ଏକପାଖିଆ ହେବ କି ଯାଜପୁରରେ ନିର୍ବାଚନ? କ୍ଲିନ୍ ସ୍ୱିପ୍ ଲକ୍ଷ୍ୟରେ ବିଜେଡି, ନେତାଙ୍କ ଭରସାରେ ବିଜେପି, ପ୍ରାର୍ଥୀ ଖୋଜୁଛି ପୁରୁଣା ଦଳ!
କନକ ବ୍ୟୁରୋ : ପଞ୍ଚାୟତ ନିର୍ବାଚନ ବିଗୁଲ ବାଜିବା ପରେ ଏବେ ତୃଣମୂଳସ୍ତରରେ ଉଷ୍ମ ହେଉଛି ରାଜନୀତି । ୨୦୨୪ ସାଧାରଣ ନିର୍ବାଚନ ପୂର୍ବରୁ ପଞ୍ଚାୟତ ନିର୍ବାଚନ ହିଁ ଦଳର ପରାକାଷ୍ଠା ଦେଖାଇବାର ମୁଖ୍ୟ ମାଧ୍ୟମ । ତେଣୁ ପଞ୍ଚାୟ୍ତ ନିର୍ବାଚନର ଫଳାଫଳ ସାଧାରଣ ନିର୍ବାଚନକୁ ପ୍ରଭାବିତ କରିବାକୁ ଥିବାରୁ ପଞ୍ଚାୟତ ସମିତି ଓ ଜିଲ୍ଲା ପରିଷଦକୁ ହାତେଇବାକୁ ସବୁ ଦଳ ଆଶା ରଖିଛନ୍ତି । ଆଉ ଏସବୁ ଭିତରେ ଯାଜପୁର ରାଜନୀତି ବେଶ ରୋଚକ ସ୍ଥିତିରେ ପହଞ୍ଚିଛି । ୨୦୧୭ ତୁଳନାରେ ୨୦୨୨ ନିର୍ବାଚନରେ ଯାଜପୁରର ରାଜନୈତିକ ଚିତ୍ରପଟ୍ଟ ସମ୍ପୂର୍ଣ୍ଣ ବଦଳି ଯାଇଛି । ପଞ୍ଚାୟତ ସମିତି ସହ ଦଳୀୟ ଚିହ୍ନରେ ଲଢାଯାଉଥିବା ଜିଲ୍ଲା ପରିଷଦ ଆସନ କିଏ ହାତେଇବ ତାହାକୁ ନେଇ ଏବେଠୁ ଅଙ୍କକଷା ଆରମ୍ଭ ହୋଇଛି ।
Kanak News is now on WhatsApp
Join and get latest news updates delivered to you via WhatsApp
ଯାଜପୁର ଜିଲ୍ଲାରେ ଚଳିତ ବର୍ଷ ଜିଲ୍ଲା ପରିଷଦ ଅଧ୍ୟକ୍ଷ ପଦ ଅନୁସୂଚିତ ଜାତି ମହିଳାଙ୍କ ପାଇଁ ସଂରକ୍ଷିତ ରହିଛି । ୩୯ଟି ଜିଲ୍ଲା ପରିଷଦ ଜୋନକୁ ନେଇ ଗଠିତ ଯାଜପୁର ଜିଲ୍ଲା ପରିଷଦ ଗତ ୨ଟି ନିର୍ବାଚନରେ ବିଜେଡି ଅକ୍ତିଆରରେ ରହିଛି । ୨୦୧୨ରେ ଯାଜପୁର ଜିଲ୍ଲାରେ ସମସ୍ତ ୩୯ଟି ଜିଲ୍ଲା ପରିଷଦ ଆସନକୁ ବିଜେଡି