ପଦ୍ମିନୀ କେୟାର ମହତ୍ୱ ପଦକ୍ଷେପ, ଆଣ୍ଠୁବାତ ଅସ୍ଥିଶଲ୍ୟ ଚିକିତ୍ସା ସମ୍ବନ୍ଧୀୟ ଜାତୀୟ କର୍ମଶାଳା
କନକ ବ୍ୟୁରୋ : ବୟସାଧିକ ଆଣ୍ଠୁବାତ ସମସ୍ୟାର ଅସ୍ଥିଶଲ୍ୟ ଚିକିତ୍ସା ସମ୍ବନ୍ଧୀୟ ଜାତୀୟ କର୍ମଶାଳା ପଦ୍ମିନୀ କେୟାର ହସ୍ପିଟାଲରେ ଅନୁଷ୍ଠିତ ହୋଇଯାଇଛି । ଓଡିଶା ଅସ୍ଥିଶଲ୍ୟ ଚିକିତ୍ସକ ସଂଘ ଏବଂ ଓସ୍କାରର ମିଳିତ ଆନୁକୂଲ୍ୟରେ ଆୟୋଜିତ ଏହି ଜାତୀୟ କର୍ମଶାଳାରେ ରାଜ୍ୟ ତଥା ଦେଶର ବହୁ ବିଶିଷ୍ଠ ଅସ୍ଥିଶଲ୍ୟ ବିଶେଷଜ୍ଞ ଓ ଡାକ୍ତର ଯୋଗ ଦେଇ ଅତ୍ୟନ୍ତ ଜଟିଳ ଓ ବ୍ୟୟବହୁଳ ଖଞ୍ଜା ପ୍ରତିରୋପଣ ବଦଳରେ ଜଣେ ବୟସ୍କ ବ୍ୟକ୍ତି ଶଲ୍ୟ ଚିକିତ୍ସା ଦ୍ୱାରା କିଭଳି ଆଣ୍ଠୁବାତ ସମସ୍ୟାରୁ ମୁକ୍ତି ପାଇ ପାରିବେ ସେ ସଂପର୍କରେ ମତ ବିନିମୟ କରିଥିଲେ ।
Kanak News is now on WhatsApp
Join and get latest news updates delivered to you via WhatsApp
କର୍ମଶାଳାକୁ ଉଦଘାଟନ କରିବା ଅବସରରେ ଡ୍ରିମସ୍ ଶିକ୍ଷାନୁଷ୍ଠାନ ସମୂହର ଅଧ୍ୟକ୍ଷ ଡ, ପ୍ରମୋଦ ଚନ୍ଦ୍ର ରଥ ସମସ୍ତଙ୍କୁ ସ୍ୱାଗତ କରିବା ସହ ଏଭଳି ଗୁରୁତ୍ୱପୂର୍ଣ୍ଣ ପ୍ରଶିକ୍ଷଣ କାର୍ଯ୍ୟକ୍ରମ ଦ୍ୱାରା ଯୁବ ଡାକ୍ତରମାନେ ପ୍ରତ୍ୟକ୍ଷ ଜ୍ଞାନ ଆହରଣର ସୁଯୋଗ ପାଇବେ ବୋଲି କହିଥିଲେ । କର୍ମଶାଳାର ସଂଯୋଜକ ବିଶିଷ୍ଠ ଅସ୍ଥିଶଲ୍ୟ ବିଶେଷଜ୍ଞ ଡାକ୍ତର ଚିତ୍ତ ପ୍ରକାଶ ଦାସ ପ୍ରାରମ୍ଭିକ ସୂଚନା ଓ ପ୍ରଫେସର ଡାକ୍ତର ଶକ୍ତି ପ୍ରସାଦ ଦାସ କର୍ମଶାଳାର ମୁଖ୍ୟ ଆଭିମୁଖ୍ୟ ଉପରେ ଆଲୋକପାତ କରିଥିଲେ । ପ୍ରଶାସନିକ ନିର୍ଦ୍ଦେଶକ ବଳରାମ କର, ପ୍ରଫେସର ଡାକ୍ତର ଶିଶୁ ଶଙ୍କର ମିଶ୍ର, ଅସ୍ଥିଶଲ୍ୟ ବିଶେଷଜ୍ଞ ଡାକ୍ତର ସଂଜୟ ରାସ୍ତୋଗୀ, ଡାକ୍ତର ପ୍ରଦୀପ ନେମୋଡେ, ଡାକ୍ତର ଆର ଭଣ୍ଡନାକର, ଡାକ୍ତ ବି. ସାଲୁଜା, ଡାକ୍ତର ମିଳିନ୍ଦ ଚୌଧୁରୀ ସମ୍ମାନୀତ ଅତିଥି ଓ ବିଶେଷଜ୍ଞ ବକ୍ତା ଭାବେ ଯୋଗ ଦେଇଥିଲେ ।
ଓଡିଶା ଅସ୍ଥିଶଲ୍ୟ ଚିକିତ୍ସକ ସଂଘର ସଭାପତି ଡାକ୍ତର ବି.କେ ବେହେରା, ସମ୍ପାଦକ ଡାକ୍ତର ଆରକେ ମହାପାତ୍ର ପ୍ରମୁଖ ବକ୍ତବ୍ୟ ପ୍ରଦାନ କରିଥିଲେ । ପଦ୍ମିନୀ କେୟାରର ମୁଖ୍ୟ କାର୍ଯ୍ୟ ନିର୍ବାହୀ ଅଧିକାରୀ ଡାକ୍ତର ଜ୍ୟୋତିପ୍ରକାଶ ପରିଜା ସ୍ୱାଗତ ଭାଷଣ ଏବଂ ପ୍ରଧ୍ୟାପିକା ଡ.କ୍ରିଷ୍ଣାପଦା ଦାସ କାର୍ଯ୍ୟକ୍ରମକୁ ସଂଯୋଜନା କରିଥିଲେ ।
ପ୍ରାରମ୍ଭରେ ମହାବାହୂ ଶ୍ରୀଜଗନ୍ନାଥ ଏବଂ କର୍ମଯୋଗୀ ସ୍ୱଗତଃ ଧନେଶ୍ୱର ରଥଙ୍କ ଫଟୋଚିତ୍ର ନିକଟରେ ପ୍ରଦୀପ ପ୍ରଜ୍ୱଳନ ସହ ଅତିଥିମାନେ ଭକ୍ତି ପୁଷ୍ପାଞ୍ଜଳୀ ଅର୍ପଣ କରିଥିଲେ ଏବଂ ଅନୁଷ୍ଠାନ ପକ୍ଷରୁ ଅତିଥିମାନଙ୍କୁ ସମ୍ବର୍ଦ୍ଧିତ କରାଯାଇଥିଲା । ପ୍ରଦ୍ୟୁତ୍ କୁମାର ଷଡଙ୍ଗୀ, କୌସ୍ତଭ ମୁଖାର୍ଜୀ, ସଂଜୀବ କୁମାର ପ୍ରହରାଜ, ପ୍ରଶାସନିକ ଅଧିକାରୀ ଆଶୁତୋଷ ଦ୍ୱିବେଦୀ ପ୍ରମୁଖ କାର୍ଯ୍ୟକ୍ରମ ପରିଚାଳନାରେ ସହଯୋଗ କରିଥିଲେ ।