ନବରଙ୍ଗପୁରର ନିସ୍ୱାର୍ଥପର ମଣିଷ ପ୍ରୀତିଶ…ମୃତ୍ୟୁ ପୂର୍ବରୁ ନିଜର ଅଙ୍ଗପ୍ରତ୍ୟଙ୍ଗ ଦାନ କରିବାକୁ ଚାଷୀଙ୍କ ନିଷ୍ପତି…ଯୁବକଙ୍କ ଏଭଳି ଉଦ୍ୟମକୁ ସ୍ଥାନୀୟ ଅଞ୍ଚଳରେ ପ୍ରଶଂସା
କନକ ବ୍ୟୁରୋ: ଦାନ ତ ଅନେକ ପ୍ରକାର ରହିଛି । କିଏ କେଉଁ ଲକ୍ଷ୍ୟ ପୂରଣ ପାଇଁ ବିଭିନ୍ନ ପ୍ରକାର ଦାନ କରିଥାନ୍ତି । ବିନା କୌଣସି ସ୍ୱାର୍ଥ ରଖି ନିଜ ଖୁସିରେ ବଞ୍ଚି ଅନ୍ୟ ମୁହଁରେ ଖୁସି ବାଂଟୁଥିବା ଲୋକ ହିଁ ପ୍ରକୃତ ଦାନୀ । ସେମିତି ଜଣେ ନିଶ୍ୱାର୍ଥପର ଦାନୀ ହେଉଛନ୍ତି ନବରଙ୍ଗପୁର ପ୍ରୀତିଶ ବିଶୋଇ । ଆଖି, ହୃତପିଣ୍ଡ ଏବଂ ଯକୃତ ଆଦି ଦାନ କରିବା ପାଇଁ ନିଷ୍ପତି ନେଇ ନିଜ ଅଂଚଳରେ ଉଦାହରଣ ପାଲଟିଛନ୍ତି ପ୍ରୀତିଶ ।
Kanak News is now on WhatsApp
Join and get latest news updates delivered to you via WhatsApp
ଶୁଣିଲେ ଚମକି ପଡିବେ, ମୃତ୍ୟୁ ପୂର୍ବରୁ ନିଜର ଅଙ୍ଗପ୍ରତ୍ୟଙ୍ଗ ଦାନ କରିବା ପାଇଁ ସ୍ୱିକୃତୀ ଦେଇଛନ୍ତି ଜଣେ ଯୁବକ । ନବରଙ୍ଗପୁର ଜିଲ୍ଲା ତେନ୍ତୁଳିଖୁଂଟି ଅଂଚଳର ଯୁବକ ପ୍ରୀତିଶ ବିଶୋଇ । ପେଶାରେ ଜଣେ ଚାଷୀ । ମାଆ କୁମାରୀ ବିଶୋଇଙ୍କୁ ନେଇ ତାଙ୍କ ପରିବାର । ପୂର୍ବରୁ ଶିକ୍ଷକତା କରୁଥିବା ଚନ୍ଦ୍ର ଶେଖର ବିଶୋଇ ଓ ଏକ ମାତ୍ର ଭଉଣୀଙ୍କ ଦେହାନ୍ତ ହୋଇସାରିଛି । ନିଜ ଝିଅ ଓ ସ୍ୱାମୀଙ୍କ ମୃତ୍ୟୁ ପରେ ଭାଙ୍ଗିପଡିଥିଲେ ପ୍ରୀତିଶଙ୍କ ମାଆ କୁମାରୀ ବିଶୋଇ । ଯଦି ନିଜ ଝିଅ ଓ ସ୍ୱାମୀଙ୍କ ଚକ୍ଷୁ ଦାନ କରିପାରିଥାନ୍ତେ, ବୋଧହୁଏ ଆଉ କାହା ଆଖି ଜରିଆରେ ସେମାନଙ୍କୁ ଦେଖିପାରିଥାନ୍ତେ ।
ମାଆଙ୍କ ଏହି କଥା ଆନ୍ଦୋଳିତ କରିଥିଲା ପୁଅ ପ୍ରୀତିଶଙ୍କୁ । ଆଉ ଅଙ୍ଗଦାନ କରିବା ପାଇଁ ନିଷ୍ପତି ନେଇଥିଲେ ପ୍ରୀତିଶ । କେନ୍ଦ୍ର ସ୍ୱାସ୍ଥ୍ୟ ବିଭାଗ ଅଧୀନରେ କାର୍ଯ୍ୟକରୁଥିବା ନ୍ୟାସନାଲ୍ ଅର୍ଗାନ ଆଣ୍ଡ ଟିସୁ ଟ୍ରାନ୍ସପ୍ଲାଂଟ ଅର୍ଗାନାଇଜେସନ୍ (ନୋଟୋ)ରେ ଅଙ୍ଗଦାନ କରିବା ପାଇଁ ନିଜ ନାମ ପଂଜୀକରଣ କରିଛନ୍ତି ପ୍ରୀତିଶ । ନିଜ ଶରୀରର ଆଖି, ହୃତପିଣ୍ଡ, ଯକୃତ ଦାନ କରିବା ପାଇଁ ସଙ୍କଳ୍ପ ନେଇଛନ୍ତି ପ୍ରୀତିଶ । ଆଉ ପ୍ରୀତିଶଙ୍କ ଏଭଳି ଉଦ୍ୟମକୁ ସ୍ଥାନୀୟ ଅଂଚଳରେ ବେଶ ପ୍ରଶଂସା କରାଯାଇଛି ।
ତେବେ ମୃତ୍ୟ ପରେ ଶବ ସଂସ୍କାର କଲେ ମୋକ୍ଷ ମିଳିଥାଏ ବୋଲି ସ୍ଥାନୀୟ ଅଂଚଳରେ ବିଶ୍ୱାସ ରହିଛି । ହେଲେ ଏହାକୁ ଏକ ଅନ୍ଧବିଶ୍ୱାସ ବୋଲି କହି ଅଙ୍ଗଦାନ ପାଇଁ ପ୍ରୀତିଶଙ୍କ ନିଷ୍ପତି ଅନ୍ୟଙ୍କୁ ପ୍ରେରଣା ଯୋଗାଇଛି ।