କମୁନି ପିଆଜ ପ୍ରକୋପ: ଶହେ ଡେଇଁ ଦେଢ ଶହରେ ପହଁଚିଲା ଦର । ଖୁବଶୀଘ୍ର ୨ ଶହ ଛୁଇଁବା ଆଶଙ୍କା । ରାଜ୍ୟ ସହ ସାରା ଦେଶକୁ କନ୍ଦାଇଲା ପିଆଜ
କନକ ବ୍ୟୁରୋ: କିଲେ ପିଆଜକୁ ଦେଢ ଶହ ଟଙ୍କା । ଶହେ ଡେଇଁ ଦେଢ ଶହରେ ପହଁଚିଲା ପିଆଜ । ଖୁବଶୀଘ୍ର ୨ ଶହ ବି ହୋଇଯିବ, ସେଥିରେ କୌଣସି ଆଶଙ୍କା ନାହିଁ । ଓଡିଶା ବଜାରରେ ପିଆଜର ଦର ନା ଆଗରୁ କେବେ ଦେଖାଯାଇଛି ନା କିଏ ଶୁଣିଛି । ରାତି ପାହିଲେ ବଜାରରେ ପିଆଜ ଦର ବଦଳିଯାଉଛି । ୨୪ ଘଂଟା ମଧ୍ୟରେ ୩୦ ଟଙ୍କା ବଢିଯାଇଛି । ତେବେ ରାଜ୍ୟର ସବୁଠୁ ବଡ ବଜାର ଅର୍ଥାତ କଟକର ଛତ୍ର ବଜାରରେ ପିଆଜ ଦେଢ ଶହ ଛୁଇଁଛି । କିଣିବା ତ ଦୂରର କଥା, ପରିବା ବଜାରରେ ପିଆଜ ଦେଖିବା ବେଳକୁ, ପିଆଜ କଥା ଭାବିଲା ବେଳକୁ ମୁହଁ ଆମ୍ବିଳା ହେଉଯାଉଛି । କାରଣ, ରାତି ପାହିଲେ ପିଆଜର ଦର ବଢୁଛି ।
Kanak News is now on WhatsApp
Join and get latest news updates delivered to you via WhatsApp
କଟକରେ କିଲେ ପିଆଜକୁ ଦେଢ ଶହ ଟଙ୍କା ଥିବା ବେଳେ ଭୁବନେଶ୍ୱରରେ ୧୩୦, ପିପିଲିରେ ୧୨୦, ସମ୍ବଲପୁରରେ ୧୨୦, ନବରଙ୍ଗପୁରରେ ୧୦୦, ନୂଆପଡାରେ ୧୦୦, ଆନନ୍ଦପୁରରେ ୧୦୦, ବ୍ରହ୍ମପୁରରେ ୧୦୦ ଓ ବାଙ୍କୀରେ ୧୧୦ ରହିଛି । ତେବେ ମାଲକାନଗିରିରେ ପିଆଜ କିଲୋ ପିଛା ୭୫ରୁ ୮୦ ଟଙ୍କାରେ ବିକ୍ରି ହେଉଛି ।
ସେପଟେ ପିଆଜର ମହଙ୍ଗା ମାଡ, ରୋଷେଇ ଘର ଓ ଗୃହିଣୀଙ୍କ ଉପରେ ବି ପଡିଛି । ଫୁଟଣରେ କମ୍ ପିଆଜ, ଭଜା ଓ ତରକାରୀରେ ବି ପିଆଜର ପରିମାଣ ଧିରେ ଧିରେ କମିଯାଇଛି । ଫାଷ୍ଟଫୁଡ ସେଣ୍ଟରରୁ ରେଷ୍ଟୁରାଂଟ ଯାଏଁ ସବୁଠି ପିଆଜର ବର୍ଦ୍ଧିତ ଦରର ପ୍ରକୋପ ବାରି ହେଉଛି ।
ତେବେ ଖାଲି ରାଜ୍ୟରେ ନୁହେଁ ସାରା ଦେଶରେ ପିଆଜର ମହଙ୍ଗା ମାଡ ଜାରି ରହିଛି । ସ୍ଥିତି ଏଭଳି ହୋଇଛି ଯେ, ପିଆଜର ଦର ବୃଦ୍ଧିକୁ ନେଇ ଆଜି ସଂସଦରେ ହୋହାଲ୍ଲା କରିଛି କଂଗ୍ରେସ । ବେଲଗାମ ପିଆଜ ଦର ବୃଦ୍ଧି ପ୍ରତିବାଦରେ ସଂସଦ ପରିସରରେ ଥିବା ଗାନ୍ଧି ମୂର୍ତ୍ତି ତଳେ ଧାରଣା ଦେଇଥିଲେ କଂଗ୍ରେସ ସାଂସଦ । ପିଆଜର ଅହେତୁକ ଦରବୃଦ୍ଧିକୁ ନେଇ ଖାଉଟି ହନ୍ତସନ୍ତ ହେଉଥିବା ବେଳେ ଦିଲ୍ଲୀରେ ବୈଠକ କରି ସ୍ଥିତି ସମୀକ୍ଷା କରିଛନ୍ତି ଗୃହମନ୍ତ୍ରୀ ଅମିତ ଶାହା ।
ବୈଠକରେ ମୋଦି ସରକାରର ଉଚ୍ଚ ପଦାଧିକାରୀଙ୍କ ସମେତ କେନ୍ଦ୍ରମନ୍ତ୍ରୀ ପିୟୁଷ ଗୋଏଲ, ରାମବିଳାସ ପାଶୱାନ ଏବଂ ନରେନ୍ଦ୍ର ସିଂ ତୋମାର ଉପସ୍ଥିତ ଥିଲେ । ଦେଶରେ ପିଆଜ ସଙ୍କଟ ଏଡାଇବାକୁ ଇଜିପ୍ଟ ଓ ତୁର୍କୀରୁ ପିଆଜ ଆମଦାନୀ କରୁଛନ୍ତି କେନ୍ଦ୍ର ସରକାର । ତଥାପି ସ୍ଥିତିରେ ସୁଧାର ଆସୁନାହିଁ । ବରଂ ଦିନକୁ ଦିନ ପିଆଜ ସଙ୍କଟ ବଢିବାରେ ଲାଗିଛି ।