ପଦ୍ମପୁରରୁ ଦିଲ୍ଲୀ ଭାୟା ଭୁବନେଶ୍ୱର, ମୁଖ୍ୟମନ୍ତ୍ରୀଙ୍କୁ କେନ୍ଦ୍ର କୃଷିମନ୍ତ୍ରୀ ଚିଠି। ବିଜେଡି କହିଲା ଜବାବ, ଚାଷୀଙ୍କୁ ଭୂଆଁ ବୁଲାଉଛି ବିଜେପି।

କନକ ବ୍ୟୁରୋ: ଫସଲ ବୀମାକୁ ନେଇ ରାଜନୀତି । ପଦ୍ମପୁରରୁ ଦିଲ୍ଲୀ ଭାୟା ଭୁବନେଶ୍ୱରରୁ । ପଦ୍ମପୁର ଉପନିର୍ବାଚନ ପୂର୍ବରୁ ଚାଷୀଙ୍କ ଫସଲ ବୀମା କ୍ଷତିପୂରଣ ପ୍ରସଙ୍ଗକୁ ନେଇ ପଦ୍ମପୁରରୁ ଦିଲ୍ଲୀ ଭାୟା ଦେଇ ଭୁବନେଶ୍ୱରରେ ମଧ୍ୟ ସରଗରମ ହୋଇଛି ରାଜନୀତି । ଫସଲ ବୀମା ପ୍ରସଙ୍ଗରେ ଦିଲ୍ଳୀରେ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ କୃଷିମନ୍ତ୍ରୀ ନରେନ୍ଦ୍ର ସିଂ ତୋମାରଙ୍କୁ ଭେଟିବା ପରେ, ତୋମାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖିଛନ୍ତିି । ମୁଖ୍ୟମନ୍ତ୍ରୀଙ୍କୁ କେନ୍ଦ୍ର ଲେଖିଥିବା ଏହି ଚିଠିରେ କେନ୍ଦ୍ରମନ୍ତ୍ରୀ ତୋମାର ଲେଖିଛନ୍ତି, ମରୁଡି କ୍ଷତିଗ୍ରସ୍ତ ଅଞ୍ଚଳର କୃଷକମାନଙ୍କୁ ଫସଲ ବୀମା ଦେବା ଲାଗି ଭାରତ ସରକାରଙ୍କ କୃଷି ଓ କୃଷକ କଲ୍ୟାଣ ମନ୍ତ୍ରାଳୟ ଗଠିତ ବୈଷୟିକ ପରାମର୍ଶଦାତା କମିଟି ରାଜ୍ୟ ସରକାରଙ୍କୁ ବହୁଥର ଅବଗତ କରାଇଥିଲେ । କିନ୍ତୁ ଏଥିପାଇଁ ଥିବା ନିୟମ ଓ ପ୍ରକ୍ରିୟାକୁ ରାଜ୍ୟ ସରକାର ଅନୁସରଣ ନକରି ଥିବାରୁ କ୍ଷତିଗ୍ରସ୍ତ ଚାଷୀ ଚାଷୀ ବୀମା ରାଶି ପାଇବାରେ ବିଳମ୍ବ ହୋଇଛି ।

କେନ୍ଦ୍ର କୃଷିମନ୍ତ୍ରୀ ମୁଖ୍ୟମନ୍ତ୍ରୀଙ୍କୁ ଚିଠି ଲେଖିବା ପରେ ଜବାବ ରଖିଛି ବିଜେଡି । ବିଜେଡି ସାଂସଦ ସସ୍ମିତ ପାତ୍ର କହିଛନ୍ତି, ବିଜେଡି ଯେଉଁ ପ୍ରଶ୍ନ ଉଠାଇ ଥିଲା, କେନ୍ଦ୍ରମନ୍ତ୍ରୀ ଅଡୁଆରେ ପଡିଛନ୍ତି । ସେଥିପାଇଁ ଏଭଳି ଚିଠି ଲେଖିଛନ୍ତି ।

ଚାଷୀ ପ୍ରସଙ୍ଗକୁ ନେଇ ଦୁଇ ପ୍ରମୁଖ ଦଳ ବିଜେପି ଓ ବିଜେଡି ପୁଣି ସାମ୍ନାସାମ୍ନି ହୋଇଛନ୍ତିି । ଏହି ପ୍ରସଙ୍ଗକୁ ନେଇ ଆରୋପ ପ୍ରତ୍ୟାରୋପ ଜାରି ରହିଛି । ଏସବୁ ଭିତରେ ଶୁକ୍ରବାରଠାରୁ ବିଜେପି ପକ୍ଷରୁ ଅନିର୍ଦ୍ଧିଷ୍ଟ କାଳ ପର୍ଯ୍ୟନ୍ତ ବିଧାନସଭା ସମ୍ମୁଖରେ ଆନ୍ଦୋଳନ କରାଯିବ ବୋଲି ଘୋଷଣା କରାଯାଇଛି । ଯାହାକୁ କାଉଣ୍ଟର କରି ବିଜେଡି କହିଛି ବିଧାନସଭା ସମ୍ମୁଖରେ ନୁହେଁ ସଂସଦ ସମ୍ମୁଖରେ ବସୁ ରାଜ୍ୟ ବିଜେପି ।

ଅନ୍ୟପଟେ ଦୁଇ ଦଳଙ୍କୁ କାଠଗଡାକୁ ଟାଣିଛି କଂଗ୍ରେସ । ଏଥିସହ ନିର୍ବାଚନ ସମୟରେ, ଉଭୟ ବିଜେଡି ଓ ବିଜେପି ଆଚରଣ ବିଧି ଉଲଂଘନ କରିଥିବା ଅଭିଯୋଗି ଆଣି, ନିର୍ବାଚନ କମିଶନଙ୍କ ଉପରେ ବର୍ଷିଛନ୍ତି କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର ।

ଚାଷୀଙ୍କୁ ଫସଲ ବୀମା ଓ ଇନପୁଟ ସବସିଡିକୁ ନେଇ ବିଜେଡି ବିଜେପି ବୟାନବାଜି ଜାରି ରହିଥିବାବେଳେ ଆନ୍ଦୋଳକାରୀଙ୍କର ଚାଷୀଙ୍କର ଆର୍ଶୀବାଦ ନେଇ ତିନି ପ୍ରମୁଖ ଦଳର ପ୍ରାର୍ଥୀ ନାମାଙ୍କନ ଭରିଛନ୍ତିି । ତେବେ ଚାଷୀଙ୍କ ସମର୍ଥନ କାହା ସପକ୍ଷରେ ଯାଉଛି, ତାହା ପଦ୍ମପୁର ଫଳାଫଳରୁ ସ୍ପଷ୍ଟ ହେବ ।