ଧର୍ମେନ୍ଦ୍ରଙ୍କୁ ପାଣ୍ଡିଆନଙ୍କ ଆହ୍ୱାନ । ଜୁନ ୯ରେ ମୁଖ୍ୟମନ୍ତ୍ରୀ ଭାବେ ନବୀନ ପଟ୍ଟନାୟକ ଶପଥ ନନେଲେ ସେ ନେଇଯିବେ ରାଜନୀତିରୁ ସନ୍ନ୍ୟାସ ।
କନକବ୍ୟୁରୋ: ରାଜ୍ୟ ସାରା ବୁଲି ବିଜେଡି ପ୍ରାର୍ଥୀଙ୍କ ପାଇଁ ପ୍ରଚାର କଲାବେଳେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଜୋରଦାର ଟାର୍ଗେଟ କରୁଛନ୍ତି ପାଣ୍ଡିଆନ । ଆଜି ଝାରସୁଗୁଡ଼ାର ବ୍ରଜରାଜନଗରରେ ଧର୍ମେନ୍ଦ୍ରଙ୍କୁ ଦେଇଛନ୍ତି ଖୋଲା ଚ୍ୟାଲେଂଜ । ପାଣ୍ଡିଆନ ଚାଲେଂଜ କରିଛନ୍ତି, ବିଜେପି ରାଜ୍ୟରେ ସରକାର ଗଢ଼ିନପାରିଲେ ରାଜନୀତିରୁ ସନ୍ୟାସ ନେବାକୁ ଘୋଷଣା କରିବେ କି ଧର୍ମେନ୍ଦ୍ର । ବିଜେଡି ସରକାର ଗଢ଼ିନପାରିଲେ ସେ ରାଜନୀତିରୁ ସନ୍ୟାସ ନେଇଯିବେ ବୋଲି କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିର୍ବାଚନ ଆରମ୍ଭ ହୋଇନି, ଭୋଟର ଭୋଟ ଦେଇ ନାହାନ୍ତି କିନ୍ତୁ କିଏ ସରକାର ଗଢ଼ିବ? କେବେ ଶପଥ ନେବେ? ସେ ନେଇ ରାଜନୈତିକ ଦଳମାନଙ୍କ ଭିତରେ ବୟାନବାଜି ଜୋରଦାର ହୋଇଛି । ଖୋଦ ପ୍ରଧାନମନ୍ତ୍ରୀ ଓଡିଶାରେ ବିଜେପି ସରକାର ଗଢ଼ିବ ଓ ଜୁନ ୧୦ରେ ଶପଥ ଗ୍ରହଣ ଉତ୍ସବ ହେବ ବୋଲି ଘୋଷଣା କରିବା ପରେ, ବୟାନବାଜି ଜୋରଦାର ହୋଇଛି । ଏତିକିବେଳେ ପୁଣି ଥରେ ନିର୍ବାଚନୀ ସଭାରୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କୁ ଖୋଲାଖୋଲି ଚ୍ୟାଲେଞ୍ଜ ଦେଇଛନ୍ତି ବିଜେଡି ନେତା ଭି.କେ. ପାଣ୍ଡିଆନ ।
ବିଜେଡି ନ ଜିତିଲେ ସେ ରାଜନୀତିରୁ ସନ୍ନ୍ୟାସ ନେବେ ବୋଲି କହିଛନ୍ତି । ତେବେ ବିଜେପି ଓଡିଶାରେ କ୍ଷମତାକୁ ନଆସିଲେ ଧର୍ମେନ୍ଦ୍ର ପ୍ରଧାନ ରାଜନୀତିରୁ ସନ୍ନ୍ୟାସ ନେବାକୁ ଘୋଷଣା କରିବେ କି? ବୋଲି ମଧ୍ୟ ପ୍ରଶ୍ନ କରିଛନ୍ତି । ଝାରସୁଗୁଡା ବ୍ରଜରାଜନଗରରେ ପ୍ରଚାରବେଳେ ଧର୍ମେନ୍ଦ୍ରଙ୍କୁ ଏହି ଚ୍ୟାଲେଞ୍ଜ କରିଛନ୍ତି ପାଣ୍ଡିଆନ । ଗତ ୬ତାରିଖରେ ପ୍ରଧାନମନ୍ତ୍ରୀ ବ୍ରହ୍ମପୁର ପ୍ରଚାର ସଭାରୁ ଓଡିଶାରେ ବିଜେପି ସରକାର ଗଢ଼ିବ ବୋଲି ଘୋଷଣା କରିଥିଲେ ।
ଜୁନ ୧୦ତାରିଖରେ ବିଜେପି ମୁଖ୍ୟମନ୍ତ୍ରୀ ଶପଥ ନେବେ ବୋଲି ଦାବି କରିଥିଲେ । ପ୍ରଧାନମନ୍ତ୍ରୀ କହିବାର ମାତ୍ର କିଛି ସମୟ ପରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ଦିବା ସ୍ୱପ୍ନ କହି କଟାକ୍ଷ କରିଥିଲେ । ଆଉ ପାଦେ ଆଗକୁ ଯାଇ ଜୁନ୍ ୯ରେ ନବୀନ ପୁଣି ଥରେ ମୁଖ୍ୟମନ୍ତ୍ରୀ ଭାବେ ଶପଥ ନେବେ ବୋଲି ଦାବି କରିଥିଲେ ସେବେଠାରୁ ସରକାର କିଏ ଗଢ଼ିବ ଓ ଶପଥ ଗ୍ରହଣକୁ ନେଇ ଜାରି ରହିଛି ବୟାନବାଜି । ଭୋଟ ପୂର୍ବରୁ ଦୁଇ ଦଳ ନେତାଙ୍କ ଏଭଳି ଦାବି, ରାଜ୍ୟ ରାଜନୈତିକ ପାଣିପାଗକୁ ଉଷ୍ଣ କରିଛି । ତେବେ ଓଡିଶାର ଭୋଟର କାହାକୁ ଭରସା କରୁଛନ୍ତି ତାହା ଜୁନ୍ ୪ରେ ସ୍ପଷ୍ଟ ହେବ ।