୧୫ ବର୍ଷରେ କାହିଁକି ଆରଜେଡି କଲା ନାହିଁ ଜାତୀୟ ଜନଗଣନା ? ତେଜସ୍ୱୀଙ୍କୁ ଘେରିଲେ ପପୁ ଯାଦବ ।
କନକ ବ୍ୟୁରୋ: ବିହାରରେ ଜାତୀୟ ଜନଗଣନାକୁ ନେଇ ରାଜନୀତି ସରଗରମ ହେଉଛି । ପୂର୍ବରୁ ଏହାକୁ ନେଇ ମୁଖ୍ୟମନ୍ତ୍ରୀ ନୀତିଶ କୁମାର ଏବଂ ଆରଜେଡି ନେତା ତଥା ତେଜସ୍ୱୀଙ୍କ ମଧ୍ୟରେ ଆଲୋଚନା ହୋଇସାରିଛି । ତେବେ ବର୍ତ୍ତମାନ ଏ ପ୍ରସଙ୍ଗରେ ମୁହଁ ଖୋଲିଛନ୍ତି ଜନ ଅଧିକାର ଦଳର ଅଧ୍ୟକ୍ଷ ତଥା ପୂର୍ବତନ ସାଂସଦ ପପୁ ଯାଦବ । ତେଜସ୍ୱୀ ମୁଖ୍ୟମନ୍ତ୍ରୀଙ୍କ ଉପରେ ଏହାକୁ ଲାଗୁ କରିବାକୁ ଯେଉଁ ଚାପ ପକାଉଛନ୍ତି ତାକୁ ନେଇ ସେ ବୟାନ ରଖିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଆରଜେଡି ନେତାଙ୍କୁ ସେ ପ୍ରଶ୍ନ କରିଛନ୍ତି ଜାତିଗତ ଜନଗଣନା ପ୍ରସଙ୍ଗରେ ଲାଲୁ ଯାଦବ ସବୁବେଳେ କିଙ୍ଗ ମେକର ଭୂମିକାରେ ରହୁଥିଲେ । ୧୫ ବର୍ଷ ବିହାରରେ ଲାଲୁ ଯାଦବଙ୍କ ସରକାର ରହିଥିଲା । ତେବେ କାହିଁକି ତାଙ୍କ ସରକାର ଜାତୀୟ ଜନଗଣନା ଲାଗୁ କଲେ ନାହିଁ ? ଏହା ସହ ପପୁ ଯାଦବ ବିପିଏସସି ପେପର ଲିକ ମାମଲାରେ ନୀତିଶ ସରକାରଙ୍କୁ ଘେରିଛନ୍ତି ।
ପପୁ ଯାଦବ କହିଛନ୍ତି, ଯେତେବେଳେ ମୁଖ୍ୟମନ୍ତ୍ରୀ ନୀତିଶ କୁମାର ଜାତୀୟ ଜନଗଣନାର ସମର୍ଥନ କରିଥିଲେ । ତେବେ ତେଜସ୍ୱୀ ଲୋକଙ୍କୁ ଭ୍ରମିତ କରି ପଦଯାତ୍ରା କରିବା ଏବଂ ମୁଖ୍ୟମନ୍ତ୍ରୀଙ୍କୁ ଭେଟିବାର ନାଟକ କରିଥିଲେ । ସେପଟେ ବିପିଏସସି ମାମଲାରେ ମଧ୍ୟ ବିହାର ସରକାରଙ୍କୁ କାଠଗଡାକୁ ଟାଣିଛନ୍ତି ପପୁ ।
ସେ କହିଛନ୍ତି, କେବଳ ପେପର ଲିକ୍ ମାମଲାରେ ବିହାରର କୋଚିଂ ମାଫିଆ ଏବଂ ଅଧିକାରୀ ହାତ ମିଳାଇଛନ୍ତି । ଏମାନଙ୍କ କାରଣରୁ ରାଜ୍ୟର ହଜାର ହଜାର ଯୁବକଙ୍କ କ୍ୟାରିୟର ନଷ୍ଟ ହେଉଛି । ପେପର ଲିକ ହେବା ପରେ ଯୁବକଙ୍କ ମଧ୍ୟରେ ଆକ୍ରୋଶ ରହିଛି । ସମାଜରେ ଥିବା ଗରିବ, ସଂଖ୍ୟାଲଘୁ, ବିନା ଟଙ୍କା ଦେଇ ସରକାରୀ ଚାକିରୀ କରିପାରୁନାହାନ୍ତି । ଯେତେବେଳେ ସେମାନେ ପରିଶ୍ରମ କରୁଛନ୍ତି ସେତେବେଳେ ଏଭଳି ପେପର ଲିକ କରାଯାଉଛି । ଏହା କରିବା ଦ୍ୱାରା ବିହାରର ଲକ୍ଷ ଲକ୍ଷ ଲୋକଙ୍କ ଭବିଷ୍ୟତ ଅନ୍ଧାର ହେଉଛି । ପପୁ ଯାଦବ ଏହି ପେପର ଲିକ ଘଟଣାର ସିବିଆଇ ଯାଞ୍ଚ ପାଇଁ ଦାବି କରିଛନ୍ତି । ଏହା ସହ ବିଶେଶ୍ୱରାୟ ଭବନରେ ଲାଗିଥିବା ନିଆଁକୁ ସରକାର ଗମ୍ଭୀରତାର ସହ ନେଇ ଯାଞ୍ଚ କରିବାକୁ ଦାବି କରିଛନ୍ତି ।