ହଜାରେ ଟଙ୍କାରେ ମିଳିବ କରୋନା ଟିକା: ନଭେମ୍ବର ସୁଦ୍ଧା ବଜାରରେ ଉପଲବ୍ଧ ହେବ କୋଭାସିଲଡ
ସୂଚନା ଦେଲେ ପ୍ରସ୍ତୁତକାରୀ କମ୍ପାନୀ ସେରମ ଇନଷ୍ଟିଚ୍ୟୁଟର ସିଇଓ ଅଦର ପୁନାୱାଲା: କହିଲେ, ଖୁବ୍ ଶୀଘ୍ର ଆରମ୍ଭ ହେବ ଟିକା ପ୍ରସ୍ତୁତି
କନକ ବ୍ୟୁରୋ: କରୋନା ଟିକାକୁ ସାରା ବିଶ୍ୱ ଅନାଇ ବସିଥିବାବେଳେ ଆସିଛି ଭଲ ଖବର । ପ୍ରାୟ ହଜାରେ ଟଙ୍କା ବା ତାଠାରୁ କମ୍ ଦାମରେ ଭାରତରେ ମିଳିବ ଅକ୍ସଫୋର୍ଡର କରୋନା ଟିକା ‘କୋଭିସିଲଡ୍’ । ଏବଂ ନଭେମ୍ବର ମାସରେ ଏହା ଉପଲଲବ୍ଧ ହେବ । ଜାତୀୟ ଗଣମାଧ୍ୟମକୁ ଏହି ସୂଚନା ଦେଇଛନ୍ତି ଟିକା ପ୍ରସ୍ତୁତ ପାଇଁ ଅକ୍ସଫୋର୍ଡ ବିଶ୍ୱବିଦ୍ୟାଳୟ ସହ ଚୁକ୍ତି କରିଥିବା ଭାତରୀୟ ଫାର୍ମା କମ୍ପାନୀ ସେରମ ଇନଷ୍ଟିଚ୍ୟୁଟ୍ର ମୁଖ୍ୟ ଅଦର ପୁନାୱାଲା । ସେ କହିଛନ୍ତି ଖୁବ୍ ଶୀଘ୍ର ଟିକା ପ୍ରସ୍ତୁତି ଆରମ୍ଭ ହେବ । ଚଳିତ ସପ୍ତାହରେ ଏଥିପାଇଁ ଅନୁମତି ମଗାଯିବ । ଡିସେମ୍ବର ସୁଦ୍ଧା ଏହି ଭ୍ୟାକ୍ସିନର ୩ଶହରୁ ୪ଶହ ମିଲିୟନ ଡୋଜ୍ ପ୍ରସ୍ତୁତ କରିବା ପାଇଁ ତାଙ୍କ କମ୍ପାନୀ ଲକ୍ଷ୍ୟ ରଖିଛି । ତେବେ କାହାକୁ ଭ୍ୟାକସିନ ଦିଆଯିବ ତାହା ସରକାର ସ୍ଥିର କରିବେ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ଅକ୍ସଫୋର୍ଡ ଭ୍ୟାକସିନ ଗ୍ରୁପର ନିର୍ଦ୍ଦେଶକ ଆଣ୍ଡ୍ର୍ୟୁ ପୋଲାର୍ଡ କହିଛନ୍ତି, ଏହି ଟିକା ଯେଉଁଭଳି ଆଂଟିବଡି ସୃଷ୍ଟି କରୁଛି ସେଥିରୁ ଏହାର ସଫଳତା ବେଶ୍ ଭଲ ବୋଲି ଜଣାପଡୁଛି । ଏହାର ଟ୍ରାଏଲରେ ସଫଳତା ମିଳିଥିଲେ ମଧ୍ୟ ଏବେ ଏହା କରୋନା ଭୂତାଣୁ ଆକ୍ରାନ୍ତଙ୍କୁ ବଂଚାଇ ପାରୁଛି କି ନାହିଁ ତାର ପ୍ରମାଣର ଆବଶ୍ୟକତା ରହିଛି । ତେଣୁ ବର୍ତମାନ ଟିକାକୁ ଅଲଗା ଅଲଗା ଲୋକଙ୍କ ଉପରେ ଟ୍ରାଏଲ କରାଯାଉଛି ଏଥିରୁ ଆକଳନ କରାଯିବ ଏହାର ପ୍ରଭାବ କିଭଳି ରହୁଛି । ଆଷ୍ଟ୍ରାଜେନିକା କମ୍ପାନୀ ସହ ମିଶି ଅକ୍ସଫୋର୍ଡ ବିଶ୍ୱ ବିଦ୍ୟାଳୟ କରୋନା ଭ୍ୟାକସିନ ପ୍ରସ୍ତୁତ କରୁଛି । ଏବଂ ଏହାର ମାନବ ପରୀକ୍ଷଣ ସଫଳ ହୋଇଥିବା କୁହାଯାଉଛି । ଟିକା ପ୍ରସ୍ତୁତ ପାଇଁ ଭାରତୀୟ ଔଷଧ ନିର୍ମାତା କମ୍ପାନୀ ସେରମ ଇନଷ୍ଟିଚ୍ୟୁଟ ସହ ଚୁକ୍ତି କରିଛି ଅକ୍ସଫୋର୍ଡ ।