ଆଖିବୁଜିଲେ ଆଉ ଜଣେ ଆଗଧାଡ଼ିର ଯୋଦ୍ଧା । ମହାମାରୀ କରୋନାରେ ସମ୍ବାଦର ଗଞ୍ଜାମ ଜିଲ୍ଲା ପ୍ରତିନିଧି ପ୍ରଦୀପ ସାହୁଙ୍କ ପରଲୋକ ।
କନକ ବ୍ୟୁରୋ : ମହାମାରୀ କରୋନା ନେଇଛି ଆଉ ଜଣେ ସାମ୍ବାଦିକଙ୍କ ଜୀବନ । କରୋନା ଖବର କରୁ କରୁ ମହାମାରୀର ଶିକାର ହୋଇଯାଇଛନ୍ତି ସମ୍ବାଦର ଗଞ୍ଜାମ ପ୍ରତିନିଧି ପ୍ରଦୀପ ସାହୁ । ଗତ କିଛି ଦିନ ହେଲା ସେ କୋଭିଡରେ ଆକ୍ରାନ୍ତ ହୋଇ ଚିକିତ୍ସିତ ହେଉଥିଲେ । କରୋନା ସହ ଲଢ଼େଇ କରିବା ଭିତରେ ଶେଷରେ ଆଖି ବୁଜି ଦେଇଛନ୍ତି ଏହି ଯୋଦ୍ଧା ।
Kanak News is now on WhatsApp
Join and get latest news updates delivered to you via WhatsApp
ହୁଏତ, ଏହାଠୁ ଦୁଃଖଦ ଅନୁଭୁତି ଆଉ କ’ଣ ହୋଇପାରେ, ଯେତେବେଳେ ଜଣେ ସାମ୍ବାଦିକଙ୍କୁ ଆଉ ଜଣେ ସାମ୍ବାଦିକଙ୍କ ମୃତ୍ୟୁର ଖବର କହିବାକୁ ପଡ଼େ କିମ୍ବା ଲେଖିବାକୁ ପଡ଼େ । ଯିଏ ଦିନେ ବୁଲି ବୁଲି ଗଂଞ୍ଜାମ ଜିଲ୍ଳାର ଟିକିନିକି ଖବର ଦେଉଥିଲେ, ସିଏ ନିଜେ ଆଜି ଖବର ପାଲଟି ଯାଇଛନ୍ତି । ମହାମାରୀ ପୁଣି ଜଣେ ‘ସମ୍ବାଦ’ ପରିବାରର ସଦସ୍ୟକୁ ଛଡ଼ାଇ ନେଇଛି ।
ପ୍ରଦୀପଙ୍କ ସମ୍ପର୍କରେ ଯାହା କହିଲେ ବିି କମ ହେବ । ସାମ୍ବାଦିକତା ଓ ମାନବିକତାକୁ ସମାଜ କଲ୍ୟାଣର ଦୁଇ ଅସ୍ତ୍ର ଭଳି କାମରେ ଲଗାଉଥିଲେ । ଏବେ ବି ମନେ ପଡ଼ିଯାଉଛି, ଖବର ସଂଗ୍ରହ କରିବା ପାଇଁ ସେ ବ୍ୟକ୍ତିଗତ ଭାବେ କେମିତି ପ୍ରୋତ୍ସାହିତ କରୁଥିଲେ ।
ଗତବର୍ଷ ଯେତେବେଳେ ଗଞ୍ଜାମ ଜିଲ୍ଳା କରୋନାରେ ସବୁଠୁ ଅଧିକ ପ୍ରଭାବିତ ହୋଇଥିଲା, ଗାଁ, ଗାଁର କରୋନା ସମ୍ପର୍କିତ ଖବର, ସମ୍ବାଦ ଓ କନକ ନ୍ୟୁଜ୍ ଜରିଆରେ ଲୋକଙ୍କ ସାମ୍ନାକୁ ଆଣୁଥିଲେ ପ୍ରଦୀପ ସାହୁ । ଆଉ ଯେତେବେଳେ ସୁରଟରୁ ପ୍ରବାସୀମାନେ ବହୁ କଷ୍ଟରେ ରାଜ୍ୟକୁ ଫେରୁଥିଲେ, ସେମାନଙ୍କ ପାଖରେ ପହଂଚିଯାଉଥିଲେ ପ୍ରଦୀପ ସାହୁ ।
ଦୀର୍ଘ ବର୍ଷର ସାମ୍ବାଦିକତା ଓ ଫିଲ୍ଡରେ କାମ କରିବାର ଅଭିଜ୍ଞତା ସହ ୨୦୧୮ ମସିହାରେ ଓଡ଼ିଶାର ସର୍ବାଧକ ପଠିତ ଓ ପ୍ରସାରିତ ଖବର କାଗଜ ସମ୍ବାଦ ଗଞ୍ଜାମ ଜିଲ୍ଳା ପ୍ରତିନିଧି ଭାବେ ଯୋଗ ଦେଇଥିଲେ । ପ୍ରାୟ ୪ ବର୍ଷ ଭିତରେ ଗଞ୍ଜାମ ଭଳି ଜିଲ୍ଳାରେ ସାଧାରଣ ଲୋକଙ୍କ ବିଶ୍ୱାସ ଭାଜନ ହୋଇପାରିଥିଲେ ।
କରୋନା ଯୋଗୁଁ ସାମ୍ବାଦିକଙ୍କ ମୃତ୍ୟୁ ତାଲିକାରେ ଏବେ ପ୍ରଦୀପଙ୍କ ନାଁ ଯୋଡ଼ି ହୋଇଯାଇଛି । ସାମ୍ବାଦିକଙ୍କୁ କରୋନାର ସମ୍ମୁଖ ଯୋଦ୍ଧା ସଜାଇ ଦିଆଯାଇଛି ସତ, ହେଲେ ଏହି ଯୋଦ୍ଧାଙ୍କ ସୁରକ୍ଷା ପାଇଁ କ’ଣ ପଦକ୍ଷେପ ନିଆଯାଇଛି । ଏମାନଙ୍କ ସୁରକ୍ଷା ପାଇଁ ସ୍ୱତନ୍ତ୍ର ଚିକିତ୍ସା ସେବା ଯୋଗାଇ ଦେବା କ’ଣ ପ୍ରଶାସନର ଦାୟୀତ୍ୱ ନୁହେଁ ? ଆଉ ଏହାରି ଭିତରେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ସମେତ ବହୁ ବିଶିଷ୍ଟ ବ୍ୟକ୍ତି ସାମ୍ବାଦିକ ପ୍ରଦୀପ କିଶୋର ସାହୁଙ୍କ ଦେହନ୍ତରେ ଶୋକ ପ୍ରକାଶ କରିବା ସହ ଶୋକସନ୍ତପ୍ତ ପରିବାରକୁ ସମବେଦନା ଜଣାଇଛନ୍ତି ।