ପଞ୍ଚାୟତ ନିର୍ବାଚନ ପ୍ରଚାରରେ କେତେ ଗାଡି ବ୍ୟବହାର କରିପାରିବେ ପ୍ରାର୍ଥୀ ? ଜାଣନ୍ତୁ ଗାଇଡଲାଇନ୍
କନକ ବ୍ୟୁରୋ: ପଞ୍ଚାୟତ ନିର୍ବାଚନରେ କେତେ ଟଙ୍କା ଖର୍ଚ୍ଚ କରିପାରିବେ ପ୍ରାର୍ଥୀ ? ନିର୍ବାଚନ କମିଶନ ଏ ନେଇ ଆଦେଶନାମା ଜାରି କରିବା ସହ ପ୍ରଚାରରେ କେତେ ଗାଡି ବ୍ୟବହାର ହୋଇପାରିବ ସେନେଇ ମଧ୍ୟ ଗାଇଡଲାଇନ ଜାରି କରିଛନ୍ତି । ଜିଲ୍ଲା ପରିଷଦ ପ୍ରାର୍ଥୀ ୫ଟି କାର ଓ ୧୦ଟି ବାଇକ ବ୍ୟବହାର କରିପାରିବେ । ସେହିପରି ସରପଞ୍ଚ ୨ଟି କାର୍ ବା ଜିପ୍, ୫ଟି ବାଇକ୍ ବ୍ୟବହାର କରିପାରିବେ । ସମିତି ସଭ୍ୟ ପ୍ରାର୍ଥୀ ବି ୨ଟି କାର୍ ବା ଜିପ ଏବଂ ୫ଟି ବାଇକ୍ ପ୍ରଚାରରେ ବ୍ୟବହାର କରିପାରିବେ ।
Kanak News is now on WhatsApp
Join and get latest news updates delivered to you via WhatsApp
ତେବେ ମୋଟର ଯାନ ବ୍ୟବହାର ଦିନଠାରୁ ଜିଲ୍ଲା ପରିଷଦ ପ୍ରାର୍ଥୀ ଯାନର ପ୍ରକାର, ତାହାର ପଞ୍ଜିକରଣ ନମ୍ବର, ଗାଡି ମାଲିକଙ୍କ ନାମ ଉପ ଜିଲ୍ଲାପାଳଙ୍କୁ ଏବଂ ପଞ୍ଚାୟତ ସମିତି ଓ ସରପଞ୍ଚ ପ୍ରାର୍ଥୀ ସ୍ଥାନୀୟ ଗୋଷ୍ଠୀ ଉନ୍ନୟନ ଅଧିକାରୀଙ୍କୁ ଲିଖିତ ଭାବେ ଜଣାଇବେ । ଏବଂ ଏହି ଗାଡି ବ୍ୟବହାର ତଥ୍ୟର ୩ଟି ନକଲ ଦାଖଲ କରାଯିବ ।
ଏଥର ପଞ୍ଚାୟତ ନିର୍ବାଚନରେ କେତେ ଟଙ୍କା ଖର୍ଚ୍ଚ କରିପାରିବେ ପ୍ରାର୍ଥୀ ? ସେନେଇ ରାଜ୍ୟ ନିର୍ବାଚନ କମିଶନ ସ୍ଥିର କରିଛନ୍ତି ଖର୍ଚ୍ଚ ସୀମା । ଜିଲ୍ଲା ପରିଷଦ ପ୍ରାର୍ଥୀ ପାଇଁ ଖର୍ଚ୍ଚ ସୀମା ୫ ଲକ୍ଷ ରହିଛି । ସରପଞ୍ଚ ଓ ସମିତି ସଭ୍ୟ ପ୍ରାର୍ଥୀଙ୍କ ପାଇଁ ୨ ଲକ୍ଷ ଟଙ୍କାର ଖର୍ଚ୍ଚ ସୀମା ନିର୍ଦ୍ଧାରିତ । ପୂର୍ବରୁ ଜିଲ୍ଲା ପରିଷଦ ପ୍ରାର୍ଥୀ ପାଇଁ ଖର୍ଚ୍ଚ ସୀମା ୨ ଲକ୍ଷ ଟଙ୍କା ଥିଲା । ସରପଞ୍ଚ ଓ ସମିତି ସଭ୍ୟ ପ୍ରାର୍ଥୀଙ୍କ ପାଇଁ ୮୦ ହଜାର ଟଙ୍କା ଖର୍ଚ୍ଚ ସୀମା ଥିଲା । ନିର୍ବାଚନ ବେଳେ ଖର୍ଚ୍ଚ ସୀମା ବୃଦ୍ଧି ପାଇଁ ସର୍ବଦଳୀୟ ବୈଠକରେ ଦାବି ହୋଇଥିଲା । ଆଉ ଏବେ ଖର୍ଚ୍ଚ ସୀମା ବୃଦ୍ଧି ଉପରେ ମୋହର ମାରିଛନ୍ତି ରାଜ୍ୟ ନିର୍ବାଚନ କମିଶନ ।