ଧାରା-୩୭୦ ହଟିବା ପରେ ବିଚଳିତ ପାକ୍ ! ବକ୍ରି-ଇଦରେ ଭାରତୀୟ ଯବାନଙ୍କ ଠାରୁ ମିଠା ନେଲାନି ପାକିସ୍ତାନ ।

କନକ ବ୍ୟୁରୋ : ଭାରତୀୟ ଯବାନଙ୍କ ଠାରୁ ମିଠା ନେବାକୁ ମନାକଲା ପାକିସ୍ତାନ । ଆଜି ଇଦ-ଉଲ-ଜୁହା ଅବସରରେ ପାକିସ୍ତାନ ଭାରତୀୟ ବିଏସଏଫଙ୍କ ଠାରୁ ମିଠା ଗ୍ରହଣ କରିନାହିଁ । ଚଳିତ ବକ୍ରି ଇଦରେ କାଶ୍ମୀରର ହୁସେନବାଲା ସୀମାରେ ଚଳିତ ଥର ମିଠା ଆଦାନ ପ୍ରଦାନ ହୋଇପାରିନାହିଁ । ପ୍ରତି ବଡ଼ ବଡ଼ ଉତ୍ସବରେ ଯେପରି ଅଟାରୀ ଓ ୱାଘା ସୀମାରେ ପାକିସ୍ତାନ ଓ ଭାରତ ମଧ୍ୟରେ ମିଠା ଦିଆନିଆ କରି ଖୁସି ବଂଟା ଯାଉଥିଲା ତାହା ଏଥର ହୋଇନାହିଁ ।

ପ୍ରତିବର୍ଷ ପରି ଏଥର ମଧ୍ୟ ବିଏସଏଫ ଯବାନ ଅନ୍ତରାଷ୍ଟ୍ରୀୟ ସୀମାରେ ମିଠା ଦେବା ପାଇଁ ପ୍ରସ୍ତୁତି କରିଥିଲା । କିନ୍ତୁ ପାକିସ୍ତାନ ବିଏସଏଫଙ୍କ ଠାରୁ ମିଠା ନେବାକୁ ମନା କରିଦେଇଛି । ଜଣେ ବିଏସଏଫ ଯବାନ କହିଛନ୍ତି ପ୍ରତିବର୍ଷ ଉତ୍ସବରେ ପାକିସ୍ତାନ ତରଫରୁ ମିଠା ଦେଣନେଣ ପାଇଁ ସନ୍ଦେଶ ଆସୁଥିଲା କିନ୍ତୁ ଚଳିତ ଥର ତାହା ଆସିନାହିଁ । ଜମ୍ମୁ କଶ୍ମୀରକୁ ନେଇ ପାକିସ୍ତାନ ଓ ଭାରତ ମଧ୍ୟରେ ତିକ୍ତତା ବଢ଼ିବାରେ ଲାଗିଛି । ଧାରା ୩୭୦ ଉଚ୍ଛେଦ ପରେ ଭାରତ ପାକିସ୍ତାନ ମଧ୍ୟରେ ପୂର୍ବରୁ ଲାଗି ରହିଥିବା ଶତୃତା ଅଧିକ ହୋଇଛି ।