ସୀମାକୁ ନେଇ ମୁହାଁମୁହିଁ ପାକିସ୍ତାନ-ଆଫଗାନିସ୍ତାନ । ପାକିସ୍ତାନ ସେନାର ମୁଖପାତ୍ର କହିଲେ, ‘ଆମ ସୈନିକଙ୍କ ରକ୍ତ ବୋହିଛି, ଆମେ ଅଧାରେ ଅଟକିବୁନି’
କନକ ବ୍ୟୁରୋ: ପାକିସ୍ତାନ ଓ ତାଲିବାନ ଶାସିତ ଆଫଗାନିସ୍ତାନ ମଧ୍ୟରେ ସୀମା ବିବାଦ ଶେଷ ହେବ କଣ ବଂର ଦିନକୁ ଦିନ ଅଧିକ ବଢିବାରେ ଲାଗିଛି । ଗୋଟିଏ ପଟେ ପାକିସ୍ତାନ ସେନା ଆଫଗାନିସ୍ତାନ ସୀମାରେ ବାଡ ଲଗାଉଥିବାବେଳେ, ଅନ୍ୟପଟେ ତାଲିବାନ ସେନା ଏହି ବାଡକୁ ଉପାଡି ଫୋପାଡୁଥିବା ଦେଖିବାକୁ ମିଳୁଛି । ଆଉ ଏହାରି ଭିତରେ ପାକିସ୍ତାନର ସେନାର ମୁଖପାତ୍ର ଏକ ଗୁରୁତ୍ୱପୂର୍ଣ୍ଣ ବୟାନ ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପାକିସ୍ତାନ ସେନାର ମୁଖପାତ୍ର ମେଜର ଜେନେରାଲ ଇଫତିଖାର ବୁଧବାର ରାୱଲପିଣ୍ଡିରେ ଏକ ପ୍ରେସମିଟ୍ ସମୟରେ କହିଛନ୍ତି, ଆଫଗାନିସ୍ତାନ ସୀମାରେ ତାର ବଡ ଲଗାଇବା ଯୋଜନା ଜାରି ରହିବ । ସୀମା ପାଇଁ ଆମ ଶହୀଦ ଯବାନଙ୍କ ରକ୍ତ ବୋହିଛି , ତେଣୁ ଏହି କାମ କେବେ ବି ରହିବ ନାହିଁ । ତେବେ ପାକିସ୍ତାନ-ଆଫଗାନିସ୍ତାନ ସୀମାରେ ଏହି ବାଡ ଏଥିପାଇଁ ଲଗାଯାଉଛି, ଯାହା ଫଳରେ ଲୋକମାନଙ୍କର ସୁରକ୍ଷା କରାଯାଇପାରିବ । ଲୋକଙ୍କ ମଧ୍ୟରେ ଫାଟ ସୃଷ୍ଟି କରିବାକୁ ଏହା ଲଗାଯାଉନି ବୋଲି ସେ ସଫେଇ ରଖିଛନ୍ତି ।
ମେଜର ଜେନେରାଲ ଏହା ମଧ୍ୟ ସ୍ୱୀକାର କରିଛନ୍ତି ଯେ, ପଶ୍ଚିମ ବର୍ଡରରେ ପାକିସ୍ତାନର ସୁରକ୍ଷାକୁ ନେଇ ସ୍ଥିତି ଗମ୍ଭୀର ଅଛି । ସୀମା ବିବାଦକୁ ନେଇ ବିଭିନ୍ନ ସ୍ତରରେ ଆଲୋଚନା ଚାଲିଛି । ହେଲେ ପାକିସ୍ତାନ ସେନା ସୀମାରେ ତାରବାଡ ଲଗାଇବା ବନ୍ଦ କରିବନି ବୋଲି ସେ ସୂଚନା ଦେଇଛନ୍ତି । ସେ ଆହୁରି ମଧ୍ୟ କହିଛନ୍ତି ଯେ, ଏହି ତାରବାଡ ଲଗାଇବା କାମ ୯୪ ପ୍ରତିଶତ ପୂରା ହୋଇଗଲାଣି, ଖୁବଶୀଘ୍ର ଅନ୍ୟ ସମସ୍ତ କାମ ମଧ୍ୟ ପୂରଣ ହେବ ।
ସୂଚନାଯୋଗ୍ୟ ଯେ, ଗତବର୍ଷ ଡିସେମ୍ବର ମାସରେ ସୋସିଆଲ୍ ମିଡିଆରେ ଏକ ଭିଡିଓ ଖୁବ୍ ଭାଇରାଲ ହୋଇଥିଲା । ଏହି ଭିଡିଓରେ ତାଲିବାନୀ ସେନା ପାକିସ୍ତାନର ତାରବାଡ ଓପାଡି ପିଙ୍ଗୁଥିବା ଦେଖିବାକୁ ମିଳିଥିଲା । ତା ସହିତ ତାଲିବାନର ଜଣେ ଅଧିକାରୀ ପାକିସ୍ତାନ ସେନାକୁ ଚେତାବନୀ ମଧ୍ୟ ଦେଇଥିଲେ । ଆଉ ତାଲିବାନର ପ୍ରତିରକ୍ଷା ମନ୍ତ୍ରାଳୟ ପାକିସ୍ତାନର ଏହି କାମକୁ ବେନିୟମ କାମ ବୋଲି ମଧ୍ୟ କହିଥିଲା । ଏହାପରେ ସୋସିଆଲ୍ ମିଡିଆରେ ଏହି କଥାକୁ ନେଇ ବେଶ ଚର୍ଚ୍ଚା ହୋଇଥିଲା । ପାକିସ୍ତାନର ବିଦେଶ ମନ୍ତ୍ରୀ ଏହି ଘଟଣାକୁ ନେଇ ପ୍ରତିକ୍ରିୟା ରଖିବା ସହ ସୀମାରେ ବାଡ ଲଗାଇବା କାମ ଜାରି ରହିବ ବୋଲି ସେ କହିଥିଲେ ।
ତେବେ ଜାଣିରଖିବା ଉଚିତ୍ ଯେ, ପାକିସ୍ତାନ ଓ ଆଫଗାନିସ୍ତାନ ଭିତରେ ଦୀର୍ଘ ୨୬୪୦ କିଲୋମିଟରର ସୀମା ରେଖା ରହିଛି । ପାକିସ୍ତାନ ଏହି ସୀମାରେ ଏବେ କୋଟି କୋଟି ଟଙ୍କା ଖର୍ଚ୍ଚ କରି ବାଡ ଲଗାଇବାକୁ ଆରମ୍ଭ କରିଛି । ହେଲେ ଆଫଗାନିସ୍ତାନ ଏହାକୁ ବିରୋଧ କରୁଛି । ତାଲିବାନର କହିବା କଥା, ଯେପର୍ଯ୍ୟନ୍ତ ସୀମା ବିବାଦର ସମାଧାନ ହୋଇନି, ସେପର୍ଯ୍ୟନ୍ତ ସୀମାରେ ବାଡ ଲଗାଇବା ବେନିୟମ ଅଟେ ।