ମୋଦିଙ୍କ କୂଟନୀତି ଆଗରେ ଇମ୍ରାନ୍ ଖାନଙ୍କ ଷଡ଼ଯନ୍ତ୍ର ଫିକା : ପାକ୍ କହିଲା, ପ୍ରଥମେ ବ୍ୟବହାର କରିବୁ ନାହିଁ ପରମାଣୁ ଅସ୍ତ୍ର
କନକ ବ୍ୟୁରୋ : ଭାରତ ବିରୋଧରେ ପ୍ରତିଦିନ ବିଷ ଓଗାଳୁଥିବା ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ଶାନ୍ତ ପଡିଛନ୍ତି । ଜାମ୍ମୁକାଶ୍ମୀରରୁ ଧାରା ୩୭୦ ଉଛେଦ ପର ଠାରୁ ପ୍ରତିଦିନ ପାକିସ୍ତାନରୁ ଆସୁଥିଲା ପରମାଣୁ ଯୁଦ୍ଧର ଧମକ । ଏହାକୁ ନେଇ ବିଶ୍ୱମଂଚରେ ପାକିସ୍ତାନ ଏକ ଘରିକିଆ ହୋଇଯିବା ପରେ ନାକେଦମ ହୋଇଥିଲା । ଏହା ପରେ ଏବେ ସାମ୍ନାକୁ ଆସିଛି ଇମ୍ରାନଙ୍କ ଥଣ୍ଡା ଅବତାର । ଇମ୍ରାନ୍ କହିଛନ୍ତି ଭାରତ ବିପକ୍ଷରେ ପାକିସ୍ତାନ କେବେ ପ୍ରଥମେ ପରମାଣୁ ଆକ୍ରମଣ କରିବ ନାହିଁ । ଏହା ହିଁ ପ୍ରମାଣ କରୁଛି ବିଶ୍ୱରେ ଏକ ଘରିକିଆ ହେବା ପରେ ପାକିସ୍ତାନର ମନୋଭାବ ନରମ ପଡିଗଲାଣି ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନ ବିଦେଶ ମନ୍ତ୍ରୀ ଶାହା ମେହମୁଦ କ୍ୟୁରେସୀ ଭାରତ ସହିତ ଦ୍ୱିପାକ୍ଷିକ ଆଲୋଚନା ପାଇଁ ପ୍ରଥମେ ମତ ରଖିଥିଲେ । ପାକ୍ ବିଦେଶ ମନ୍ତ୍ରୀଙ୍କ ଏହି ବୟାନ ପରେ ପରେ ସ୍ୱର ବଦଳାଇ ଦେଇଛନ୍ତି ଇମ୍ରାନ୍ ଖାନ୍ । କହିଛନ୍ତି କାଶ୍ମୀରକୁ ନେଇ ଭାରତ ସହିତ ଯୁଦ୍ଧ ହେଲେ ପାକିସ୍ତାନ କେବେ ପ୍ରଥମେ ପରମାଣୁ ଅସ୍ତ୍ର ବ୍ୟବହାର କରିବ ନାହିଁ । କାଶ୍ମୀର ପ୍ରସଙ୍ଗକୁ ନେଇ ବିଶ୍ୱ ମଂଚରେ ହଟହଟା ହୋଇଯିବା ପରେ ଏହା ହେଉଛି ଇମ୍ରାନଙ୍କ ବଦଳୁଥିବା ସ୍ୱର । କିଛି ଦିନ ତଳେ ଏହି ଇମ୍ରାନ୍ କହିଥିଲେ ପରମାଣୁ ଶକ୍ତି ସଂପନ୍ନ ଦୁଇଟି ଦେଶ ମଧ୍ୟରେ ଯୁଦ୍ଧ ହେଲେ , ଏଥିରେ କେବଳ ଏହି ଦୁଇ ଦେଶ ନୁହଁନ୍ତି, ବରଂ ସାରା ବିଶ୍ୱ ପ୍ରଭାବିତ ହେବ ।
ଏହାକୁ ନେଇ ଆମେରିକାକୁ ହସ୍ତକ୍ଷେପ କରିବାକୁ ଗୁହାରୀ କରିଥିଲା ପାକ୍ । ନିକଟରେ ଋଷରେ ଶେଷ ହୋଇଥିବା ଜି ସେଭେନ୍ ବୈଠକରେ ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଓ ଭାରତ ପ୍ରଧାନମନ୍ତ୍ରୀ ମୋଦିଙ୍କ ମଧ୍ୟରେ ଆଲୋଚନା ପରେ , ଟ୍ରମ୍ପ କହିଥିଲେ ଦୁଇ ଦେଶ ଆଲୋଚନା ମାଧ୍ୟମରେ ସମସ୍ୟାର ସମାଧାନ କରନ୍ତୁ । ଭାରତ ମଧ୍ୟ କୌଣସି ତୃତୀୟ ପକ୍ଷର ହସ୍ତକ୍ଷେପକୁ ସିଧାସଳଖ ମନା କରିଥିଲା । କାଶ୍ମୀରକୁ ନେଇ ବିଶ୍ୱ ମଂଚରେ ଚାରି ଆଡୁ ବାଟ ବନ୍ଦ ହେବା ପରେ ବାଧ୍ୟ ହୋଇ ନିଜର ସ୍ୱର ବଦଳାଇଛନ୍ତି ପାକ୍ ପ୍ରଧାନମନ୍ତ୍ରୀ ଇମ୍ରାନ୍ ଖାନ୍ ।