୮୦ ହଜାରରୁ ଅଧିକ ଆସିଛନ୍ତି, ପାଖାପାଖି ୬ ହଜାର ତଥ୍ୟ ଦେଇଛନ୍ତି । ବାକି ୭୪ ହଜାରରୁ ଅଧିକ ଲୋକଙ୍କ ବାବଦରେ ସରକାରଙ୍କ ପାଖରେ ତଥ୍ୟ ଅଛି ତ?
କନକ ବ୍ୟୁରୋ : କରୋନା ମୁକାବିଲା ପାଇଁ ପୂରା ଦେଶ ଲକଡାଉନ ହୋଇଥିବା ବେଳେ ରାଜ୍ୟ ସରକାର ଅନେକ ସତର୍କତାମୂଳକ ନେଇଛନ୍ତି । ଏପରିକି ଆଗୁଆ କୋଭିଡ-୧୯ ହସ୍ପିଟାଲ ନିର୍ମାଣ କରି କରୋନା ମୁକାବିଲା କରିବାକୁ ଅଣ୍ଟା ଭିଡିଛନ୍ତି ରାଜ୍ୟ ସରକାର । ଏପରିକି ରାଜ୍ୟ ସରକାରଙ୍କ କୋଭିଡ-୧୯ର ମୁଖ୍ୟ ସୁବ୍ରତ ବାଗଚୀ ପ୍ରତିଦିନ ରାଜ୍ୟ ସରକାର କେଉଁ ପଦକ୍ଷେପ ଗ୍ରହଣ କରୁଛନ୍ତି ତାହା ପୂରା ରାଜ୍ୟବାସୀଙ୍କୁ ଜଣାଉଛନ୍ତି । ଏପରିକି ରାଜ୍ୟରେ ତୃତୀୟ ଆକ୍ରାନ୍ତ ଚିହ୍ନଟ ପରେ ଷ୍ଟେଜ-୩ ସଂକ୍ରମଣ ସମ୍ଭାବନା ସୃଷ୍ଟି ହୋଇଥିବା ଜଣାଇଥିଲେ ସୁବ୍ରତ । କାରଣ ପୂର୍ବ ଦୁଇ ସଂକ୍ରମିତ ବ୍ୟକ୍ତି ବିଦେଶରୁ ଆସିଥିବା ବେଳେ ତୃତୀୟ କରୋନା ଆକ୍ରାନ୍ତ ବ୍ୟକ୍ତି ଦିଲ୍ଲୀରୁ ଆସିଥିଲେ । ତେଣୁ ଅନ୍ୟ ଦେଶରୁ ଓ ଅନ୍ୟ ରାଜ୍ୟରୁ ଓଡ଼ିଶାକୁ ଆସିଥିବା ବ୍ୟକ୍ତିି ୧୦୪ରେ ଫୋନ୍ କରି ପଞ୍ଜୀକରଣ କରିବା ସହ ନିଜ ବାବଦରେ ତଥ୍ୟ ଦେବାକୁ କୁହାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
୩୦ ମାର୍ଚ୍ଚ ସୁଦ୍ଧା ରାଜ୍ୟ ସରକାରଙ୍କ ରିପୋର୍ଟ ଅନୁଯାୟୀ, ବାହାରୁ ଓଡ଼ିଶାକୁ ଆସିଥିବା ମୋଟ ୧୦୨୧୭ ଜଣ ଅନଲାଇନ ଓ ୧୦୪ ମାଧ୍ୟମରେ ପଞ୍ଜୀକରଣ କରିଛନ୍ତି । ଯେଉଁଥିରେ ୪୨୯୧ ଜଣ ବିଦେଶରୁ ଫେରିଥିବା ବେଳେ ୫୯୨୬ ଜଣ ଅନ୍ୟ ରାଜ୍ୟରୁ ଫେରିଛନ୍ତି । ତେବେ ସୁବ୍ରତଙ୍କ ରିପୋର୍ଟ ଅନୁଯାୟୀ, ଅନ୍ୟ ରାଜ୍ୟରେ କାମ କରୁଥିବା ପ୍ରାୟ ୮୦ ହଜାରରୁ ଅଧିକ ଲୋକ ଓଡ଼ିଶା ଫେରିଛନ୍ତି । ଯେଉଁଥିରେ କିଛି ସର୍ବାଧିକ ସଂକ୍ରମିତ ରାଜ୍ୟ ମଧ୍ୟ ରହିଛି । କିନ୍ତୁ ପଞ୍ଜୀକରଣ କରିଛନ୍ତି ୫୯୨୬ ଜଣ । ଯାହା ସ୍ପଷ୍ଟ ଦର୍ଶାଉଛି ଯେ, ଏବେ ବି ୭୪ ହଜାରରୁ ଅଧିକ ଲୋକ ପଞ୍ଜୀକରଣ କରିନାହାନ୍ତି ଯେଉଁମାନେ ଅନ୍ୟ ରାଜ୍ୟରୁ ଏବେ ଓଡ଼ିଶାକୁ ଫେରିଛନ୍ତି ।
