ପରମାଣୁ ଶକ୍ତିରେ ଆଗୁଆ କିଏ, ସିପ୍ରି ରିପୋର୍ଟରେ ସାମ୍ନାକୁ ଆସିଲା ବଡ ତଥ୍ୟ? ଦ୍ରୁତ ଗତିରେ ପରମାଣୁ କ୍ଷମତା ବଢାଉଛି ଚୀନ୍, ଭାରତ ଠାରୁ ପାକିସ୍ତାନ ପାଖରେ ଅଛି ଅଧିକ ନ୍ୟୁକ୍ଲିୟର ବମ୍ ।
କନକ ବ୍ୟୁରୋ : ସୀମାରେ ଚୀନ୍ ସହ ଭାରତର ବିବାଦ ଥମୁନଥିବା ବେଳେ ପାକିସ୍ତାନରେ ଥିବା ଭାରତ ଉଚ୍ଚାୟୁକ୍ତର ଦୁଇ କର୍ମଚାରୀ ନିଖୋଜ ହୋଇଛନ୍ତି । ସୀମାକୁ ଲାଗି ରହିଥିବା ଏହି ଦୁଇ ଦେଶ ସହ ସର୍ବଦା ଉତ୍ତେଜନା ଲାଗି ରହୁଛି । ଏପରିକି ଗତ କିଛି ଦିନ ହେବ ସୀମାରେ ଚୀନ୍ ସହ ମୁହାଁମୁହିଁ ସ୍ଥିତିରେ ରହିଛି ଭାରତୀୟ ସେନା । ଆଉ ଏସବୁ ଭିତରେ ଷ୍ଟକହୋମ ଇଣ୍ଟରନ୍ୟାସନାଲ ପିସ୍ ରିସର୍ଚ୍ଚ ଇନଷ୍ଟିଚ୍ୟୁଟ (ସିପ୍ରି)ର ଏକ ରିପୋର୍ଟ ଏବେ ସାମ୍ନାକୁ ଆସିଛି । ଯେଉଁଥିରେ ପରମାଣୁ ଶକ୍ତି ସମ୍ପନ୍ନ ରାଷ୍ଟ୍ର ଗୁଡିକର ନ୍ୟୁକ୍ଲିୟର ବମ୍ ବାବଦରେ ବଡ ତଥ୍ୟ ପ୍ରକାଶ ପାଇଛି ।
Kanak News is now on WhatsApp
Join and get latest news updates delivered to you via WhatsApp
ଷ୍ଟକହୋମ ଇଣ୍ଟରନ୍ୟାସନାଲ ପିସ୍ ରିସର୍ଚ୍ଚ ଇନଷ୍ଟିଚ୍ୟୁଟ (ସିପ୍ରି) ଦ୍ୱାରା ଇୟରବୁକ୍ ୨୦୨୦ରେ ପ୍ରକାଶିତ ରିପୋର୍ଟ ଅନୁଯାୟୀ, ପରମାଣୁ ଶକ୍ତିରେ ଭାରତ ଚୀନ୍ ଓ ପାକିସ୍ତାନ ଠାରୁ ପଛରେ ରହିଛି । ଖାସକରି ଚୀନ୍ ନିଜର ପରମାଣୁ ଶକ୍ତିକୁ ଦ୍ରୁତ ଗତିରେ ଆଗକୁ ବଢାଇବାରେ ଲାଗିଛି । ସେହିଭଳି ପାକିସ୍ତାନ ମଧ୍ୟ ଏହି ରେସରେ ପଛରେ ନାହିଁ । ସବୁଠୁ ବଡ କଥା ହେଉଛି, ଚୀନ୍ ଓ ପାକିସ୍ତାନ ଠାରୁ ଭାରତ ପାଖରେ କମ ପରମାଣୁ ଅସ୍ତ୍ର ରହିଛି । ସିପ୍ରିର ରିପୋର୍ଟ ଅନୁଯାୟୀ, ଭାରତ ପାଖରେ ୧୫୦ଟି ପରମାଣୁ ବୋମା ରହିଥିବା ବେଳେ ପାକିସ୍ତାନ ପାଖରେ ୧୬୦ ଓ ଚୀନ୍ ପାଖରେ ଭାରତର ଦୁଇଗଣା ଅଥାର୍ତ ୩୨୦ ପରମାଣୁ ଅସ୍ତ୍ର ମହଜୁଦ୍ ରହିଛି ।
