ଓଡ଼ିଶା ଚାହିଦା ମେଂଟାଇବ ଇଜିପ୍ଟ ପିଆଜ । ଖାଉଟିଙ୍କ ଆବଶ୍ୟକତାକୁ ଦେଖି ଇଜିପ୍ଟରୁ ଆସୁଛି ଏକ ଲକ୍ଷ କ୍ୱିଂଟାଲରୁ ଅଧିକ ପିଆଜ । ଦିନେ ଦୁଇ ଦିନ ଭିତରେ ରାଜ୍ୟରେ ପହଂଚିବ
ବଜାରକୁ ଆସିବା ପରେ ନିୟନ୍ତ୍ରଣକୁ ଆସିପାରେ ଦର; ସେପଟେ ପିଆଜର ମହଙ୍ଗା ମାଡରେ ଘାଇଲା ହେଲେ ଲୋକେ, ପିଆଜର ସ୍ଥାନ ନେଲା ବନ୍ଧାକୋବି
କନକ ବ୍ୟୁରୋ: ସପ୍ତାହ ମଧ୍ୟରେ କମିପାରେ ପିଆଜ ଦର । କାରଣ ଇଜିପ୍ଟରୁ କେନ୍ଦ୍ର ସରକାର ଆମଦାନୀ କରିଛନ୍ତି ପ୍ରାୟ ୧ ଲକ୍ଷ ୨୦ ହଜାର ଟନ୍ ପିଆଜ । ଏହା ଗତକାଲି ଦେଶରେ ପହଂଚି ସାରିଥିବା ବେଳେ ଖୁବ୍ ଶୀଘ୍ର ସାରା ଦେଶର ବଜାରରେ ଉପଲବ୍ଧ ହେବ । ଫଳରେ ଶହେ ଟଙ୍କା ଛୁଇଁଥିବା ପିଆଜର ଦର କମିବ ବୋଲି ଆଶା କରିଛି ବ୍ୟବସାୟୀ ମହାସଂଘ । ଏଥିସହ ଜାନୁଆରୀ ପ୍ରଥମ ସପ୍ତାହରେ ଦେଶରେ ନୂଆ ପିଆଜ ଉତ୍ପାଦନ ହୋଇଯିବ ।
Kanak News is now on WhatsApp
Join and get latest news updates delivered to you via WhatsApp
ଫଳରେ ପିଆଜ ଦର ଆଉ ଅଧିକ ବଢିବନାହିଁ ବରଂ ଦର କମିବା ଆରମ୍ଭ ହୋଇଯିବ ବୋଲି ବ୍ୟବସାୟୀ ମହାସଂଘ ଆଶା ରଖିଛି । ବାଙ୍ଗାଲୁର, ମହାରାଷ୍ଟ୍ରର ନାସିକ, ଆନ୍ଧ୍ରର କର୍ନୁଲରୁ ଓଡିଶାକୁ ମୁଖ୍ୟତଃ ପିଆଜ ଆସିଥାଏ । ହେଲେ ଏଥର ଅନିୟମିତ ବର୍ଷା ପିଆଜ ଉତ୍ପାଦକୁ ବେଶ୍ କମାଇ ଦେଇଛି । ଗତ କିଛି ଦିନ ହେଲା ରାଜ୍ୟର ବିଭିନ୍ନ ସହରରେ ପିଆଜ ଦର ୯୦ରୁ ଅଧିକ ରହିଛି । ଓଡିଶାରେ ଦୈନିକ ପ୍ରାୟ ୬ଶହରୁ ୭ଶହ ଟନ୍ ଅର୍ଥାତ ୬ଲକ୍ଷରୁ ୭ ଲକ୍ଷ କିଲୋଗ୍ରାମ ଯାଏଁ ପିଆଜ ବିକ୍ରି ହୋଇଯାଏ । ଏବେ ମାତ୍ର ୨ରୁ ଅଢେଇ ଲକ୍ଷ କିଲୋଗ୍ରାମ ଯାଏ ପିଆଜ ବିକ୍ରି ହେଉଛି ବୋଲି ଜଣାପଡିଛି ।
ସେପଟେ, ପିଆଜର ମହଙ୍ଗା ମାଡରେ ଘାଇଲା ଗ୍ରାହକ । ଖାଲି ଗ୍ରାହକ କାହିଁକି, ବର୍ଦ୍ଧିତ ଦରର ପ୍ରଭାବ ପଡିଛି ଫାଷ୍ଟଫୁଡ୍ ଉପରେ । ହୋଟେଲ ମେନୁରେ ବି ପିଆଜ ଧିରେ ଧିରେ ହଜିବାକୁ ବସିଲାଣି । ଚିଲି ଆଇଟମରେ ପିଆଜ କମ୍, ବନ୍ଧାକୋବି ଅଧିକ । ସାଲାଡରେ ବି ସମାନ ସ୍ଥିତି । ପିଆଜ କମ୍, କାକୁଡି ଅଧିକ । ହୋଟେଲ ଓ ରେଷ୍ଟୁରାଂଟରେ ବିକ୍ରି ହେଉଥିବା ଚିଲି ଆଇଟମରେ ଧିରେ ଧିରେ ପିଆଜର ପରିମାଣ କମଗଲାଣି । ହୋଟେଲ ଆଇଟମରେ ପିଆଜର ସ୍ଥାନ ନେଇଯାଇଛି ବନ୍ଧାକୋବି ।
ଚିଲି କୋବି ଓ ଚିଲି ପନିରରେ ପିଆଜ ପକାଇବା ବେଳେ ପଛଘୁଂଚା ଦେଉଛନ୍ତି ଦୋକାନୀ । ଖାଦ୍ୟ ସହ ପିଆଜ ଦେବାକୁ ତ ସିଧା ସିଧା ମନା କରିଦେଉଛନ୍ତି । ଫାଷ୍ଟଫୁଡ୍ ଦୋକାନରେ ବି ପିଆଜର ମହଙ୍ଗା ମାଡ । ମେନୁରେ ଚିଲି ଆଇଟମ୍ର ଦାମ ବଢାଇଦେଇଛନ୍ତି । ଗୁପଚୁପ୍, ଚାଟ୍ , ଦହିବରାରେ ବି ପିଆଜ ଦେବା ବେଳେ କୁନ୍ଥ କୁନ୍ଥ ହେଉଛନ୍ତି ଦୋକାନୀ । ତେବେ ସପ୍ତାହ ମଧ୍ୟରେ ଶତକ ମାରିସାରିଲାଣି ପିଆଜ ଦର । ରାତି ପାହିଲେ ବଜାରରେ ନୂଆ ଦର ଶୁଣିବାକୁ ମିଳୁଛି । ଏସବୁ ଭିତରେ ବର୍ଦ୍ଧିତ ଦର , ହୋଟେଲ ଓ ଫାଷ୍ଟଫୁଡ୍ ଦୋକାନୀଙ୍କୁ ଚିନ୍ତାରେ ପକାଇଦେଇଛି ।