କନକ ବ୍ୟୁରୋ : ଭୁବନେଶ୍ୱର ପେଟ୍ରୋଲ ପମ୍ପ ବିସ୍ଫୋରଣ ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ନିଖୋଜ ଅଛନ୍ତି । କଟକ ବଡ଼ ମେଡ଼ିକାଲରେ ଚିକିତ୍ସାଧୀନ ଅବସ୍ଥାରେ ଗଞ୍ଜାମର ଜଣେ ବ୍ୟକ୍ତିଙ୍କ ମୃତ୍ୟୁ ହୋଇଛି । ନିଖୋଜ ବ୍ୟକ୍ତିଙ୍କ ପତ୍ତା ଲଗାଇବା ପାଇଁ ଆବଶ୍ୟକ ପଡ଼ିଲେ ଖଣ୍ଡବିଖଣ୍ଡିତ ମାଂସ ପିଣ୍ଡୁଳାର ଡିଏନଏ ଟେଷ୍ଟ କରାଯିବ ବୋଲି ପୋଲିସ କମିଶନର ସୂଚନା ଦେଇଛନ୍ତି । ଆଉ ଏହାରି ଭିତରେ କେଉଁ କାରଣରୁ ଦୁର୍ଘଟଣା ହେଲା, ସେ ନେଇ ବିଧିବଦ୍ଧ ଭାବେ ସୂଚନା ଆସିଛି । ପ୍ରଥମେ ହାଇଡ୍ରୋଜେନ୍ ଗ୍ୟାସ୍ ଭର୍ତି ହୋଇଥିଲା, ତା’ ପରେ ନାଇଟ୍ରୋଜେନ୍ ଗ୍ୟାସ୍ ଫିଲିଂ ହୋଇଥିଲା । କିନ୍ତୁ ଯେତେବେଳେ ଏଲପିଜି ରିଫିଲିଂ ହେଲା, ସେତେବେଳେ ଲିକ୍ ହୋଇ ବିସ୍ଫୋରଣ ହୋଇଥିଲା । ଏପଟେ ବିସ୍ଫୋରଣ ଘଟଣାରେ ମୃତକଙ୍କ ପରିବାରକୁ ୮ଲକ୍ଷ ଟଙ୍କାର ଅନୁକମ୍ପା ସହାୟତା ଘୋଷଣା କରିଛି ଆଇଓସିଏଲ ।
Kanak News is now on WhatsApp
Join and get latest news updates delivered to you via WhatsApp
ବିସ୍ଫୋରଣର ଭୟାନକ ଶବ୍ଦ ହୁଏତ ଏବେ ବି ସେମାନଙ୍କ କାନରେ ଗୁଂଜରିତ ହେଉଥିବ, ଯେଉଁମାନେ ଦୁର୍ଘଟଣାକୁ ଅତି ନିକଟରୁ ଦେଖିଛନ୍ତି । ଆଉ ଏହି ବିସ୍ପୋରଣର ଶବ୍ଦରେ ସବୁଦିନ ପାଇଁ ନୀରବି ଯାଇଛନ୍ତି ସତ୍ୟାନନ୍ଦ ନାୟକ । ଅଘଟଣର କେଇ ସେକେଣ୍ଡ ପୂର୍ବରୁ ଗ୍ୟାସ୍ ଫିଲିଂ କରୁଥିବା ଗଂଜାମ ଜିଲ୍ଲାର ଆସ୍କା ଅଞ୍ଚଳର ସତ୍ୟାନନ୍ଦ ପେଟ୍ରୋଲ ପମ୍ପ ଦୁର୍ଘଟଣାରେ ପ୍ରାଣ ହରାଇଛନ୍ତି ।