ଚୀନ୍ ଲଗାତାର ନିଜର ପରମାଣୁ ଶକ୍ତିକୁ ବିକଶିତ କରିବା ସହ ପରମାଣୁ ଅସ୍ତ୍ରକୁ ବଢାଉଥିବା ବେଳେ ଭାରତ ଓ ପାକିସ୍ତାନ ମଧ୍ୟ ଧୀରେ ଧୀରେ ପରମାଣୁ କ୍ଷମତାକୁ ବଢାଇବା ଆରମ୍ଭ କରିଛନ୍ତି । ତେବେ ବିଶ୍ୱର ୯୦ ପ୍ରତିଶତ ପରମାଣୁ ଅସ୍ତ୍ର ରଖିଥିବା ଆମେରିକା ଓ ଋଷ ପୂର୍ବପେକ୍ଷା ପରମାଣୁ ଅସ୍ତ୍ର କମ କରିବା ଆରମ୍ଭ କରିଛନ୍ତି । ଜାନୁଆରୀ ୨୦୨୦ ସୁଦ୍ଧା ବିଶ୍ୱର ୯ ପରମାଣୁ ଶକ୍ତି ସମ୍ପନ୍ନ ରାଷ୍ଟ୍ର ପାଖରେ ଏବେ ୧୩୪୦୦ ପରମାଣୁ ବୋମା ରହିଥିବା ରିପୋର୍ଟରେ କୁହାଯାଇଛି ।
୬୩୭୫ଟି ନ୍ୟୁକ୍ଲିୟର ବମ୍ ସହ ଋଷ ତାଲିକାର ଶୀର୍ଷରେ ରହିଥିବା ବେଳେ ୫୮୦୦ ନ୍ୟୁକ୍ଲିୟର ବମ୍ ସହ ଦ୍ୱିତୀୟ ସ୍ଥାନରେ ରହିଛି ଆମେରିକା । ସେହିଭଳି ୩୨୦ ପରମାଣୁ ଅସ୍ତ୍ର ସହ ଚୀନ୍ ତୃତୀୟ , ୧୬୦ ପରମାଣୁ ବୋମା ସହ ପାକିସ୍ତାନ ୬ଷ୍ଠ, ୧୫୦ ପରମାଣୁ ବୋମା ମହଜୁଦ୍ ରଖି ଭାରତ ତାଲିକାର ସପ୍ତମ ସ୍ଥାନରେ ରହିଛି । ତେବେ ଉଭୟ ଆକାଶ ଓ ଜଳପଥରେ ଭାରତ ନିଜର ପରମାଣୁ ଶକ୍ତିକୁ ବୃଦ୍ଧି କରୁଛି । ସିପ୍ରି ରିପୋର୍ଟ ମୁତାବକ, ଆକାଶପଥରୁ ଟାର୍ଗେଟକୁ ଭେଦ କରିବା ପାଇଁ ଭାରତ ପ୍ରାୟ ୪୮ଟି ନ୍ୟୁକ୍ଲିୟର ବମ୍ ବିଭିନ୍ନ ଏୟାରକ୍ରାଫ୍ଟରେ ମହଜୁଦ୍ ରଖିଛି । ସେହିଭଳି ଆଇଏନଏସ ଅରିହନ୍ତକୁ ମଧ୍ୟ ନ୍ୟୁକ୍ଲିୟର ଶକ୍ତି ସମ୍ପନ୍ନ କରାଯାଇଛି । ଯାହାଫଳରେ ଜଳପଥରେ ମଧ୍ୟ ପରମାଣୁ ଆକ୍ରମଣ କରିପାରିବ ଭାରତ ।