ବେକାରୀ ବଢୁଛି , ପଦବୀ ଖାଲି ପଡ଼ିଛି । ଦେଶରେ ୫ଲକ୍ଷ, ରାଜ୍ୟରେ ୧୦ ହଜାରରୁ ଅଧିକ ପୋଲିସ୍ ପଦବୀ ଖାଲି ।

କନକ ବ୍ୟୁରୋ: ଗୋଟଏ ପଟେ ଦେଶରେ ରେକର୍ଡ ସଂଖ୍ୟାରେ ବେକାରୀ ବଢୁଛି ଅନ୍ୟପଟେ ପଦବୀ ପୂରଣ ହେଉନି ଫାଙ୍କା ପଡ଼ିଛି । କେନ୍ଦ୍ର ସ୍ୱରାଷ୍ଟ୍ର ମନ୍ତ୍ରଣାଳୟ ତରଫରୁ ଜାରି ହୋଇଥିବା ସୂଚନା ମୁତାବକ ଦେଶରେ ଏବେ ୫ ଲକ୍ଷ ୨୮ ହଜାର ୩୯୬ଟି ପୋଲିସ୍ ପଦବୀ ଖାଲି ପଡ଼ିଛି । ସେଥି ମଧ୍ୟରୁ ଉତ୍ତର ପ୍ରଦେଶରେ ସର୍ବାଧିକ ୧ଲକ୍ଷ ୨୮ ହଜାର ୯୫୨ଟି ପଦବୀ ଫାଙ୍କା ପଡ଼ିଛି । ଏହି ରିପୋର୍ଟ ତାଲିକାରୁ ବାଦ୍ ପଡ଼ିନି ଓଡ଼ିଶା ଆଉ ଆମ ରାଜ୍ୟ ମଧ୍ୟ ପାଖାପାଖି ୧୦ ହଜାର ୩୨୨ଟି ପୋଲିସ ପଦବୀ ଖାଲି ପଡ଼ିଥିବା ଦର୍ଶାଯାଇଛି ।

ଦେଶରେ ୨୩ ଲକ୍ଷ ୭୯ ହଜାର ୭୨୮ ପଦବୀ ଥିବାବେଳେ ସେଥି ମଧ୍ୟରୁ ସମସ୍ତ ରାଜ୍ୟରେ ମୋଟ୍ ୧୮ ଲକ୍ଷ ୫୧ ହଜାର ୩୩୨ଟି ପୋଲିସ୍ ପଦବୀ ୨୦୧୮ ଜାନୁୟାରୀ ମାସ ସୁଦ୍ଧା ପୂରଣ ହୋଇଛି । ଅର୍ଥାତ୍ ଦେଶରେ ଏବେବ ୫ ଲକ୍ଷ ୨୮ ହଜାର ୩ ଶହ ୯୬ ପୋଲିସ ପଦବୀ ଖାଲି ପଡ଼ିଛି । ସେଥିମଧ୍ୟରୁ ପଶ୍ଚିମବଙ୍ଗରେ ୪୮ ହଜାର ୯ଶହ ୮୧ ପଦବୀ ଖାଲି ରହିଛି । ନାଗାଲାଣ୍ଡରେ ୯୪୧ରୁ ଅଧିକ ପଦବୀ ଖାଲି ରହିଛି।

ଅପରପକ୍ଷରେ ମହାରାଷ୍ଟ୍ରରେ ୨୬, ୧୯୫ ଏବଂ ମଧ୍ୟପ୍ରଦେଶରେ ୨୨,୩୫୫ ପଦବୀ ଖାଲି ପଡ଼ିଛି । ତାମିଲନାଡୁରେ ୨୨,୪୨୦, କର୍ଣ୍ଣାଟକରେ ୨୧,୯୪୩, ଗୁଜରାଟରେ ୨୧,୦୭୦, ଝାଡ଼ଖଣ୍ଡରେ ୧୮,୯୩୧, ରାଜସ୍ଥାନରେ ୧୮,୦୦୩, ଆନ୍ଧ୍ରପ୍ରଦେଶରେ ୧୭,୯୩୩ ପଦବୀ ଖାଲି ପଡ଼ିଛି । ସେହିପରି ହରିୟାଣାରେ ୧୬,୮୪୪, ଛତିଶଗଡ଼ରେ ୧୧,୪୫୨ ଏବଂ ଜମ୍ମୁ-କଶ୍ମୀରରେ ୧୦,୦୪୪ ପୋଲିସ ପଦବୀ ଖାଲି ପଡ଼ିଥିବା ସ୍ବରାଷ୍ଟ୍ର ମନ୍ତ୍ରଣାଳୟ ପକ୍ଷରୁ କୁହାଯାଇଛି।

ଅନ୍ୟପଟେ ଚିନ୍ତାଜନକ ବିଷୟ ହେଲା, ଦେଶରେ ହେଉ ଅବା ରାଜ୍ୟରେ ସବୁଠି ବେକାରୀ ମୁଣ୍ଡ ଟେକିଥିବାବେଳେ ପୋଲିସ ପଦବୀ ପାଇଁ ବିଭିନ୍ନ ରାଜ୍ୟରେ ଫାଙ୍କା ପଡ଼ିଥିବା ପଦବୀ କେବେ ପୂରଣ ହେବ ତାହା ଏବେ ବଡ଼ ପ୍ରଶ୍ନ ହୋଇ ରହିଛି । ଆଉ ରାଜ୍ୟ ସରକାର ଏବବାଦରେ କେତେ ସଚେତନ ହୋଇ ଏହି ଫାଙ୍କା ପଡ଼ିଥିବା ପଦବୀକୁ ପୂରଣ କରିବେ ତାହା ଉପରେ ସମସ୍ତଙ୍କ ନଜର ।