇଛନ୍ତି ।

ପାରଳାଖମୁଣ୍ଡି ଏସଡିପିଓ ରାମକୃଷ୍ଣ ପତି, ଆଇଆଇସି ବିବେକାନନ୍ଦ ସ୍ୱାଇଁଙ୍କ ସହ ମହିଳା ଅଧିକାରୀ ଓ ଅନ୍ୟ କର୍ମଚାରୀମାନେ ମଧ୍ୟ ଯାଂଚରେ ସାମିଲ ହୋଇଥିଲେ । ଏପରିକି କ୍ୱାର୍ଟରର ବାଥ ରୁମ୍ରୁ ଘଟଣା ଘଟିଥିବା ସ୍ଥାନ ଯାଏଁ ବାରମ୍ବାର ଦୂରତା ମାପୁଥିବା ଦେଖାଯାଇଥିଲା । ଘର ଭିତରେ ଥିବା କିଛି ଜିନିଷ ପତ୍ରର ନମୁନା ମଧ୍ୟ ସଂଗ୍ରହ କରାଯାଇଛି । ଏପରିକି ପୋଲିସ ଓ କ୍ରାଇମବ୍ରାଞ୍ଚ ଟିମ କ୍ୱାର୍ଟରରେ ଥିବା ରୋଷେଇ ଘରେ ମଧ୍ୟ ଯାଂଚ କରିଛନ୍ତି । ଆଜି ଦିନ ପ୍ରାୟ ୧୧ଟାରୁ କ୍ରାଇମସିନରେ ପହଂଚି ଛାନଭିନ କରିଛନ୍ତି ପୋଲିସ ଓ କ୍ରାଇମବ୍ରାଞ୍ଚ ଟିମ୍ ।

Comments are closed.