ସରକାର କେବଳ ବାହାରୁ ଆସିଥିବା ଲୋକଙ୍କୁ ହୋମ କ୍ୱାରେଣ୍ଟାଇନରେ ରହିବାକୁ ପରାମର୍ଶ ଦେଇ ଚୁପ ବସିଛନ୍ତି । ତେବେ ପ୍ରଶ୍ନ ଉଠୁଛି, ପଞ୍ଜୀକରଣ କରିନଥିବା ୭୪ ହଜାରରୁ ଅଧିକ ଲୋକଙ୍କ ମଧ୍ୟରୁ ଯଦି କିଛି ଲୋକ କରୋନା ସଂକ୍ରମିତ ହୋଇଥାନ୍ତି ତେବେ କଣ ହେବ ସ୍ଥିତି । କାରଣ ତୃତୀୟ କରୋନା ସଂକ୍ରମିତଙ୍କ ସଂସ୍ପର୍ଶରେ ୧୧୨ ଜଣ ଆସିବା ପରେ ଷ୍ଟେଜ-୩ ସଂକ୍ରମଣର ସମ୍ଭାବନା ସୃଷ୍ଟି ହୋଇଥିବା କହିଥିଲେ ସୁବ୍ରତ । ତେବେ ୭୪ ହଜାର ଲୋକଙ୍କ ଭିତରୁ ଯଦି କେହି ସଂକ୍ରମିତ ହୋଇଥାନ୍ତି ତେବେ ଏହାର ପରିଣାମ କେତେ ଭୟାବହ ହୋଇପାରେ ତାର ଆକଳନ କରିଛନ୍ତି କି ସରକାର । ସହରରେ ଲୋକେ ଟିକିଏ ସଚେତନ ହୋଇଥିବା ବେଳେ ଗ୍ରାମାଞ୍ଚଳର ଲୋକ ଏପର୍ଯ୍ୟନ୍ତ ସେତେଟା ସଚେତନ ହୋଇପାରିନାହାନ୍ତି । ତେଣୁ କରୋନା ଯଦି ଗ୍ରାମାଞ୍ଚଳକୁ ବ୍ୟାପେ ତେବେ ଏହାକୁ ମୁକାବିଲା କରିବା ସରକାରଙ୍କ ପକ୍ଷେ କଷ୍ଟକର ହୋଇଯିବ ।
ଏହାବାଦ୍ ଯେଉଁମାନେ ବାହାରୁ ଆସୁଛନ୍ତି ସେମାନଙ୍କୁ ହୋମ ଆଇସୋଲେସନରେ ରହିବାକୁ କୁହାଯାଇଛି । ଏପରିକି ନିୟମ ଭାଙ୍ଗିଲେ କାର୍ଯ୍ୟାନୁଷ୍ଠାନ ନିଆଯିବ ବୋଲି ମଧ୍ୟ କୁହାଯାଇଛି । କିନ୍ତୁ ଡିଜିପି ଅଭୟଙ୍କ ସୂଚନା ମୁତାବକ ଏବେ ପର୍ଯ୍ୟନ୍ତ ହୋମକ୍ୱାରେଣ୍ଟାଇନରେ ରହିନଥିବା ୬୧ ଜଣଙ୍କ ନାଁରେ ମାମଲା ରୁଜୁ କରାଯାଇଛି । ତେବେ ପ୍ରଶ୍ନ ଉଠୁଛି, ଅନ୍ୟ ମାନେ ହୋମ କ୍ୱାରେଣ୍ଟାଇନରେ ରହୁଥିବା ନେଇ ସରକାରଙ୍କ ପାଖରେ ସଠିକ୍ ତଥ୍ୟ ଅଛି ତ? ଯଦି ହଁ ତେବେ କରୋନାକୁ ମୁକାବିଲା କରିବାକୁ ରାଜ୍ୟ ସରକାର ଯେଉଁ ପଦକ୍ଷେପ ନେଇଛନ୍ତି ତାହା ସଫଳ ହୋଇପାରିବ । କିନ୍ତୁ ଯଦି ନା’ ତେବେ ସ୍ଥିତି କେଉଁ ରୂପ ଧାରଣ କରିବ ତାହାର ଆକଳନ ଲଗାଇବା ମୁସ୍କିଲ ହୋଇପଡିବ ।