ଭାରତ ଆକାଶରେ ଚକ୍କର କାଟିଲା ପାକିସ୍ତାନ ଚପର । ହଠାତ୍ ଗୁଳିବର୍ଷା କଲେ ଯବାନ, ଅଘଟଣ ପୂର୍ବରୁ ଖସି ପଳାଇଲେ ପାକିସ୍ତାନୀ
କନକ ବ୍ୟୁରୋ : ସୀମା ଲଙ୍ଘିଲା ପାକିସ୍ତାନ । ବର୍ଡର ସେପଟୁ ଗୁଳିଗୋଳା ବର୍ଷଣ କରୁଥିବା ପାକିସ୍ତାନ ଆଜି ଆଉ ଏକ ପାଦ ଆଗକୁ ଯାଇ ଆକାଶରେ ସୀମା ଉଲ୍ଲଙ୍ଘନ କରିବାକୁ ବି ପଛାଇ ନାହିଁ । ପୁଂଚ ସେକ୍ଟରରେ ଲାଇନ ଅଫ କଂଟ୍ରୋଲ ଉପରେ ପଶି ଆସିଥିଲା ପାକିସ୍ତାନୀ ହେଲିକପଟର । ତୁରନ୍ତ ଏହା ଭାରତୀୟ ସେନାର ନଜରକୁ ଆସିଲା । ଏବଂ ସେନା ମଧ୍ୟ କାର୍ଯ୍ୟାନୁଷ୍ଠାନ ଆରମ୍ଭ କଲା । ହେଲିକପଟର ଉପରକୁ ଗୁଳି ଚଳାଇବା ନେଇ ମଧ୍ୟ ଖବର ହସ୍ତଗତ ହୋଇଛି । ତେବେ ହେଲିକପଟରଟିକୁ ଘଉଡେଇବା ପାଇଁ ଗୁଳି ଚଳାଯାଇଥିଲା ବୋଲି ସୂଚନା ମିଳିଛି । କିଛି ଗଣମାଧ୍ୟମରେ ପ୍ରକାଶ ପାଇଥିବା ରିପୋର୍ଟ ଅନୁସାରେ ଏହି ହେଲିକପଟରରେ ପାକ ଅଧିକୃତ କାଶ୍ମୀରର ପ୍ରଧାନମନ୍ତ୍ରୀ ଥିଲେ । ତେବେ ଏନେଇ କିଛି ସ୍ପଷ୍ଟ ପ୍ରମାଣ ମିଳିନାହିଁ । ପାକିସ୍ତାନ ପକ୍ଷରୁ ମଧ୍ୟ ଏଯାଏଁ କୌଣସି ସ୍ପଷ୍ଟି କରଣ ଦିଆଯାଇନାହିଁ ।
Kanak News is now on WhatsApp
Join and get latest news updates delivered to you via WhatsApp
ଆକାଶମାର୍ଗରୁ ଆତଙ୍କର ଆଭାସ ନେଇ ଶତ୍ରୁ ସୀମା ଆଡୁ ମାଡ଼ି ଆସୁଥିବା ଚପରକୁ ନେଇ ଏବେ ଦେଶବ୍ୟାପୀ ଚର୍ଚ୍ଚା । ପାକ୍ ଅଧିକୃତ କାଶ୍ମୀର ପଟୁ ସୀମା ଡେଇଁ ଉଡି ଆସୁଥିବା ଧଳା ରଙ୍ଗର ଚପର, କିଛି ଅଘଟଣ ଘଟଣାଇବା ପୂର୍ବରୁ ଫେରିଯାଇଛି ନିଜ ମାଟିକୁ । କାରଣ ଏହି ଚପରକୁ ଟାର୍ଗେଟ୍ କରି ଯେତେବେଳେ ଭାରତୀୟ ଯବାନ ଫାଏରିଂ କରିବା ଆରମ୍ଭ କରିଦେଲେ, ଜୀବନ ବିକଳରେ ଫେରିଯାଇଛି
ଦିନ ୧୨ଟା ୧୦ । କାଶ୍ମୀର ପୁଂଜ୍ ସେକ୍ଟରରେ ସୀମା ପାର ହେଇ ଭାରତୀୟ ସୀମାର ପ୍ରାୟ ୭ଶହ ମିଟର ଯାଏଁ ପଶି ଆସିଥିଲା ପାକିସ୍ତାନ ପଟରୁ ଧଳା ରଙ୍ଗର ଚପର । ଦ୍ୱୀପାକ୍ଷିକ ଚୁକ୍ତିର ଖୋଲାଖୋଲି ଉଲଂଘନ କରି ଭାରତର ଆକାଶରେ ଘୁରି ବୁଲୁଥିବା ଚପର ଉପରେ ଯେତେବେଳେ ଭାରତୀୟ ଯବାନଙ୍କ ନଜର ପଡ଼ିଲା । ସୁରକ୍ଷାକୁ ଦୃଷ୍ଟିରେ ରଖି ଆରମ୍ଭ କରିଦେଲେ କାର୍ଯ୍ୟାନୁଷ୍ଠାନ । ଚପରକୁ ଟର୍ଗେଟ୍ କରି ଆରମ୍ଭ ହେଲା ଫାଏରିଂ ।
ଠିକ୍ ଗୋଟିଏ ଦିନ ପୂର୍ବରୁ ଜାତିସଂଘରେ ଯେତେବେଳେ ବୈଦେଶିକ ମନ୍ତ୍ରୀ ସୁଷମା ସ୍ୱରାଜ, ପାକିସ୍ତାନର ଆତଙ୍କବାଦୀ କାର୍ଯ୍ୟକଳାପ ନେଇ ସାରା ବିଶ୍ୱକୁ ଅବଗତ କରୁଥିଲେ, ତାର ଠିକ୍ ଗୋଟିଏ ଦିନ ପରେ ଭାରତୀୟ ସୀମାରେ ଉଡୁଛି ପାକିସ୍ତାନୀ ଚପର । ଯାହା ପାକିସ୍ତାନର ଆଭିମୁଖ୍ୟକୁ ସ୍ପଷ୍ଟ କରୁଛି ।
ଭାରତ-ପାକିସ୍ତାନର ଦ୍ୱିପାକ୍ଷକ ଚୁକ୍ତି ଅନୁସାରେ-
– ରୋଟାରୀ ୱିଙ୍ଗ ଏୟାରକ୍ରାଫ୍ଟ ଆକାଶ ସୀମାଠାରୁ ଗୋଟିଏ କିଲୋମିଟର ଦୂର ଯାଏଁ ଉଡି ପାରିବ ।
– ଲଢ଼ୁଆ ବିମାନ ଆକାଶ ସୀମାଠାରୁ ଅତି କମ୍ରେ ୧୦ କିଲୋମିଟର ଦୂର ଯାଏଁ ଉଡିପାରିବ ।
ହେଲେ ଚୁକ୍ତିର ଖୋଲାଖୋଲି ଉଲଂଘନ କରି ମାଡି ଆସିଛି ପାକିସ୍ତାନୀ ଚପର । ପାକିସ୍ତାନ ପାଇଁ ଏହା ପ୍ରଥମ ଥର ନୁହେଁ । ଗତ ଫେବୃୟାରୀମାସରେ ମଧ୍ୟ ଅନୁରୁପ ଭାବରେ ପାକ୍ ସେନାର ଏକ ହେଲିକପ୍ଟର ଭାରତୀୟ ସୀମାକୁ ଅତିକ୍ରମ କରିଥିଲା ।