ଭାରତୀୟ ବୁଡାଜାହାଜକୁ ରୋକିବା ନେଇ ଦାବି କଲା ପାକିସ୍ତାନ ନୌସେନା, ଭିଡିଓ କଲା ଜାରି…
କନକ ବ୍ୟୁରୋ: ବିଶ୍ୱକପରେ ଭାରତ-ପାକିସ୍ତାନ ମ୍ୟାଚକୁ ନେଇ ଏବେ ଫ୍ୟାନ୍ସଙ୍କ ଭିତରେ ପ୍ରବଳ ଉତ୍ସାହ ଦେଖିବାକୁ ମିଳିଛି । ହେଲେ ଏହାରି ଭିତରେ ପାକିସ୍ତାନୀ ନୌସେନା ଭାରତ ଉପରେ ଲଗାଇଛି ଏକ ଗମ୍ଭୀର ଆରୋପ । ପାକିସ୍ତାନ ନୌସେନା ଏକ ଭିଜିଓ ଜାରି କରି କହିଛି, ଭାରତର ଏକ ବୁଡା ଜାହାଜ ପାକିସ୍ତାନର ଜଳକ୍ଷେତ୍ରରେ ପ୍ରବେଶ କରିବାକୁ ଉଦ୍ୟମ କରୁଥିଲା । ଯାହାକୁ ପାକିସ୍ତାନ ଚିହ୍ନଟ କରିବା ସହିତ ତାର ରାସ୍ତାକୁ ରୋକିଛି ।
Kanak News is now on WhatsApp
Join and get latest news updates delivered to you via WhatsApp
ଇଣ୍ଟର ସର୍ଭିସ୍ ପବ୍ଲିକ୍ ରିଲେସନ୍ସ (ଆଇଏସପିଆର)ର କହିବା ମୁତାବକ, ପାକିସ୍ତାନୀ ନୌସେନା ଭାରତୀୟ ନୌସେନାର ଏକ ବୁଡା ଜାହାଜକୁ ପାକିସ୍ତାନୀ ଜଳକ୍ଷେତ୍ରରେ ପ୍ରବେଶ କରୁଥିବା ଦେଖିବାକୁ ପାଇଥିଲା । ଏହି ସମୟରେ ପାକିସ୍ତାନୀ ନୌସେନା ଏହି ବୁଡାଜାହାଜର ରାସ୍ତାକୁ ରୋକିବା ସହିତ ଏହାକୁ ବାଧା ଦେବାରେ ସକ୍ଷମ ହୋଇଛି । ତେବେ ଏହି ଘଟଣା ଅକ୍ଟୋବର ୧୬ ତାରିଖର ବୋଲି କୁହାଯାଇଛି । ପାକିସ୍ତାନ ନୌସେନା ପକ୍ଷରୁ କୁହାଯାଇଛି ଯେ, ପ୍ରଥମେ ସେମାନେ ଏହି ବୁଡାଜାହାଜକୁ ଟ୍ରାକ୍ କରିଥିଲେ । ଏହାପରେ ତାକୁ ପାକିସ୍ତାନୀ ଜଳକ୍ଷେତ୍ରରେ ପ୍ରବେଶ କରିବାକୁ ରୋକିଥିଲେ । ହେଲେ ଏହା ପ୍ରଥମ ଥର ନୁହେଁ, ଏହାପୂର୍ବରୁ ମଧ୍ୟ ଭାରତୀୟ ନୌସେନା ଦୁଇ ଦୁଇ ଥର ଏଭଳି ଚେଷ୍ଟା କରିସାରିଛି ବୋଲି ପାକିସ୍ତାନ ନୌସେନା ପକ୍ଷରୁ କୁହାଯାଇଛି ।
Indian submarine prevented from entering Pakistan’s waters by the Pakistan Navy. #Pakistan #Navy #India #PakvsInd pic.twitter.com/TrzaZnNLcg
— Hamza Azhar Salam (@HamzaAzhrSalam) October 19, 2021
ପାକିସ୍ତାନୀ ଖବରକାଗଜ ଡନ୍ ମୁତାବକ, ୨୦୧୯ ମସିହା ମାର୍ଚ୍ଚ ମାସରେ ପାକିସ୍ତାନୀ ନୌସେନା ଭାରତର ଏକ ବୁଡାଜାହାଜକୁ ପାକିସ୍ତାନ ଜଳକ୍ଷେତ୍ରରେ ପାଇଥିଲା । ହେଲେ ପାକିସ୍ତାନୀ ନୌସେନା ଏହାକୁ ନଷ୍ଟ ନକରି ଶାନ୍ତିପଥ ଆପଣାଇଥିଲା । ତେବେ ସେହି ସମୟରେ ନୌସେନା ପ୍ରବକ୍ତା କହିଥିଲେ ଯେ, ପାକିସ୍ତାନୀ ଜଳକ୍ଷେତ୍ରରେ ପ୍ରବେଶ କରିବା ସମୟରେ ସେମାନେ ଗୋଟିଏ ଭାରତୀୟ ବୁଡାଜାହାଜକୁ ପାଇଛନ୍ତି । ଏଥିପାଇଁ ପାକିସ୍ତାନ ନିଜର ଉନ୍ନତ ଜ୍ଞାନକୌଶଳର ବ୍ୟବହାର କରିଥିଲା । ତେବେ ଏହାପୂର୍ବରୁ ୨୦୧୬ରେ ମଧ୍ୟ ପାକିସ୍ତାନ ଏଭଳି କାମ କରିଦେଖାଇଥିଲା ବୋଲି ପାକିସ୍ତାନୀ ଖବରକାଗଜରେ ରିପୋର୍ଟ ପ୍ରକାଶ ପାଇଛି ।
ସଂଯୁକ୍ତ ରାଷ୍ଟ୍ର କନେକ୍ସନର ସମୁଦ୍ର ନିୟମ ମୁତାବକ, କୌଣସି ଦେଶ ଅନ୍ୟ ଦେଶର ବିନା ଅନୁମତିରେ ଅନ୍ୟ ଦେଶର ଜଳକ୍ଷେତ୍ରରେ ପ୍ରବେଶ କରିପାରିବ ନାହିଁ । ତେବେ ଏହି ଘଟଣାରେ ଏଯାବତ ଭାରତୀୟ ନୌସେନା କୌଣସି ବିଧିବଦ୍ଧ ଘୋଷଣା କରିନାହି । ତେବେ ଭାରତୀୟ ସୂତ୍ରରୁ ମିଳିଥିବା ସୂଚନା ମୁତାବକ, ପାକିସ୍ତାନର ଏହି ଦାବିକୁ ଭାରତ ଖାରଜ କରିଛି ।