ପୋଛି ନେଇଥିବା ବେଳେ ୨୦୧୭ରେ ବିଜେପି ସାମାନ୍ୟ ମୁଣ୍ଡ ଟେକି ଥିଲା । ୩୯ଟି ଜୋନରୁ ମାତ୍ର ୬ଟି ଜୋନରେ ବିଜେପି ନିଜର ପତିଆରା ଜାହାରି କରିପାରିଥିଲା । ଜିଲ୍ଲାରେ ୩ ନମ୍ବର ସ୍ଥାନରେ ଥିବା କଂଗ୍ରେସ ଗୋଟିଏ ବି ଖାତା ଖୋଲି ପାରିନଥିଲା । ତେବେ ୨୦୧୭ରେ ବରୀ, ବିଞ୍ଝାରପୁର ଓ ଧର୍ମଶାଳା ନିର୍ବାଚନମଣ୍ଡଳୀରେ ୨ଟି ଲେଖାଏଁ ଜିଲ୍ଲା ପରିଷଦ ଜୋନ୍ ଜିତି ଯାଜପୁରରେ ପଦ୍ମ କଅଁଳିବା ଆରମ୍ଭ କରିଥିଲା । ଆଉ ଏହାର ପ୍ରଭାବ ୨୦୧୯ ସାଧାରଣ ନିର୍ବାଚନରେ ଦେଖିବାକୁ ମିଳିଥିଲା ।
ଜିଲ୍ଲାରେ ଗତ ବିଧାନସଭା ନିର୍ବାଚନରେ ବଡଚଣା,ସୁକିନ୍ଦା,ବରୀ ନିର୍ବାଚନ ମଣ୍ଡଳୀରେ ବିଜେପି ଭଲ ସ୍ଥିତିରେ ରହିଥିଲା । କିନ୍ତୁ ସମୟ ଗଡିବା ସହ ବରୀ ରାଜନୈତିକ ସମୀକରଣ ଗୋଳିଆ ହୋଇଛି । ବିଜେପିର ଟାଣୁଆ ନେତା ବିଶ୍ୱ ରଂଜନ ମଲ୍ଲିକ ନିକଟରେ ନିଜର ଦଳବଳ ନେଇ ବିଜେଡିରେ ସାମିଲ ହୋଇଛନ୍ତି । ଯାହା ବରୀରେ ବିଜେପିକୁ ବ୍ୟାକଫୁଟକୁ ଠେଲି ଦେଇଛି । କାରଣ ୨୦୧୭ ପଞ୍ଚାୟତ ନିର୍ବାଚନରେ ବରୀରେ ବିଶ୍ୱରଞ୍ଜନ ବିଜେଡିକୁ ଟକ୍କର ଦେବା ସହ ପଞ୍ଚାୟତ ସମିତି ଅଧ୍ୟକ୍ଷ ପଦ ହାତେଇଥିଲେ । ତେଣୁ ୨୦୧୯ ନିର୍ବାଚନ ପୂର୍ବରୁ ବିଜେପି ତାଙ୍କୁ ଦଳରେ ସାମିଲ କରି ବରୀରେ ନିଜକୁ ଶକ୍ତିଶାଳୀ କରିଥିଲା । କିନ୍ତୁ ୨୦୧୯ ନିର୍ବାଚନରେ ବିଜେଡି ବିଶ୍ୱରଞ୍ଜନଙ୍କ ସମର୍ଥିତ ପଞ୍ଚାୟତ ସମିତି ଅଧ୍ୟକ୍ଷାଙ୍କୁ ଦଳରେ ସାମିଲ କରି ତାଙ୍କ ବିରୋଧରେ ହିଁ ପ୍ରାର୍ଥୀ କରିଥିଲା । ଆଉ ବିଜେଡି ରଚିଥିବା ବ୍ୟୁହରେ ଫଶିଥିଲେ ବିଶ୍ୱରଞ୍ଜନ । ତେବେ ବିଧାନସଭା ନିର୍ବାଚନରେ ପରାଜିତ ହେବା ପରେ ଏବେ ବିଜେଡି କ୍ୟାମ୍ପରେ ଏଣ୍ଟ୍ରି ମାରିଛନ୍ତି ବିଶ୍ୱରଞ୍ଜନ । ଯାହା ବରୀ ରାଜନୀତିକୁ ସମ୍ପୂର୍ଣ୍ଣ ଓଲଟପାଲଟ କରି ଦେଇଛି ।
ସାଧାରଣ ନିର୍ବାଚନ ପରେ ପରେ ଯାଜପୁରରେ ବିଜେଡି ନିଜର ଷ୍ଟ୍ରାଟେଜିରେ ବଡ ପରିବର୍ତ୍ତନ କରିଥିଲା । ଦଳର ସାଙ୍ଗଠନିକ ସମ୍ପାଦକ ପ୍ରଣବ ପ୍ରକାଶ ଦାସ ନିଜେ ଗୋଟିଚାଳନା କରିବା ସହ ଯାଜପୁରକୁ ବିରୋଧୀ ଶୂନ୍ୟ କରିବାକୁ ଉଦ୍ୟମ ଜାରି ରଖିଥିଲେ । ଅସନ୍ତୁଷ୍ଟଙ୍କୁ ସନ୍ତୁଷ୍ଟ କରି କଳେବଳେ ବିଜେଡି ସମର୍ଥନକୁ ବଢ଼ାଇ ଚାଲିଥିଲେ ପ୍ରଣବ । ସବୁ ନିର୍ବାଚନ ମଣ୍ଡଳୀରେ ପ୍ରଣବ ନିଜର ଆଧିପତ୍ୟ ବିସ୍ତାର କରିଥିବା ବେଳେ ସବୁ ବିଧାୟକଙ୍କ ପ୍ରିୟ ହୋଇ ଜିଲ୍ଲାରେ ବିଜେଡି ଗାଡିର ବେଗ ବଢ଼ାଇଛନ୍ତି ।
ସାଧାରଣ ନିର୍ବାଚନ ପରେ ବିଜେଡିକୁ କେବଳ ଫାଇଦା ହୋଇଛି ତାହା ନୁହେଁ ବରଂ ବିଜେପିକୁ ବଡ ଝଟକା ମଧ୍ୟ ଲାଗିଛି । ବିଶ୍ୱରଞ୍ଜନଙ୍କ ଭଳି ପ୍ରଭାବଶାଳୀ ନେତା ବିଜେପି ଶିବିର ଶଙ୍ଖ ଫୁଙ୍କିଥିବା ବେଳେ ୨୦୧୭ରେ ବିଜେପି ଚିହ୍ନରେ ଜିତିଥିବା ୬ ଜିଲ୍ଲା ପରିଷଦ ସଭ୍ୟଙ୍କ ମଧ୍ୟରୁ ୫ ଜଣ ବିଜେପି ଛାଡି ବିଜେଡି ଶିବିର ମୁହାଁ ହୋଇ ସାରିଛନ୍ତି । ଦଳରେ ନେତୃତ୍ୱର ଘୋର ଅଭାବ ହିଁ ବିଜେପିକୁ ଚଳିତ ପଞ୍ଚାୟତ ନିର୍ବାଚନରେ ବ୍ୟାକଫୁଟକୁ ଠେଲିବ ବୋଲି ଚର୍ଚ୍ଚା ହେଉଛି । କାରଣ ଜିଲ୍ଲାରେ ଦଳର ଶୀର୍ଷ ନେତୃତ୍ୱ କୁହାଯାଉଥିବା ଗୌତମ ରାୟ କେବଳ ନିଜ ନିର୍ବାଚନମଣ୍ଡଳୀ ମଧ୍ୟରେ ସୀମିତ ରହୁଥିବାରୁ ନେତା ଓ କର୍ମୀଙ୍କ ମଧ୍ୟରେ ତାଳମେଳ ରହୁନଥିବା କୁହାଯାଉଛି ।
