କନକ ବ୍ୟୁରୋ: ଆସନ୍ତାକାଲି ଅର୍ଥାତ ୧୭ତାରିଖ ପଦ୍ମପୁର ଉପନିବାଚନ ପାଇଁ ନାମାଙ୍କନ ଦାଖଲର ଶେଷ ଦିନ । କିନ୍ତୁ ଏପର୍ଯ୍ୟନ୍ତ କୌଣସି ରାଜନୈତିକ ଦଳ କିମ୍ବା ସ୍ୱାଧୀନ ପ୍ରାର୍ଥୀ ନାମାଙ୍କନ ଦାଖଲ କରିନାହାଁନ୍ତି । ନାମାଙ୍କନକୁ ନେଇ ଜାରି ରହିଥିବା ଛକାପଂଛା ସ୍ଥିତି ପଦ୍ମପୁର ରାଜନୀତିକୁ ଉଷ୍ମ କରିଛି ।
Kanak News is now on WhatsApp
Join and get latest news updates delivered to you via WhatsApp
ପଦ୍ମପୁର ମୈଦାନରେ ତିନି ଦଳର ପ୍ରାର୍ଥୀ
ବର୍ଷା ସିଂ ବରିହା, ବିଜେଡି ପ୍ରାର୍ଥୀ
ପ୍ରଦୀପ ପୁରୋହିତ, ବିଜେପି ପ୍ରାର୍ଥୀ
ସତ୍ୟଭୂଷଣ ସାହୁ, କଂଗ୍ରେସ ପ୍ରାର୍ଥୀ
ପଦ୍ମପୁର ଉପନିର୍ବାଚନ ପାଇଁ କୌଣସି ପ୍ରାର୍ଥୀ ଏପର୍ଯ୍ୟନ୍ତ ନାମାଙ୍କନ ଦାଖଲ କରିନାହାଁନ୍ତି । ଆସନ୍ତାକାଲି ଅର୍ଥାତ ୧୭ତାରିଖ ନାମାଙ୍କନ ଦାଖଲର ଶେଷ ଦିନ ହୋଇଥିବାରୁ କାଲି ପ୍ରାର୍ଥୀମାନେ ପ୍ରାର୍ଥୀପତ୍ର ଦାଖଲ କରିବେ ବୋଲି କୁହାଯାଉଛି । ସୂଚନା ଅନୁସାରେ ପ୍ରାୟ ୧୧ଜଣ ପ୍ରାର୍ଥୀ ପତ୍ର ଦାଖଲ ପାଇଁ ଫର୍ମ ନେଇଛନ୍ତି । କିନ୍ତୁ ଚାଷୀଙ୍କୁ ବୀମା ରାଶି ପ୍ରଦାନ ଓ ପଦ୍ମପୁରକୁ ଜିଲ୍ଲା ଦାବିକୁ ନେଇ ଆନ୍ଦୋଳନ ଚାଲିଥିବାରୁ କେହି ନାମାଙ୍କନ ଦାଖଲ କରିନଥିବା ଚର୍ଚ୍ଚା ହେଉଛି ।
ବିଜେଡି ପ୍ରାର୍ଥୀ ବର୍ଷା ସିଂ ବରିହା ୧୬ତାରିଖ ଅର୍ଥାତ ଆଜି ପ୍ରାର୍ଥୀ ପତ୍ର ଦାଖଲ କରିବେ ବୋଲି ପୂର୍ବରୁ କୁହାଯାଉଥିଲା । ହେଲେ, ସେ ଆଜି ବି ପ୍ରାର୍ଥୀପତ୍ର ଦାଖଲ କରିନାହାଁନ୍ତିି । କିନ୍ତୁ ଦଳୀୟ ନେତାଙ୍କ ସହ ନିର୍ବାଚନମଣ୍ଡଳୀର ବିଭିନ୍ନ ସ୍ଥାନକୁ ଯାଇ ପ୍ରଚାର କରିଛନ୍ତି । ମନ୍ତ୍ରୀ ନବ ଦାସ, ତାଙ୍କ ଝିଅ ଦୀପାଳି ଦାସ, ବିଧାୟକ ପ୍ରତାପ ଜେନା ବର୍ଷାଙ୍କ ପାଇଁ ପ୍ରଚାର କରିଛନ୍ତି । .. ସୋମବାର ବିଜେପି ପ୍ରାର୍ଥୀ ପ୍ରଦୀପ ଦଳ ବଳ ଧରି ବିରାଟ ଶୋଭାଯାତ୍ରାରେ ନାମାଙ୍କନ ଭରିବାକୁ ଯାଇଥିଲେ ବି ଚାଷୀ ଆନ୍ଦୋଳନକୁ ସମ୍ମାନ ଜଣାଇ ଫେରି ଆସିଥିଲେ । ତାପରେ ଗତ ଦୁଇ ଦିନ ପ୍ରଚାର କରୁଥିଲେ ବି ନାମାଙ୍କନ କରି ନାହାଁନ୍ତି । .. ଏପରିକି କଂଗ୍ରେସ ପ୍ରାର୍ଥୀ ସତ୍ୟଭୂଷଣ ସାହୁ ଓ ସ୍ୱାଧୀନ ପ୍ରାର୍ଥୀମାନେ ବି ନାମାଙ୍କନ ଦାଖଲ କରିନାହାଁନ୍ତିି । କିନ୍ତୁ ଆସନ୍ତାକାଲି ଶେଷ ଦିନ ହୋଇଥିବାରୁ ସମସ୍ତ ପ୍ରାର୍ଥୀ ନାମାନଙ୍କନ ଦାଖଲ କରିବେ ବୋଲି ଚର୍ଚ୍ଚା ହେଉଛି । ତେବେ କିଏ ଆଗ ନାମାଙ୍କନ ଦାଖଲ କରିବ ତାକୁ ନେଇ ଛକାପଂଝା ସ୍ଥିତିି ଲାଗି ରହିଛି । ଏସବୁ ଭିତରେ ରାଜନୈତିକ ଦଳର ନେତାଙ୍କ ଭିତରେ ଜାରି ରହିଛି ପଦ୍ମପୁର ଜିତିବା ନେଇ ଦମ୍ଭୋକ୍ତି ।
ଏପର୍ଯ୍ୟନ୍ତ କୌଣସି ପ୍ରାର୍ଥୀ ନାମାଙ୍କନ ଦାଖଲ କରିନଥିବାରୁ ଆସନ୍ତାକାଲି, ପଦ୍ମପୁରରେ ହାଇଭୋଲଟେଜ ରାଜନୈତିକ ରାଲି ଦେଖିବାକୁ ମିଳିବାର ସମ୍ଭାବନା ରହିଛି । ସବୁ ପ୍ରାର୍ଥୀ ନିଜ ନିଜର ଶକ୍ତି ପ୍ରଦର୍ଶନ କରି ନାମାଙ୍କନ ଦାଖଲ କରିବେ ବୋଲି ଆଲୋଚନା ହେଉଛି ।