‘ଏ ସ୍ୱାର୍ଥପର ମଣିଷ ସମାଜ…ଆମେ ତମର କ’ଣ କ୍ଷତି କରିଥିଲୁ । ଆମେ ତମକୁ ନା କେବେ ହଇରାଣ କରିଥିଲୁ, ନା କେବେ କିଛି କଷ୍ଟ ଦେଇଥିଲୁ । ତମେ ମଣିଷ ସମାଜ କାହିଁକି ଆମ ଜୀବନ ନେଇଗଲ ? ଭଗବାନ ଆମକୁ ସିନା ପଶୁ କରି ଜନ୍ମଦେଇଥିଲା, ହେଲେ ତମେ କେମିତି ପଶୁ ପାଲଟିଗଲ ?’
Kanak News is now on WhatsApp
Join and get latest news updates delivered to you via WhatsApp
କନକ ବ୍ୟୁରୋ : କବର ତଳୁ ସ୍ୱାର୍ଥପର ମଣିଷ ସମାଜକୁ କିଛି ଏମିତି ପ୍ରଶ୍ନ ପଚାରୁଛନ୍ତି ନୀରିହ କୁକୁର ।
‘ସତରେ କ’ଣ ଆମ ସମାଜରୁ ମଣିଷପଣିଆ ମରିଯାଇଛି ?
ଆମ ଭିତରେ କଣ ସତରେ ଟିକିଏ ବି ମାନବିକତା ନାହିଁ ?’
ଏ ପ୍ରଶ୍ନ ଆଜି ଏଥିପାଇଁ ଉଠୁଛି, କାରଣ ଆନ୍ଧ୍ରପ୍ରଦେଶରୁ ଯେଉଁ ଲୁହଭିଜା ଘଟଣା ସାମ୍ନାକୁ ଆସିଛି. ତାହା ସାରା ମଣିଷ ସମାଜର ମୁଣ୍ଡ ତଳକୁ କରିଦେଇଛି । ମରିଗଲା ମଣିଷପଣିଆ…ବିଶ୍ୱାସର ବିଷ ଦେଇ ୩୦୦ କୁକରଙ୍କୁ ମାରିଦେଲା ମଣିଷ ।
ଆନ୍ଧ୍ରପ୍ରଦେଶର ପଶ୍ଚିମ ଗୋଦାବରୀ ଜିଲ୍ଲାରୁ ଆସିଛି ଏଭଳି ଲଜ୍ୟାଜନକ ଖବର । ଯେଉଁଠି ଗୋଟିଏ ଗାଁରେ ବିଷ ଇଞ୍ଜେକସନ୍ ଦେଇ ୩୦୦ରୁ ଅଧିକ କୁକୁରଙ୍କୁ ମାରଦେଇଛି ମଣିଷ ସମାଜ । ତେବେ ମଣିଷ କାହିଁକି ଏଭଳି ନାରକୀୟ କାଣ୍ଡ ଭିଆଇଲା, ତାର କାରଣ ଜଣାପଡିନଥିଲେ ମଧ୍ୟ, ଏହି ଘଟଣା ଏବେ ପୂରା ସମାଜକୁ ଲଜ୍ଜିତ କରିଛି ।
ଏହି ଘଟଣା ସେତେବେଳେ ସାମ୍ନାକୁ ଆସିଥିଲା, ଯେତେବେଳେ ଲଲିତା ନାମକ ଜଣେ ଆନିମଲ୍ ରାଇଟ୍ସ ଆକ୍ଟିଭିଷ୍ଟ ଘଟଣା ନେଇ ଥାନାରେ ଏତଲା ଦାୟର କରିଥିଲେ । ତାଙ୍କ କହିବା ଅନୁଯାୟୀ, କୁକୁରମାନଙ୍କୁ ଏମିତି ବିଷ ଇଞ୍ଜେକସନ୍ ଦେଇ ମାରିଦେବା ପାଇଁ ଗାଁ ପଂଚାୟତରେ ନିଷ୍ପତି ହୋଇଥିଲା । ସେ ଦାବିର ସହ କହିଛନ୍ତି ଯେ, ୩୦୦ରୁ ଅଧିକ କୁକୁରଙ୍କୁ ମାଟିରେ ପୋତାଯାଉଥିବାର ସେ ଦେଖିଛନ୍ତି । ଆଉ ଏନେଇ ପୂରା ପଂଚାୟତ ବିରୋଧରେ ସେ ଥାନାରେ ଅଭିଯୋଗ କରିଛନ୍ତି । ଏହି ଘଟଣାଟି ଏବେ ଚର୍ଚ୍ଚାରେ ରହିଥିବା ବେଳେ, ମଣିଷପଣିଆ ପ୍ରତି ବଡ ପ୍ରଶ୍ନ ଚିହ୍ନ ଲଗାଇଦେଇଛି ।