ଚେନ୍ନାଇରେ ବି ପିଆଜ ଚଡକ: ଓଡିଶା ଭଳି ଚେନ୍ନାଇବାସୀଙ୍କୁ କନ୍ଦାଉଛି ପିଆଜ । କିଲେ ପିଆଜକୁ ୧୨୦ ଟଙ୍କା

152

କନକ ବ୍ୟୁରୋ: ଚେନ୍ନାଇରେ ବି ପିଆଜ ଚିନ୍ତା । ଓଡିଶା ଭଳି ଚେନ୍ନାଇରେ ବି ହୁହୁ ହୋଇ ବଢୁଛି ପିଆଜ ଦର । ଚେନ୍ନାଇ ବଜାରରେ ପିଆଜ ଦର ଆକାଶ ଛୁଆଁ ଥିବାରୁ ଚିନ୍ତାରେ ଖାଉଟି । ତେବେ ସବୁଠାରୁ ବଡ କଥା ହେଉଛି ଦୀର୍ଘ ୮ ବର୍ଷ ହେବ ଚେନ୍ନାଇରେ ଯାହା ହୋଇ ନଥିଲା ତାହା ଚଳିତ ବର୍ଷ ହୋଇଛି । ଆଉ ଏ ପରିସ୍ଥିତି ସମସ୍ତଙ୍କୁ ଆଶ୍ଚର୍ଯ୍ୟ କରିଛି ।

ଚେନ୍ନାଇରେ ପିଆଜର ଦରକୁ ନେଇ ଏବେ ହଇଚଇ ସୃଷ୍ଟି ହୋଇଛି। ସାରା ଦେଶରେ ଏବେ ପିଆଜର ଦର ବୃଦ୍ଧିକୁ ନେଇ ଚର୍ଚ୍ଚା ଚାଲିଥିବା ବେଳେ ଚେନ୍ନାଇରେ ପିଆଜ କିଲୋ ୧୨୦ଟଙ୍କା ହେବା ଏବେ ଚେନ୍ନାଇବାସୀଙ୍କୁ କନ୍ଦାଇବା ଆରମ୍ଭ କରିଛି। କୋଏମବେଡୁରେ ପିଆଜ ହୋଲସେଲ ଡିଲରମାନେ ପିଆଜ ଦର କମ ବେଶି ହେଉଥିବାରୁ ଦାମକୁ ସ୍ଥିର ରଖିବା ପାଇଁ ‌ସଂଘର୍ଷ କରୁଛନ୍ତି।

ଗତ ୩ମାସ ହେଲାଣି ବିଭିନ୍ନ ହୋଲସେଲ ଡିଲର ଓ ଖୁଚୁରା ବ୍ୟବସାୟୀମାନେ ପିଆଜ କିଲୋ ପିଛା ୮୦ ଓ ୧୦୦ଟଙ୍କାରେ ବିକ୍ରି କରି ଆସୁଛନ୍ତି। ମହାରାଷ୍ଟ୍ରରେ ଓ କର୍ଣ୍ଣାଟକରେ ଚଳିତ ବର୍ଷ ହୋଇଥିବା ବନ୍ୟା ପାଇଁ ଏଭଳି ପରିସ୍ଥିତି ସୃଷ୍ଟି ହୋଇଥିବା କୁହାଯାଉଛି। କାରଣ ଏଇ ଦୁଇ ରାଜ୍ୟରେ ପିଆଜର ଉତ୍ପାଦନ ଅଧିକ ହୋଇଥାଏ। ନୂଆ ପିଆଜ ବଜାରକୁ ନ ଆସିବା ପର୍ୟ୍ୟନ୍ତ ଆଗାମୀ ୧୫ଦିନ ଯାଏ ଏଭଳି ପରିସ୍ଥିତି ରହିବ ବୋଲି ବ୍ୟବସାୟୀ ସଂଘ ପକ୍ଷରୁ କୁହାଯାଇଛି।

କୋଏମ୍ବେଡୁ ଭେଜିଟେବୁଲ ହୋଲସେଲ ମର୍ଚ୍ଚାଣ୍ଟ ଆସୋସିଏସନର ସେକ୍ରେଟାରୀ ଅବଦୁଲ ଖାଦେରଙ୍କ କହିବା ମୁତାବକ, ବର୍ତ୍ତମାନ ଖୁଚୁରା ବଜାରରେ ପିଆଜ କିଲୋ ୧୨୦ଥିବା ବେଳେ ହୋଲସେଲ ମୂଲ୍ୟ ୧୦୦ଟପିଛି। ୮ବର୍ଷ ତଳେ ପିଆଜ କିଲୋ ୧୦୦ଛୁଇଁଥିଲା ସତ କିନ୍ତୁ ଏତେ ଅଧିକ ଦାମ କେବେ ବଢ଼ି ନଥିଲା। ନାସିକରେ ପିଆଜର ଦାମ୍ ୧୦୦-୧୨୦ଭିତରେ ରହିଥିବା ବେଳେ ବେଙ୍ଗାଲୁରୁରେ ୧୦୦ଛୁଇଁବାକୁ ଯାଉଛି। ବଢ଼ୁଥିବା ଦାମ ଦେଖି ଏବେ ଲୋକେ ତଳ ଶ୍ରେଣୀର ଆନ୍ଧ୍ର ପିଆଜ ୮୦ଟଙ୍କା ଦେଇ କିଣୁଛନ୍ତି। ଦିନ ଆସିବ ପିଆଜକୁ ଗହଣା ବାକ୍ସ ଭିତରେ ରଖିବାକୁ ପଡ଼ିବ।

ଅନ୍ତର୍ଜାତୀୟରୁ ଆରମ୍ଭ କରି ଜାତୀୟ ତଥା ରାଜ୍ୟର ୩୧୪ ବ୍ଲକରେ ଘଟୁଥିବା ପ୍ରତିଟି ଘଟଣା ଉପରେ ସମ୍ବାଦ ଓ କନକ ନ୍ୟୁଜ ଆପଣଙ୍କୁ ଦେଉଛି ୨୪ ଘଂଟିଆ ଅପଡେଟ | କରୋନାର ସଂକଟ ସମୟରେ ଆମେ ଲୋଡୁଛୁ ଆପଣଙ୍କ ସହଯୋଗ । ‘ସମ୍ବାଦ’ ଗ୍ରୁପର ଡିଜିଟାଲ ମିଡିଆକୁ ଆର୍ଥିକ ସମର୍ଥନ ଜଣାଇ ଆଂଚଳିକ ସାମ୍ବାଦିକତାକୁ ଶକ୍ତିଶାଳୀ କରନ୍ତୁ |

Comments are closed.