କନକ ବ୍ୟୁରୋ : ସାରା ବିଶ୍ୱରେ ଧାର୍ମିକ ମୌଳବାଦୀମାନେ ଏବେ କାୟା ବିସ୍ତାର କରିବାରେ ଲାଗିଛନ୍ତି । ଗରିବ ଭୋକରେ ମରୁଛି, ବେରୋଜଗାରୀ ରୋଜଗାର ଚିନ୍ତାରେ ଷଢୁଛି, ବିଶ୍ୱ ସ୍ୱାସ୍ଥ୍ୟର ଭିତ୍ତିଭୂମି କରୋନା ମହାମାରୀ ଉଜାଗର କରିଛି ଆଉ ମହିଳା ସୁରକ୍ଷା କେବଳ ଭୋଟ ରାଜନୀତିରେ ଅଟକିଛି । ଏତେସବୁ ସମସ୍ୟା ବିଶ୍ୱ ମାନବ ସଭ୍ୟତା ପାଇଁ ଚ୍ୟାଲେଞ୍ଜ ସୃଷ୍ଟି କରିଥିବା ବେଳେ ବିଶ୍ୱର କିଛି ଧାର୍ମିକ ମୌଳବାଦୀ ସଂଗଠନ ଏସବୁ ସମସ୍ୟା ଉପରୁ ଲୋକଙ୍କ ଧ୍ୟାନ ହଟାଇବାକୁ ଯୋଜନା ବଦ୍ଧ ଭାବେ ଅଶାନ୍ତି ସୃଷ୍ଟି କରିବାରେ ଲାଗିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ଏହି କ୍ରମରେ ପ୍ରଥମେ ବାଂଲାଦେଶରେ ହିନ୍ଦୁ ମନ୍ଦିର ଉପରେ ଆକ୍ରମଣ ଘଟଣାକୁ ନେଇ ସାରା ବିଶ୍ୱରେ ଆଲୋଚନା ଚାଲିଥିବା ବେଳେ ପାକିସ୍ତାନ ତାର ଚିରାଚରିତ ଢଙ୍ଗରେ ପୁଣି ହିନ୍ଦୁ ଧର୍ମ ଉପରେ ଆକ୍ରମଣ ଆରମ୍ଭ କରିଛି । ପାକିସ୍ତାନର ସିନ୍ଧ ଅଞ୍ଚଳ କଟୋରୀ ଠାରେ କିଛି ଅଜ୍ଞାତ ବ୍ୟକ୍ତି ଏକ ହିନ୍ଦୁ ମନ୍ଦିର ଭିତରେ ପଶି ଭଙ୍ଗାରୁଜା କରିବା ସହ ମନ୍ଦିରରେ ଥିବା ଅନେକ ମୂଲ୍ୟବାନ ଅଳଙ୍କାରକୁ ଚୋରାଇ ନେଇଛନ୍ତି । ପାକିସ୍ତାନ ଗଣମାଧ୍ୟମ ଏଭଳି ସୂଚନା ଦେଇଛି ।
ସୂଚନା ମୁତାବକ କିଛି ଅଜ୍ଞାତ ବ୍ୟକ୍ତି ଏହି ହିନ୍ଦୁ ମନ୍ଦିରରେ ପ୍ରବେଶ କରି ଭଙ୍ଗାରୁଜା କରିବା ସହ ମନ୍ଦିରରେ ଥିବା ଠାକୁରଙ୍କ ଅଳଙ୍କାର ଲୁଟିନେବା ପରେ ଇମ୍ରାନ ସରକାରଙ୍କ ଅଳ୍ପ ସଂଖ୍ୟକଙ୍କ ସୁରକ୍ଷା ପଦାରେ ପଡିଛି ।
କଟୋରୀ ପୋଲିସରେ ଏନେଇ ଅଭିଯୋଗ ହେବା ପରେ ପୋଲିସ ତରଫରୁ କାହାକୁ ବି ଗିରଫ କରାଯାଇ ନାହିଁ । ସେପଟେ ପାକ୍ ଗଣମାଧ୍ୟମର ସୂଚନା ମୁତାବକ ଅଳ୍ପ ସଂଖ୍ୟକ ମନ୍ତ୍ରୀ ସଂପୃକ୍ତ ଅଞ୍ଚଳର ଏସଏସପିଙ୍କୁ ଏହି ଘଟଣାର ରିପୋର୍ଟ ମାଗିଛନ୍ତି । ଅନ୍ୟପଟେ ପାକିସ୍ତାନ ଅଳ୍ପ ସଂଖ୍ୟକ ରାଷ୍ଟ୍ରୀୟ ଆୟୋଗର ଅଧ୍ୟକ୍ଷ ଚେଲାରାମ କେବଲାନୀ ଓ ସିନ୍ଧର ଅଳ୍ପ ସଂଖ୍ୟକ ମନ୍ତ୍ରୀ ଜ୍ଞାନଚନ୍ଦ ଏସରାନୀ ସ୍ଥାନୀୟ ଏସଏସପିଙ୍କୁ ଏହି ମାମଲାର ତଦନ୍ତ କରି ଦୋଷୀକୁ କଠୋର ଦଣ୍ଡ ଦେବାକୁ ଅନୁରୋଧ କରିଛନ୍ତି ।