ଯୋଜନା ବୋର୍ଡକୁ ସାଇନବୋର୍ଡର ଟ୍ୟାଗ୍ ଦେଲେ ବିରୋଧୀ । ସଞ୍ଜୟଙ୍କ ନିଯୁକ୍ତି ପରେ ବିରୋଧୀ କହିଲେ, ଥଇଥାନ କେନ୍ଦ୍ର ପାଲଟିଛି ବୋର୍ଡ । ନିଯୁକ୍ତି ଚାଲିଛି କିନ୍ତୁ ୧୩ ବର୍ଷ ହେଲା ବସୁନି ବୈଠକ ।
କନକ ବ୍ୟୁରୋ : ରାଜ୍ୟ ଯୋଜନା ବୋର୍ଡରେ ଉପାଧ୍ୟକ୍ଷ ଭାବେ ସଂଜୟ ଦାସବର୍ମାଙ୍କ ନିଯୁକ୍ତି ପରେ ରାଜନୈତିକ ଆରୋପ-ପ୍ରତ୍ୟାରୋପ ଆରମ୍ଭ ହୋଇଯାଇଛି । କଂଗ୍ରେସ ଓ ବିଜେପି ଅଭିଯୋଗ କରିଛନ୍ତି, ରାଜ୍ୟ ଯୋଜନା ବୋର୍ଡ ଏକ ସାଇନବୋର୍ଡରେ ପରିଣତ ହୋଇଛି । ଗତ ୧୩ ବର୍ଷ ହେଲା ଯୋଜନା ବୋର୍ଡର କୌଣସି ହେଲେ ବୈଠକ ବସିନାହିଁ । ଏପଟେ ଯୋଜନା ଓ ସମନ୍ୱୟ ମନ୍ତ୍ରୀ ପଦ୍ମନାଭ ବେହେରା କହିଛନ୍ତି, ନୀତି ଆୟୋଗ ଢାଂଚାରେ ରାଜ୍ୟ ଯୋଜନା ବୋର୍ଡ କାମ କରିବ ।
Kanak News is now on WhatsApp
Join and get latest news updates delivered to you via WhatsApp
ବେଶ କିଛି ଦିନ ଧରି ଖାଲି ପଡିଥିବା ଯୋଜନା ବୋର୍ଡର ଉପାଧ୍ୟକ୍ଷ ଭାବେ ଦାୟିତ୍ୱ ନେଇଛନ୍ତି ସଂଜୟ ଦାସବର୍ମା । ତେବେ ଏହାକୁ ନେଇ ରାଜନୀତି ଜୋର ଧରିଛି । ଯୋଜନା ବୋର୍ଡର କାର୍ଯ୍ୟକାରିତା ନେଇ ପ୍ରଶ୍ନ କରିଛନ୍ତି ବିରୋଧୀ । ରାଜ୍ୟର ବିକାଶ ପାଇଁ ନୂଆ ଯୋଜନା ପ୍ରସ୍ତୁତ କରିବା ଠାରୁ ଆରମ୍ଭ କରି ସରକାରୀ ଯୋଜନାଗୁଡିକ କିପରି ଉପର ସ୍ତରରୁ ତଳ ସ୍ତର ଯାଏଁ ପହଁଚିବ, ସେ ନେଇ କାର୍ଯ୍ୟ କରିଥାଏ ଯୋଜନା ବୋର୍ଡ । ହେଲେ ବିଡ଼ମ୍ବନାର ବିଷୟ ହେଉଛି, ୨୦୦୭ ମସିହାରୁ ଏପର୍ଯ୍ୟନ୍ତ ଥରଟିଏ ବସିନାହିଁ ରାଜ୍ୟ ଯୋଜନା ବୋର୍ଡର ବୈଠକ ।
ପାଖାପାଖି ୧୩ ବର୍ଷ ଧରି ଯୋଜନା ବୋର୍ଡର ବୈଠକ ବସିନଥିବା ବେଳେ ଉପାଧ୍ୟକ୍ଷ ଓ ସଦସ୍ୟମାନଙ୍କୁ ନିଯୁକ୍ତି ଦିଆଯାଉଛି । ଯୋଜନା ବୋର୍ଡ କେବଳ ସାଇନ ବୋର୍ଡରେ ପରିଣତ ହୋଇଛି ବୋଲି କଂଗ୍ରେସ କଟାକ୍ଷ କରିଥିବା ବେଳେ ଦଳୀୟ ନେତାଙ୍କୁ ଥଇଥାନ କରିବା ପାଇଁ ବୋର୍ଡରେ ନିଯୁକ୍ତି ଦିଆଯାଉଛି ବୋଲି କହିଛି ବିଜେପି ।
୧୯୬୯ରେ ଗଠନ ହୋଇଥିଲା ଯୋଜନା ବୋର୍ଡ । ୨୦୧୦ରେ ଏହାର ପୁନର୍ଗଠନ ହୋଇଥିଲା । ଯୋଜନା ବୋର୍ଡରେ ଅଧ୍ୟକ୍ଷ ଓ ଉପାଧ୍ୟକ୍ଷ ବ୍ୟତୀତ ୧୫ ଜଣ ସଦସ୍ୟ ରହିବେ । ବୋର୍ଡର କାର୍ଯ୍ୟକାଳ ୫ ବର୍ଷ । ମୁଖ୍ୟମନ୍ତ୍ରୀ ଏହାର ଅଧ୍ୟକ୍ଷ ହୋଇଥିବା ବେଳେ ଉପାଧ୍ୟକ୍ଷଙ୍କୁ ମିଳିଥାଏ କ୍ୟାବିନେଟ୍ ପାହ୍ୟା । ମେ’ ୨୦୦୩ ଓ ଅକ୍ଟୋବର ୨୦୦୭ରେ ହୋଇଥିଲା ବୋର୍ଡର ବୈଠକ । ମେ’ ୨୦୧୮ରେ ଯୋଜନା ବୋର୍ଡକୁ ଭାଙ୍ଗି ଦେଇଥିଲେ ସରକାର ।
ଗୋଟିଏ ପଟେ ଯୋଜନା ବୋର୍ଡର ଉପାଧ୍ୟକ୍ଷ ନିଯୁକ୍ତ କରୁଛନ୍ତି ସରକାର, ଅନ୍ୟପଟେ ଯୋଜନା ବୋର୍ଡକୁ ନିତି ଆୟୋଗ ଢାଂଚାରେ ଗଢ଼ିବା ପାଇଁ ପ୍ରସ୍ତୁତି ଶେଷ ପର୍ଯ୍ୟାୟରେ ପହଁଚିଛି । କେବଳ ମୁଖ୍ୟମନ୍ତ୍ରୀଙ୍କ ଘୋଷଣା ବାକି ରହିଥିବା କହିଛନ୍ତି, ଯୋଜନା ଓ ସଂଯୋଜନା ମନ୍ତ୍ରୀ । ଯଦି ନିତି ଆୟୋଗ ଢାଂଚାରେ ରାଜ୍ୟ ଯୋଜନା ବୋର୍ଡକୁ ପୁନର୍ଗଠନ କରାଯାଏ, ତେବେ ଏହି ବୋର୍ଡ ଏବେ କି’ କାର୍ଯ୍ୟ କରିବ, ତାହା ଉପରେ ପ୍ରଶ୍ନଚିହ୍ନ ଲାଗିଛି ।