ଆଗପଛ ହୋଇ ଚାଲିଗଲେ ବାପାମାଆ । ମୁଣ୍ଡ ଉପରୁ ମୁରବୀଙ୍କ ହାତ ହଟିଯିବା ପରେ ଏବେ ଅସହାୟ ଭାଇଭଉଣୀ । କୁନି ଭଉଣୀକୁ ପାଠ ପଢାଇବାକୁ ମୂଲ ଲାଗୁଛି ସାନ ଭାଇ ।
କନକ ବ୍ୟୁରୋ: ନା ବାପା ଅଛନ୍ତି, ନା ମାଆ, ନା ବଡ ଭାଇ… ମୁଣ୍ଡ ଉପରୁ ମୁରବୀଙ୍କ ହାତ ହଟିଯିବା ପରେ ଜୀବନ କେତେ ଯେ କଷ୍ଟ ବୋଧହୁଏ ତାହା ଏ ଅସହାୟ ଭାଇଭଉଣୀଙ୍କ ଛଡା ଆଉ କେହି କହି ପାରିବେନ ନାହିଁ । ପ୍ରଥମେ ବାପା, ପରେ ପରେ ବଡ଼ଭାଇ ଆଉ ଶେଷରେ ଆରପାରିକୁ ଚାଲିଗଲା ମାଆ । ଘରର ତିନି ତିନି ଜଣ ପରପାରିକୁ ଚାଲି ଯିବାପରେ ବେସାହାରା ଦୁଇ ଭାଇଭଉଣୀ ସୁରେଶ ଓ ପ୍ରିୟଙ୍କା ।
Kanak News is now on WhatsApp
Join and get latest news updates delivered to you via WhatsApp
କୋରାପୁଟ ଜିଲ୍ଲା ଦଶମନ୍ତପୁର ବ୍ଲକ କଂସାରୀ ସାହିରେ ରହୁଥିବା ଦୁଇ ଅନାଥ ଭାଇଭଉଣୀ ଏକା ହୋଇଯିବା ପରେ ଏବେ ଦୁହେଁ ଦୁହିଁଙ୍କ ମୁହଁକୁ ଚାହିଁ ବଂଚିଛନ୍ତି । ପାଠପଢା ବୟସରେ ଭାଇ ମୂଲ ଲାଗୁଛି । ଖେଳକୁଦ ବୟସରେ ପେଟ ପାଇଁ ସଂଘଷ ର୍କରୁଛି । ସିଏ ନପଢିଲା ନାହିଁ ତା ଭଉଣୀକୁ ଶିକ୍ଷିତ କରିବାକୁ ପରଘରେ ମଜୁରୀ ଖଟୁଛି ଭାଇ ।
ଆଗପଛ ହୋଇ ବାପା, ଭାଇ ଓ ମାଆଙ୍କ ଆଖିବୁଜିବା ପରେ ଏବେ ପରିବାରର ବୋଝ ସମ୍ଭାଳୁଛି କୁନି ପୁଅ ସୁରେଶ । ନିଜ କଅଁଳ କାନ୍ଧରେ ବସ୍ତାନୀ କାନେ୍ଧଇ ଯେତେବେଳେ ସ୍କୁଲ ଯିବା କଥା, ପାଠ ପଢିବା କଥା ଆଜି ଅନାଥ ହେବା ପରେ କୁଲି କାମ କରି ଦୁଇ ଓଳି ଦାନା ଯୋଗାଡ କରୁଛି ସୁରେଶ । ଖଟିଲେ ଦୁଇ ପେଟକୁ ଦାନା ଯାଏ, ଆଉ ସେଥିରୁ ଯାହା ରହେ ସାନ ଭଉଣୀ ପ୍ରିୟଙ୍କାର ପାଠପଢ଼ାରେ ଖର୍ଚ୍ଚ ହେବାକୁ ନିଅଣ୍ଟ ପଡେ । ଭଉଣୀର ପଢା ପାଇଁ ପାଖରେ ଟଙ୍କା ନଥିବାରୁ ଚିନ୍ତାରେ ପଡ଼ିଯାଇଛି ଭାଇ ।
ସେପଟେ ଏ ଦୁଃଖ ଦୁର୍ଦ୍ଦଶା ଭିତରେ ଭଙ୍ଗା ଦଦରା ଘର ଭାରି ଦୁଃଖ ଦେଉଛି । ଫଟା ଆଜବେଷ୍ଟ ତଳେ ଜୀବନ ବିତୁଥିବାରୁ ଖରା ବର୍ଷା ଦାଉରୁ ବଞ୍ଚିବା ମୁସ୍କିଲ ହୋଇପଡୁଛି । ସରକାରୀ ସ୍ତରରେ ମାସକୁ ୧୦ କେଜି ଚାଉଳ ମିଳୁଥିବା ବେଳେ ସେଥିରେ ମାସେ ଚଳି ହେଉନାହିଁ । କଷ୍ଟେ ମଷ୍ଟେ ସିନା ପେଟ ପୂରିଯାଉଛି ହେଲେ ଘର ନଥିବାରୁ ରହିବା କଷ୍ଟ । ତେଣୁ ଦୁଇ ଭାଇ ଭଉଣୀଙ୍କୁ ଆବାସ ଯୋଜନାରେ ଘର ଖଣ୍ଡେ ଯୋଗାଇ ଦେବାକୁ ଦାବି ହୋଇଛି । ସତରେ ବାପାମାଆ ଗଲା ପରେ ଜୀବନ ଜିଇଁବା ମୁସ୍କିଲ ହୋଇପଡେ । ତେଣୁ ଅନାଥ ଭାଇ ଭଉଣୀଙ୍କୁ ପ୍ରଶାସନ ଶୀଘ୍ର ଥଇଥାନ କରିବାର ଆବଶ୍ୟକତା ରହିଛି ।