କନକ ବ୍ୟୁରୋ: ରାଜ୍ୟରେ ୨୦ ଲକ୍ଷରୁ ଅଧିକ ଗାଡ଼ିର ନାହିଁ ଫିଟନେସ୍ । ବିନା ଫିଟନେସରେ ରହିଛି ୧୨ ହଜାରରୁ ଅଧିକ ବସ୍! ବିଧାନସଭାରେ ପରିବହନ ମନ୍ତ୍ରୀ ଟୁକୁନି ସାହୁ ଏନେଇ ଲିଖିତ ଉତ୍ତର ରଖିଛନ୍ତି । ଓଡ଼ିଶା ସ୍କ୍ରାପିଂ ପଲିସି-୨୦୨୨ ସମ୍ପର୍କରେ ବିଜେପି ବିଧାୟିକା କୁସୁମ ଟେଟେଙ୍କ ପ୍ରଶ୍ନର ଉତ୍ତର ଦେଇ ରାଜ୍ୟରେ ରହିଥିବା ପୁରୁଣା ଗାଡ଼ିର ତାଲିକା ଦେଇଛନ୍ତି ପରିବହନ ମନ୍ତ୍ରୀ । ଏହି ତାଲିକା ଉପରେ ନଜର ପକାନ୍ତୁ । ରାଜ୍ୟରେ ଅଛି ୧୨ ହଜାର ୩୫୯ ବସ୍, ଯାହା ୧୫ ବର୍ଷ କିମ୍ବା ତା’ଠାରୁ ଅଧିକ ପୁରୁଣା । ଯାହାର ଫିଟନେସ୍ ନାହିଁ । ମାତ୍ର ୮,୫୫୭ ବସର ଫିଟନେସ୍ ରହିଛି । ଏପରିକି ଶିକ୍ଷାନୁଷ୍ଠାନରେ ବ୍ୟବହୃତ ହେଉଥିବା ୧୨୩୧ ବସ୍ ୧୫ ବର୍ଷ ପୁରୁଣା । ସେହିପରି ୨ ହଜାରରୁ ଅଧିକ ପୁରୁଣା ଡମ୍ପର ରହିଛି । କେବଳ ୨୬୦ଟି ଡମ୍ପରର ଫିଟନେସ୍ ଅଛି । ଦେଢ଼ ଲକ୍ଷରୁ ଅଧିକ ସାମଗ୍ରୀ ପରିବହନ ଗାଡ଼ି ପୁରୁଣା ହୋଇଗଲାଣି । ନିୟମ ଅନୁଯାୟୀ ରାଜ୍ୟରେ ଏବେ ୨୦ ଲକ୍ଷରୁ ଅଧିକ ଗାଡ଼ି ସ୍କ୍ରାପିଂ ପାଇଁ ଉପଯୁକ୍ତ । ଯେଉଁଥିରେ ରହିଛି ପାଖାପାଖି ୧୩ ଲକ୍ଷ ବାଇକ୍ ଓ ସ୍କୁଟର ।
![](https://cdn-icons-png.flaticon.com/512/2504/2504957.png)
Kanak News is now on WhatsApp
Join and get latest news updates delivered to you via WhatsApp
ଗାଡ଼ି ୧୫ ବର୍ଷ ପୁରୁଣା ଫିଟନେସ୍ ଅଛି
ବସ୍ ୧୨,୩୫୯ ୮,୫୫୭
ବସ୍ (ଶିକ୍ଷାନୁଷ୍ଠାନ) ୧,୨୩୧ ୩,୬୩୫
ଡମ୍ପର ୨,୦୩୪ ୨୬୦
ସାମଗ୍ରୀ ପରିବହନ ଗାଡ଼ି ୧,୫୪,୪୨୯ ୨,୧୮,୭୫୯
୧ କୋଟିରୁ ଅଧିକ ୨୦.୩୯ ଲକ୍ଷ ୮୦.୨୦ ଲକ୍ଷ
ବାଇକ୍ ଓ ସ୍କୁଟର ୧୨,୯୯,୩୫୧ ୬୩,୩୯,୮୪୪
ପରିବହନ ମନ୍ତ୍ରୀଙ୍କ ତଥ୍ୟ ଅନୁସାରେ ରାଜ୍ୟରେ ଯେତିକି ଫିଟନେସ୍ ଥିବା ବସ ଚାଲିଛି, ତା’ଠାରୁ ପ୍ରାୟ ଦେଢ଼ ଗୁଣ ଅଧିକ ୧୫ ବର୍ଷର ପୁରୁଣା ଗାଡ଼ି । ଏପରିକି ଶିକ୍ଷାନୁଷ୍ଠାନ ପାଇଁ ଉଦ୍ଦିଷ୍ଟ ୧୨୩୧ଟି ବସ୍ ପୁରୁଣା । ଯଦି ଏଗୁଡିକ ରାସ୍ତାରେ ଗଡୁଥାଏ, ତେବେ ଏହା କେତେ ସାଂଘାତିକ ଅନୁମାନ କରିହେଉଛି ।
ପ୍ରଦୂଷଣ ଓ ଦୁର୍ଘଟଣା ରୋକିବା ପାଇଁ ସରକାର ଆଣିଛନ୍ତି ସ୍କ୍ରାପିଂ ପଲିସି । ଯେଉଁଥିରେ ୧୫ ବର୍ଷରୁ ଅଧିକ ସମୟ ଧରି ପଞ୍ଜିକୃତ ହୋଇଥିବା ଗାଡ଼ିକୁ ସ୍କ୍ରାପିଂ କରାଯିବ । ବିଧାନସଭାରେ ଲିଖିତ ଉତ୍ତର ରଖି ପରିବହନ କହିଛନ୍ତି, ରାଜ୍ୟ ସରକାରଙ୍କ ମାଲିକାନାରେ ଥିବା ସମସ୍ତ ପୁରୁଣା ଗାଡ଼ି ଗୁଡିକୁ ହଟାଇ ଦିଆଯିବା ପାଇଁ ନିଷ୍ପତି ହୋଇଛି । ମାର୍ଚ୍ଚ ୧୫ ସୁଦ୍ଧା ଏହି ଗାଡ଼ିଗୁଡ଼ିକୁ ସ୍କ୍ରାପିଂ କରାଯିବ ।