କାମ ପରିବା ବିକିବା ହେଲେ ଷ୍ଟାଇଲ ପୂରା ବଲିଉଡ ହିରୋ ସଲମାନ ଖାନଙ୍କ ଭଳି । ଡ୍ୟାନ୍ସ କରି କରି ପରିବା ବିକୁଛନ୍ତି ପରିବାବାଲା ।
କନକ ବ୍ୟୁରୋ: ମୁଣ୍ଡରେ ପଗଡି, ହାତରେ ଘଡି ଆଉ ଆଖିରେ କଳା ଚଷମା । ଏଭଳି ହିରୋ ଲୁକରେ ରାସ୍ତା ଉପରେ ଡ୍ୟାନ୍ସ କରୁଛନ୍ତି ଜଣେ ପରିବା ବେପାରୀ । କେବଳ ଡ୍ୟାନ୍ସ ନୁହେଁ ଡ୍ୟାନ୍ସ କରିବା ସହ ଏହି ବ୍ୟକ୍ତି ଜଣକ ପରିବା ମଧ୍ୟ ବିକୁଛନ୍ତି । କାମ ପରିବା ବିକିବା ହେଲେ ଷ୍ଟାଇଲ ପୂରା ବଲିଉଡ ହିରୋ ସଲମାନ ଖାନଙ୍କ ଭଳି । ସେଥିପାଇଁ ତ ଲୋକମାନେ ତାଙ୍କୁ ପାଣ୍ଡେ ଜି ବୋଲି ଡାକନ୍ତି । ଆଉ ପାଣ୍ଡେ ଜୀଙ୍କ ଏହି ଡ୍ୟାନ୍ସ ଭିଡିଓ ଏବେ ସୋସିଆଲ ମିଡିଆରେ ଖୁବ ଭାଇରାଲ ହେବାରେ ଲାଗିଛି ।
Kanak News is now on WhatsApp
Join and get latest news updates delivered to you via WhatsApp
ଏହି ବ୍ୟକ୍ତି ଜଣକ ହେଉଛନ୍ତି ରିତେଶ ପାଣ୍ଡିୟେ । ଘର ଝାଡଖଣ୍ଡ ଧନବାଦ ଜିଲ୍ଲାର ହିରାପୁର ଡିଏମ କଲୋନୀରେ । ରିତେଶ ପାଣ୍ଡିୟେଙ୍କ କାମ ଠେଲା ଗାଡିରେ ବିଭିନ୍ନ ସ୍ଥାନ ବୁଲି ପରିବା ବିକିବା । ଆଉ ପରିବା ବିକିବା ବେଳେ ତାଙ୍କର ଏହି ଚୁଲବୁଲ ପାଣ୍ଡେ ଷ୍ଟାଇଲର ଡ୍ୟାନ୍ସ ଲୋକଙ୍କ ମନକୁ ବେଶ ଛୁଇଁଥାଏ । ସେଥିପାଇଁ ତାଙ୍କ ଗୀତର ଶବ୍ଦ ଶୁଣି ଲୋକମାନେ ଘର ଭିତରୁ ଚାଲିଆସନ୍ତି ପାଣ୍ଡେ ଜୀଙ୍କଠାରୁ ପରିବା କିଣିିବା ପାଇଁ ।
ରିତେଶ ପାଣ୍ଡିୟେ ସକାଳୁ ରାତି ୧୦ଟା ଯାଏଁ ରାସ୍ତାରେ ବୁଲି ବୁଲି ପରିବା ବିକନ୍ତି । ପରିବା ବିକିବା ବେଳେ ତାଙ୍କ ଡ୍ୟାନ୍ସ ପାଇଁ ସେ ଏକ ମ୍ୟୁଜିକ ସିଷ୍ଟମ ମଧ୍ୟ ଲଗାଇଛନ୍ତି । ତାଙ୍କ ମ୍ୟୁଜିକ ସିଷ୍ଟମରେ ସେ ହିନ୍ଦୀ ଗୀତ ଲଗାଇ ଲୋକଙ୍କ ମନୋରଞ୍ଜନ କରନ୍ତି । ଆଉ ଏହି ସବୁ ଗୀତର ତାଳେ ତାଳେ ସେ ଡ୍ୟାନ୍ସ କରନ୍ତି । କେବଳ ସେତିକି ନୁହେଁ ସେ ତାଙ୍କର ଏକ ସ୍ପେଶାଲ ଗୀତ ମଧ୍ୟ ରେକଡିଂ କରଛନ୍ତି । ଯେଉଁଥିରେ ସେ ଗୀତ ମାଧ୍ୟମରେ ଲୋକମାନଙ୍କୁ ପରିବା ନେବାକୁ କହିଥାନ୍ତି ।
ପାଣ୍ଡିୟେ ଜୀ ତାଙ୍କ ଡ୍ୟାନ୍ସ ପାଇଁ ସ୍ଥାନୀୟ ଅଞ୍ଚଳରେ ବେଶ ପରିଚିତ । ଏଭଳି ଡ୍ୟାନ୍ସ କରି ପରିବା ବିକି ସେ ଲୋକମାନଙ୍କୁ ନିଜ ଆଡକୁ ଆକର୍ଷିତ କରିଥାନ୍ତି । ଆଉ ଲୋକମାନେ ବି ତାଙ୍କଠାରୁ ପରିବା କିଣିବା ପାଇଁ ଅନେଇ ବସିଥାନ୍ତି । ଲୋକମାନେ କହନ୍ତି ବଜାର ଅପେକ୍ଷା ତାଙ୍କ ପରିବା ଦାମ କମ ରହେ ଆଉ ସତେଜ ବି ରହେ । ଆଉ ତାଙ୍କର ଗଜବ ଡ୍ୟାନ୍ସ ଷ୍ଟାଇଲରେ ଆକର୍ଷିତ ହୋଇ ଲୋକମାନେ ତାଙ୍କଠାରୁ ପରିବା କିଣିଥାନ୍ତି ।