ଦୁର୍ଘଟଣା ପୂର୍ବରୁ ୩ଜଣ କର୍ମଚାରୀ ଗ୍ୟାସ୍ ଫିଲିଂ କରୁଥିଲେ । ଯେଉଁଥିରୁ ଜଣଙ୍କର ମୃତ୍ୟୁ ହୋଇଯାଇଥିବା ବେଳେ ଆଉ ଜଣଙ୍କର ଗୁରୁତର ଅବସ୍ଥାରେ ଚିକିତ୍ସା ଚାଲିଛି । ଏହାରି ଭିତରେ ପୋଲିସ୍ କମିଶନର କହିଛନ୍ତି, ବିସ୍ଫୋରଣ ଘଟଣାରେ ଜଣଙ୍କର ମୃତ୍ୟୁ ହୋଇଥିବା ବେଳେ ଜଣେ ନିଖୋଜ୍ ଅଛନ୍ତି । ଆଉ ନିଖୋଜ ବ୍ୟକ୍ତିଙ୍କ ପତ୍ତା ଲଗାଇବା ପାଇଁ ଆବଶ୍ୟକ ପଡ଼ିଲେ ଖଣ୍ଡବିଖଣ୍ଡିତ ମାଂସ ପିଣ୍ଡୁଳାର ଡିଏନଏ ଟେଷ୍ଟ କରାଯିବ ବୋଲି ପୋଲିସ କମିଶନର ସୂଚନା ଦେଇଛନ୍ତି । ବିସ୍ଫୋରଣ ପରେ ବିଚଳିତ ହୋଇଯାଇଛନ୍ତି, ଯେଉଁ ପରିବାର ସଦସ୍ୟଙ୍କ ଖୋଜ ଖବର ମିଳୁନି । ସୁଦୂର ଗଞ୍ଜାମରୁ ଆସି ଭୁବନେଶ୍ୱରରେ ସୀମାଞ୍ଚଳ ପରିଡ଼ାଙ୍କୁ ଖୋଜୁଛନ୍ତି ତାଙ୍କ ପରିବାର ଲୋକ । ସୀମାଞ୍ଚଳଙ୍କ ଫଟୋ ଦେଖାଇ, ଘୁରି ବୁଲୁଛନ୍ତି ତାଙ୍କ ଭାଇ ।
ଡିପାର୍ଟମେଣ୍ଟ ଅଫ୍ ଏକ୍ସପ୍ଲୋସିଭର ଡେପୁଟି ଚିଫ୍ କଂଟ୍ରୋଲରଙ୍କ ସୂଚନା ଅନୁସାରେ, ଫିଲିଂ ଷ୍ଟେସନରେ ଏଲପିଜି ରିଫିଲିଂ ଚାଲିଥିବା ବେଳେ ବିସ୍ଫୋରଣ ହୋଇଛି । ବିସ୍ଫୋରଣ ସମୟରେ ସାଢ଼େ ୪ ଟନ୍ ଏଲପିଜି ଏବଂ ୧୦ ହଜାର ଲିଟର ପାଣି ଥିଲା । ପ୍ରଥମେ ହାଇଡ୍ରୋଜେନ୍ ଗ୍ୟାସ୍ ଭର୍ତି ହୋଇଥିଲା, ତା’ ପରେ ନାଇଟ୍ରୋଜେନ୍ ଗ୍ୟାସ୍ ଫିଲିଂ ସଫଳ ହେଲା । କିନ୍ତୁ ଯେତେବେଳେ ଏଲପିଜି ରିଫିଲିଂ ହେଲା, ସେତେବେଳେ ଲିକ୍ ହୋଇ ବିସ୍ଫୋରଣ ହେଲା ।
ଏହାରି ଭିତରେ ପେଟ୍ରୋଲ ପମ୍ପ ବିସ୍ଫୋରଣ ଘଟଣାରେ ମୃତକଙ୍କ ପରିବାରକୁ ୮ଲକ୍ଷ ଟଙ୍କାର ଅନୁକମ୍ପା ସହାୟତା ଘୋଷଣା କରିଛି ଆଇଓସିଏଲ । ଏହାସହ ଗୁରୁତର ଆହତଙ୍କୁ ୪ ଲକ୍ଷ ଟଙ୍କା ଏବଂ ଆହତଙ୍କୁ ଲକ୍ଷେ ଟଙ୍କାର ସହାୟତା ମିଳିବ ବୋଲି ଇଣ୍ଡିଆନ ଅଏଲ କର୍ପୋରେସନ ପକ୍ଷରୁ ସୂଚନା ଦିଆଯାଇଛି । କେନ୍ଦ୍ର ପେଟ୍ରୋଲିଅମ୍ ମନ୍ତ୍ରୀ ଧର୍ମେନ୍ଦ୍ର ପ୍ରଧାନଙ୍କ ନିର୍ଦ୍ଦେଶ ପରେ ଏହି ସହାୟତା ଘୋଷଣା କରାଯାଇଛି ।