କନକ ବ୍ୟୁରୋ: ଭାରତ ସହିତ ଯୁଦ୍ଧ ହେଲେ ଏବେ କ’ଣ ହେବ ପାକିସ୍ତାନର ସ୍ଥିତି । ଏନେଇ ବିଦେଶୀ ଗଣମାଧ୍ୟମକୁ ସାକ୍ଷାତକାରରେ ବଡ ବୟାନ ଦେଇଛନ୍ତି ପାକିସ୍ତାନ ପ୍ରଧାନମନ୍ତ୍ରୀ ଇମ୍ରାନ ଖାନ୍ । ଇମ୍ରାନ୍ ନିଜର ସାକ୍ଷାତକାରରେ ଖୋଲାଖୋଲି ଭାବରେ କହିଛନ୍ତି ଯେ, ଯଦି ବର୍ତ୍ତମାନ ଭାରତ ବିପକ୍ଷରେ ପାରମ୍ପରିକ ଯୁଦ୍ଧ ହେଲେ , ପୁରାପୁରି ହାରିଯିବ ପାକିସ୍ତାନ । ତେବେ ଇମ୍ରାନ୍ ଏହା ବି କହିଛନ୍ତି ପାକିସ୍ତାନ କେବେ ନିଜ ଆଡୁ ଯୁଦ୍ଧ ଆରମ୍ଭ କରିବନି । ସେ ନିଜେ ଯୁଦ୍ଧ ହେଉ ବୋଲି ବି ଚାହଁନ୍ତିନାହିଁ । କିନ୍ତୁ ଭାରତ ଓ ପାକିସ୍ତାନ ମଧ୍ୟରେ ଯଦି ଯୁଦ୍ଧ ଆରମ୍ଭ ହୁଏ , ତେବେ ଏହା ପରମାଣୁ ଯୁଦ୍ଧରେ ହିଁ ଶେଷ ହେବ ।
Kanak News is now on WhatsApp
Join and get latest news updates delivered to you via WhatsApp
ଇମ୍ରାନ ଖାନଙ୍କ ଏହି ସ୍ୱୀକାରୋକ୍ତି ହିଁ ପ୍ରମାଣ କରୁଛି ଯେ, ଭାରତ ସାମ୍ନାରେ ପାକିସ୍ତାନର ସ୍ଥିତି କ’ଣ? ମୁହାଁମୁହିଁ ଯୁଦ୍ଧରେ ଭାରତ ଆଗରେ ପାକିସ୍ତାନ ଅଧିକ ଦିନ ତିଷ୍ଟି ରହିପାରିବ ନାହିଁ ଏକଥା କାହାକୁ ଅଛପା ନାହିଁ । କିନ୍ତୁ ସବୁ ଜାଣି ଅଜଣା ହେବାର ଅଭିନୟ କରୁଥିବା ପାକିସ୍ତାନ ଶେଷରେ ଗଣମାଧ୍ୟମ ସାମ୍ନାରେ ସ୍ୱୀକାର କରିଛନ୍ତି ଯେ, ଭାରତ ସହ ସମ୍ମୁଖଯୁଦ୍ଧ କଲେ ପାକିସ୍ତାନ ହିଁ ହାରିବ ।
ଅଲ ଜେଜିରାକୁ ଏକ ସାକ୍ଷତାକାର ଦେଇ ଇମ୍ରାନ କହିଛନ୍ତି-ଯଦି ଯୁଦ୍ଧ ପରିସ୍ଥିତି ସୃଷ୍ଟି ହୁଏ, ପାକିସ୍ତାନ ପ୍ରଥମେ ପରମାଣୁ ଯୁଦ୍ଧ ଆରମ୍ଭ କରିବ ନାହିଁ । କିନ୍ତୁ ପାକିସ୍ତାନ ନିଜର ସୁରକ୍ଷା ପାଇଁ ମୃତ୍ୟୁ ପର୍ଯ୍ୟନ୍ତ ଲଢେଇ କରିବ । ଏତିକିରେ ଇମ୍ରାନ୍ ଅଟକିଯାଇନାହିଁନ୍ତି ବରଂ କହିଛନ୍ତି-ଯେତେବେଳେ ଗୋଟିଏ ପରମାଣୁ ଶକ୍ତି ସମ୍ପନ୍ନ ରାଷ୍ଟ୍ର ଶେଷ ନିଶ୍ୱାସ ଯାଏଁ ଲଢ଼ିବାକୁ ନିର୍ଣ୍ଣୟ କରେ ସେତେବେଳେ ପରିଣାମ ଭୟବହ ହୁଏ ।
ଯେତେବେଳେ ପାକିସ୍ତାନ ସାରା ବିଶ୍ୱରେ ଏକ ଘରିଆକିଆ ହୋଇସାରିଛି, ଜାତିସଂଘରୁ ଆରମ୍ଭ କରି ବଡ ବଡ ମୁସଲିମ୍ ଦେଶ ପାକିସ୍ତାନ ପକ୍ଷରେ ଠିଆ ହେବାକୁ ନାକ ଟେକୁଛନ୍ତି ସେତେବେଳେ ସେଇ ପୁରୁଣା ପରମାଣୁ କଥା ଉଠାଇଛି ପାକିସ୍ତାନ । ସିଧାସଳଖ ନହେଲେ ବି ପରୋକ୍ଷରେ ପରମାଣୁ ଯୁଦ୍ଧ ଆଡକୁ ଇସାରା କରିଛନ୍ତି ଇମ୍ରାନ ଖାନ୍ । ଆଉ ଏହି ପରମାଣୁ ଯୁଦ୍ଧର ଧମକକୁ ଫୁଁରେ ଉଠାଇ ସାରିଛି ଭାରତ ।କାଶ୍ମୀରୁ ୩୭୦ ଧାରା ଉଚ୍ଛେଦ, ପାକ୍ ଅଧିକୃତ କାଶ୍ମୀରରେ ଅସ୍ଥିରତା, ଜାତିସଂଘରୁ ଝଟ୍କା ଏଭଳି ତମାମ୍ ଘଟଣା ପରେ ଏବେ ଯେମିତି ପାକିସ୍ତାନ ପ୍ରଧାନମନ୍ତ୍ରୀଙ୍କୁ ବାଉଳା କରିଦେଇଛି ।