ଦେଶରେ ପଡିଛି ଡାକ୍ତର ମରୁଡି ! ରୋଗ ବଢୁଛି ରୋଗୀ ବଢୁଛନ୍ତି କିନ୍ତୁ ବଢୁନାହିଁ ଡାକ୍ତରଙ୍କ ସଂଖ୍ୟା , ଭାରତରେ ୧,୪୪୫ ଜନସଂଖ୍ୟାରେ ଜଣେ ଡାକ୍ତର ।
ଦେଶରେ ଡାକ୍ତର ଅଭାବ । ଜନସଂଖ୍ୟା ଅନୁସାରେ ଦେଶରେ ନାହାଁନ୍ତି ଆବଶ୍ୟକ ଡାକ୍ତର । ଏହାକୁ ନେଇ ସ୍ୱାସ୍ଥ୍ୟ ମନ୍ତ୍ରାଳୟ ରାଜ୍ୟସଭାରେ ଏକ ରିପୋର୍ଟ ଦାଖଲ କରିଛନ୍ତି । ରିପୋର୍ଟ ଅନୁସାରେ, ୧,୪୪୫ଲୋକଙ୍କ ଜୀବନ କେବଳ ଜଣେ ଏଲୋପାଥିକ ଡାକ୍ତରଙ୍କ ଉପରେ ନିର୍ଭର କରୁଛି । ଉତ୍ତର ଭାରତରେ ସବୁଠାରୁ ଖରାପ ସ୍ଥିତିରେ ରହିଛି ହରିୟାଣା । ଏଠାରେ ଜଣେ ଏଲୋପାଥିକ ଡାକ୍ତରଙ୍କ ଉପରେ ୬,୨୮୭ଲୋକ ନିର୍ଭର କରୁଛନ୍ତି । ଏଥି ସହ ଉତ୍ତର ପ୍ରଦେଶରେ ୩,୬୯୨, ଉତ୍ତରାଖଣ୍ଡରେ ୧,୬୩୧, ପଞ୍ଜାବରେ ୭୭୮, ହିମାଚଳ ପ୍ରଦେଶରେ ୩,୦୧୫, ଜମ୍ମୁ କାଶ୍ମୀରରେ ୧,୧୪୩ ଏବଂ ରାଜଧାନୀ ଦିଲ୍ଲୀରେ ୧,୨୫୨ ଲୋକଙ୍କ ପାଇଁ ଜଣେ ଏଲୋପାଥିକ ଡାକ୍ତର ପଞ୍ଜିକୃତ ହୋଇଛନ୍ତି । 
Kanak News is now on WhatsApp
Join and get latest news updates delivered to you via WhatsApp
ଆଶୁ (ଆୟୁର୍ବେଦ, ଯୋଗ, ହୋମିଓପାଥିକ) ଚିକିତ୍ସା ପଦ୍ଧତି ପାଇଁ ଡାକ୍ତରଙ୍କ ସଂଖ୍ୟା ଦେଖିବାକୁ ଗଲେ ହରିୟାଣାରେ ୧,୮୧୨ ଲୋକଙ୍କ ଚିକିତ୍ସା ପାଇଁ ମାତ୍ର ଜଣେ ଡାକ୍ତର । ଯାହାକି ଉତ୍ତର ଭାରତର ଅନ୍ୟ ରାଜ୍ୟ ତୁଳନାରେ ଏହା ସର୍ବାଧିକ । ମନ୍ତ୍ରାଳୟ ରିପୋର୍ଟ ମୁତାବକ, ଦେଶରେ ୧୧.୫୯ ଲକ୍ଷ ଏଲୋପାଥି ଡାକ୍ତର ପଞ୍ଜିକୃତ ହୋଇଛନ୍ତି । କିନ୍ତୁ ଏଥିରୁ ୯.୨୭ ଲକ୍ଷ ଡାକ୍ତର ପ୍ରତିଦିନ ହସ୍ପିଟାଲ କିମ୍ବା କ୍ଲିନିକରେ ରୋଗୀଙ୍କ ଚିକିତ୍ସା କରୁଛନ୍ତି । ଦେଶର ଜନସଂଖ୍ୟା ୧.୩୫ ବିଲିୟନ । ଏହି ହିସାବରେ ଦେଶରେ ୧,୪୪୫ ଲୋକଙ୍କ ଜନସଂଖ୍ୟା ତୁଳନାରେ ଜଣେ ଏଲୋପାଥିକ ଡାକ୍ତର । ଦେଶରେ ଡାକ୍ତରଙ୍କ ଅଭାବକୁ ପୂରଣ କରିବା ପାଇଁ ଏମବିବିଏସ କୋର୍ସରେ ସିଟ ସଂଖ୍ୟା ୧୫୦ ରୁ ୨୫୦ ଯାଏଁ ବୃଦ୍ଧି କରାଯାଇଛି । ନୂଆ ମେଡିକାଲ କଲେଜର ସ୍ଥାପନା ପାଇଁ ନିୟମର ସରଳତା, ଜିଲ୍ଲା ହସ୍ପିଟାଲରେ ମେଡିକାଲ କଲେଜର ପାହ୍ୟାବୃଦ୍ଧି କରିବା ଦିଗରେ କାର୍ଯ୍ୟ ହେଉଛି । ବିଶେଷଜ୍ଞ ଡାକ୍ତରଙ୍କ ଅଭାବ ପୂରଣ ପାଇଁ କେନ୍ଦ୍ର ଓ ରାଜ୍ୟ ସରକାରଙ୍କୁ ସହାୟତା କରାଯାଉଛି ।