ସେହିଭଳି ଜିଲ୍ଲାରେ କଂଗ୍ରେସ ନିଜର ଆଧିପତ୍ୟ ଜାହିର ପାଇଁ ସଂଘର୍ଷ ଜାରି ରଖିଥିବା ବେଳେ ସବୁ ବେଳେ ସବୁ ସମସ୍ୟାରେ ଆଗକୁ ଆସୁଥିଲେ ମଧ୍ୟ ତାହାକୁ ଭୋଟରେ ରୂପାନ୍ତରିତ କରିପାରିନାହାନ୍ତି । ଜିଲ୍ଲା ସଭାପତି ମନୋଜ ରାଉତ ସବୁ ବେଳେ ଦଳର ଉନ୍ନତି ପାଇଁ ଉଦ୍ୟମ ଜାରି ରଖିଥିଲେ ମଧ୍ୟ ଟାଣୁଆ ପ୍ରାର୍ଥୀ ଚୟନ ସମ୍ଭବ ହୋଇପାରୁନାହିଁ । ଉଭୟ ଜାତୀୟ ଓ ରାଜ୍ୟସ୍ତରରେ ଦଳର ଯାହା ସ୍ଥିତି ତାହା ଜିଲ୍ଲା ରାଜନୀତିରେ ମଧ୍ୟ ସ୍ପଷ୍ଟ ବାରି ହୋଇ ପଡୁଛି । ଗୋଟିଏ ପଟେ ଶାସକ ବିଜେଡିରେ ମାଳ ମାଳ ଆଶାୟୀ ରହିଥିବା ବେଳେ କଂଗ୍ରେସ ପକ୍ଷରୁ ପ୍ରାର୍ଥୀ ଖୋଜା ଅଭିଯାନ ଏଯାବତ ଜାରି ରହିଥିବା କୁହାଯାଉଛି । କଂଗ୍ରେସ ଦଳରେ ସେହିଭଳି ଟାଣୁଆ ତଥା ପ୍ରଭାବଶାଳୀ ନେତା ନଥିବାରୁ ଦଳୀୟ ଚିହ୍ନରେ ଲଢିବାକୁ କିଛି ସ୍ଥାନରେ ନେତା ପଛଘୁଞ୍ଚା ଦେଉଥିବା ଚର୍ଚ୍ଚା ହେଉଛି । ଏପରିକି ପ୍ରାର୍ଥୀ ପାଇଁ ଦଳକୁ ଗଣମାଧ୍ୟମରେ ବିଜ୍ଞାପନ ଦେବାକୁ ପଡିଛି । ଯାହା ଦର୍ଶାଉଛି ଯାଜପୁରରେ କେତେ ଅସହାୟ ଓ ଶକ୍ତିହୀନ ହୋଇପଡିଛି କଂଗ୍ରେସ ।
ସାମ୍ପ୍ରତିକ ସ୍ଥିତିରେ ଯାଜପୁରରେ ବିଜେଡି ପଞ୍ଚାୟତ ରେସରେ ଆଗରେ ରହିଛି । ଏହାସତ୍ତେ୍ୱ ମଧ୍ୟ ଦଳ ପାଇଁ ମୁଣ୍ଡବିନ୍ଧାର କାରଣ ପାଲଟିଛି ଗୋଷ୍ଠୀ କନ୍ଦଳ । ଅନ୍ୟ ନିର୍ବାଚନମଣ୍ଡଳୀରେ ଗୋଷ୍ଠୀ କନ୍ଦଳ ରହିଥିଲେ ମଧ୍ୟ ତାହା ପଞ୍ଚାୟତ ଫଳାଫଳକୁ ଏତେଟା ପ୍ରଭାବିତ କରିବ ବୋଲି ଆଶା ନାହିଁ । କିନ୍ତୁ ବରୀ ନିର୍ବାଚନମଣ୍ଡଳୀରେ ବିଧାୟିକା-ବିଶ୍ୱରଞ୍ଜନଙ୍କ ମଧ୍ୟରେ ଥିବା କନ୍ଦଳ ଏବେ ପୋଷ୍ଟରରୁ ଆରମ୍ଭ ହୋଇ ଗୋଷ୍ଠୀ ସଂଘର୍ଷରେ ପହଞ୍ଚିଲାଣି । ତେଣୁ ଦଳ ଏଠାରେ କାହା ନେତୃତ୍ୱରେ ନିର୍ବାଚନ ଲଢିବ, ପ୍ରାର୍ଥୀ ଚୟନରେ କାହାକୁ ଗୁରୁତ୍ୱ ଦିଆଯିବ ତାହା ଉପରେ ସମସ୍ତଙ୍କର ନଜର ରହିଛି । ବିଧାୟିକା-ବିଶ୍ୱରଞ୍ଜନଙ୍କ ଲଢେଇ ଏବେ ବରୀରେ ବିଜେଡିକୁ ଦୁଇଫାଳ କରିଛି ସତ କିନ୍ତୁ ଏଠାରେ ବିରୋଧୀ ସେତେଟା ସଙ୍ଗଠିତ ନଥିବାରୁ ଏହାର ଫାଇଦା ଅନ୍ୟ ଦଳ ଉଠାଇବ ଏହାର ସମ୍ଭାବନା କ୍ଷୀଣ । ତଥାପି ଏଠାରେ ଦଳର କ୍ରାଇସିସ ମ୍ୟାନେଜର ମୁଣ୍ଡ ଖେଳାଇ କିଛି ସମାଧାନର ବାଟ ବାହାର କରିବେ ବୋଲି ଆଶା ବାନ୍ଧି ବସିଛନ୍ତି କର୍ମୀ । ଆଉ ଯଦି ଏଭଳି ହୁଏ ତେବେ ୫୦-୫୦ ଫର୍ମୁଲାରେ ପଞ୍ଚାୟତ ନିର୍ବାଚନକୁ ଓହ୍ଲାଇବେ ଉଭୟ ବିଧାୟିକା-ବିଶ୍ୱରଞ୍ଜନ ।
ବରୀ ବ୍ୟତୀତ ବଡଚଣାରେ ମଧ୍ୟ ଦଳ ସ୍ଥିତି ଟିକିଏ ଟଳମଳ ରହିଛି । ବଡଚଣାରେ ବରିଷ୍ଠ ରାଜନେତା ତଥା ବିଧାୟକ ଅମର ଶତପଥୀ ଯଦିଓ ଗତ ସାଧାରଣ ନିର୍ବାଚନରେ ବିଜୟ ପାଇଁ ସଂଘର୍ଷ କରିଥିଲେ ତଥାପି ବିଜେଡି ସେଠାରେ ଜିଲ୍ଲା ପରିଷଦ ପଦ ପାଇଁ ବଳ କଷିବାକୁ ପ୍ରସ୍ତୁତ ରହିଛି । ୨୦୧୨ ଓ ୨୦୧୭ ନିର୍ବାଚନରେ ଯାଜପୁର ଜିଲ୍ଲା ପରିଷଦ ଅଧ୍ୟକ୍ଷ ପଦ ଅସଂରକ୍ଷିତ ରହିଥିବା ବେଳେ ୨୦୨୨ ପାଇଁ ଅନୁସୂଚିତ ଜାତି(ମହିଳା) ପାଇଁ ସଂରକ୍ଷିତ ହୋଇଛି । ଯାହାକୁ କି ଶାସକ ବିଜେଡି ହାତେଇପାରେ ବୋଲି ଜିଲ୍ଲା ରାଜନୈତିକ ସ୍ଥିତି ସଂକେତ ଦେଉଛି ।